6eme Parti: Bann l’Etude Biblik Ki Faire Nou Etudiant Progressé
Kan enn Etudiant Pose enn Question
1 Enn fois ki enn l’etude la Bible inn bien etabli, normalement li pli bon ki nou examine bann l’enseignement Biblik en ordre au lieu ki nou change-change sujet. Sa aide etudiant-la pou gagne enn bon base connaissance exact ek pou progressé lor plan spirituel. (Col. 1:9, 10) Mais, souvent bann etudiant pose question lor different sujet pendant l’etude. Ki nou kapav faire?
2 Servi Discernement: Normalement, kapav reponn dé-suite bann question ki éna enn rapport avek séki nou pé etudié. Si publication ki nou pé etudié, koz lor sa question-la plitar, nou kapav zis dir nou etudiant ki pou examine sa plitar. Mais, si enn question péna okenn rapport avek nou l’etude ou-soit sa pou demann plus recherche pou nou kapav reponn bien, li pou kitfois preferab ki nou examine sa, apré l’etude ou-soit dan enn lot moment. Certain proclamateur remarké ki si zot note question-la lor enn papier, sa donne etudiant-la l’assurance ki nou pé prend compte so question ek en mem temps sa empeche nou al en dehors l’etude.
3 Nou bann publication ki nou servi pou conduire l’etude, pa koz en detail lor plusieurs l’enseignement Biblik. Ki nou pou faire si enn etudiant gagne difficulté pou accepté enn certain l’enseignement ou-soit li bien attaché ar enn croyance ki fausse? Kitfois li pou pli bon ki examine sa sujet-la avek l’aide lezot publication ki examine en detail séki la Bible dir lor la. Mais, si la aussi etudiant-la pa trop croire, nou laisse sujet-la pou enn lot fois ek nou contigne avek so l’etude. (Jean 16:12) A mesure ki so connaissance lor la Bible augmenté ek ki li progressé spirituellement, kitfois li pou kapav arrivé comprend sa l’enseignement-la.
4 Reconette Ou Limit: Si ou pa sur ki reponse pou donné pou enn question, pa tenté pou donne ou l’opinion personnel, ou-soit enn reponse ki fausse. (2 Tim. 2:15; 1 Pierre 4:11) Explik li, ki ou pou al faire recherche lor sa sujet-la ek apré ou pou retourné pou donne li enn reponse. Ou kapav mem saisi l’occasion pou montré etudiant-la couma faire bann recherche. Doucement-doucement montré li couma servi bann different zoutil ki l’organisation Jéhovah donne nou pou faire bann recherche. Dan sa fason-la, finalement li pou kapav li-mem reponn so bann prop question.—Actes 17:11.