Attire plus l’attention lor la Bible!
1. Au commencement, pou kisannla surtout ti publié La Tour de Garde, ek pou kisannla ti publié L’Âge d’Or?
1 Le 1er octobre 1919, ti publié premier numero magazine L’Âge d’Or. Li finn montré li enn zoutil ki finn bien utile dan travail predication. Kifer? Parski li ti surtout faire pou publik. Parkont, La Tour de Garde ti consideré couma enn magazine ki ti publié surtout pou “ti troupeau.” (Luc 12:32) Bann proclamateur ti tellement content sa nouveau publication-la ki pendant plusieurs l’année finn place pli beaucoup copie L’Âge d’Or ki La Tour de Garde.
2. Couma nou appel L’Âge d’Or zordi ek ki so l’objectif depuis commencement?
2 L’Âge d’Or ti publié pou montré ki Regne mille an Christ, sa-mem ki vrai solution pou bann problem ki dimoune gagné, ek ki sa regne-la pou amenn l’âge d’or. Pendant bann l’année ki’nn vini apré, L’Âge d’Or finn konn certain changement pou adapté avek bann besoin ki finn ena dan different lepok. En 1937, finn change so nom ek finn appel li Consolation. En 1946, li’nn vinn Réveillez-vous !, pareil couma nou konn li zordi.
3. Réveillez-vous ! inn vinn enn bon zoutil dan l’accomplissement ki prophetie?
3 Depuis ki li’nn apparette, sa magazine-la finn contribué beaucoup pou sa grand temoignage ki finn donné depuis 1919-la. (Mat. 24:14) Mais, kan nou conscient ki la fin bien pré, li parette sage ki Réveillez-vous ! konn lezot changement encore.
4. (a) Ki enn kikenn bizin faire si li envie sapé kan “jour colere Jéhovah” vini? (b) Dapré Révélation 14:6, 7, ki sa ‘ange ki pé envolé au milieu le ciel-la’ dire tou dimoune faire?
4 Bann dimoune par million content lire Réveillez-vous ! parski li koz lor enn quantité sujet profane dan enn fason attirant. Surement la majorité bann dimoune ki assisté Mémorial toulé-l’année, lire Réveillez-vous ! regulierement. Mais seulement, n’importe ki dimoune ki envie sapé kan “jour colere Jéhovah” vini, pou bizin l’aide pou li vinn enn kikenn ki faire plus ki zis lire regulierement nou bann publication.—Tseph. 2:3; Rév. 14:6, 7.
5. (a) A partir janvier 2006, lor ki kitsoz Réveillez-vous ! pou attire plus l’attention? (b) Ki sa kapav pousse beaucoup dimoune pou faire, ek sa realise ki prophetie?
5 A cause sa, a partir janvier 2006, Réveillez-vous ! pou attire plus l’attention lor Royaume Bondié. Li pou encourage bann lecteur dan enn fason pli direct pou tourne vers la Bible pou gagne bann solution pou zot problem ek li pou attire plus l’attention encore lor l’explication ki la Bible donné lor bann evenement ki pé arrivé dan nou lepok. Dan sa fason-la, bann lecteur pou comprend pli bien signification bann evenement dan nou lepok ek kitfois sa kapav pousse zot pou aprann konn plus lor Jéhovah.—Zek. 8:23.
6, 7. (a) Couma Réveillez-vous ! pou essaye aide beaucoup dimoune pou mette en pratik 1 Thessaloniciens 2:13? (b) Ki interval pou ena entre chaque numero Réveillez-vous ! a partir janvier 2006, ek comié langue pou affecté par sa changement-la?
6 Réveillez-vous ! pou contigne koz lor bann sujet general. Mais, li pou attire plus l’attention lor la Bible. (1 Thess. 2:13) Etant donné ki La Tour de Garde examine bann sujet biblik en profondeur ek ki Réveillez-vous ! pou koz plus lor bann sujet ki basé lor la Bible, li pa parette necessaire pou contigne publié Réveillez-vous ! deux fois par mois. Alors, a partir janvier 2006, Réveillez-vous ! pou publié zis enn fois par mois. Sa vedir ki sa pou faire travail pou prepare, traduire ek envoye nou bann publication vinn pli simple.
7 Sa changement-la pou affecté apepré 40 pourcent bann langue dan ki Réveillez-vous ! apparette. Dan la plupart bann langue, Réveillez-vous ! li deja enn magazine ki publié enn fois par mois ou-soit enn fois toulé-trois mois. Pa pou ena okenn changement pou La Tour de Garde.
8. Couma bann proclamateur kapav presente Réveillez-vous ! ensam avek La Tour de Garde?
8 Bann proclamateur kapav presente numero Réveillez-vous ! ki parette chaque mois avek n’importe ki numero La Tour de Garde pou mem mois. Bann ki presente Réveillez-vous ! pou kapav servi mem numero pendant enn mois entier, sans ki zot bizin change zot presentation au milieu mois-la, pareil couma pé faire asterla.
9. Ki role Réveillez-vous ! pou contigne joué?
9 Depuis so premier numero en 1919, magazine L’Âge d’Or, ki apré finn vinn Consolation, ek zordi Réveillez-vous !, finn joué enn role important dan travail predication. Nou prié ki Jéhovah pou contigne beni distribution sa magazine-la avek so contenu ki’nn revisé ek ki sa pou aide encore plus dimoune dan “tou nation ek tribu ek peuple ek langue” pou tourne vers Royaume Bondié couma zot sel l’espoir.—Rév. 7:9.