Ki ou ti pou reponn?
1. Ki bann difficulté beaucoup parmi nou gagné?
1 Eski ou content Parole Bondié mais ou trouve sa difficile pou rappel bann detail concernant bann recit ki ena dan la Bible ou-soit pou rappel kot-sa dan la Bible dire certain kitsoz bien precis? Eski ou ti pou content ki ou bann zenfant saisi bien bann detail lor bann l’evenement ek bann l’enseignement principal ki ena dan la Bible? “ Que répondriez-vous ? ” ki parette chaque mois lor page 31 dan Réveillez-vous ! kapav aide bann jeune ek bann agé toulé-deux pou konn Parole Bondié pli bien.—Actes 17:11.
2. Couma kapav servi different partie ki ena dan page 31, “ Que répondriez-vous ”?
2 Couma ou kapav servi page 31 dan Réveillez-vous ! dan enn fason efficace? Réveillez-vous ! janvier 2006 ti donne sa bann conseil-la: “Prend enn tipé lé-temps pou examine page 31 . . . Certain partie pou bien interessant pou bann jeune; lezot partie pou testé memoire bann ki pé etudié la Bible depuis inpé pli longtemps. Partie ‘ Situez dans le temps ’ pou permette ou faire enn tableau kot ou pou kapav classe bann personnage dan la Bible dapré lepok kot zot ti vive ek aussi kan bann l’evenement important finn arrivé. Ou kapav trouve bann reponse pou la plupart question ki’nn posé lor page ki indiké dan sa magazine-la; bann reponse-la pou imprimé enba la-haut. Concernant partie ‘ Dans ce numéro, ’ ou pou trouve so reponse dan bann lartik ki trouve dan sa magazine-la-mem. Kifer ou pa faire dé-trois recherche avant ou guette bann reponse ek apré, koz lor seki ou’nn aprann avek lezot? Ou kapav aussi servi page 31, ‘ Que répondriez-vous ?, ’ pou bann discussion biblik en famille ou-soit en group.”
3. Couma certain famille tire profit ar page 31 dan Réveillez-vous ! ek ki partie ladan ou-mem ou pli content?
3 Avredir, beaucoup famille content pou servi sa page-la pou zot l’etude familial. Enn mama ecrire: “Mo mari ek moi, nou ti pensé ki sa ti pou enn bon l’idée pou ajoute partie ‘ Aux enfants de chercher ! ’ dan nou l’etude familial. Sa ti pou permette nou garde l’etude familial vivant ek interessant pou nou tifi trois an. Fodé guetté couma li content pou prend so prop Réveillez-vous ! ek vire chaque page ziska ki li reussi trouve seki li pé rodé!” Enn papa dan Brésil dire: “Mo garson sept an ek moi, nou bien content sa page dan Réveillez-vous !-la. Sa finn aide Moïse pou ecoute bien, pou rod bann verset la Bible, pou comprend bien bann zimage, ek pou comprend bann date.” Ashley, enn tifi huit an, ecrire: “Merci pou ‘ Que répondriez-vous ? ’ ki trouve lor avant dernier page dan Réveillez-vous ! Grace a sa, mo aprann beaucoup kitsoz lor la Bible.”
4. Couma enn famille kapav servi page 31 dan Réveillez-vous ! pendant zot l’etude familial?
4 Kifer ou pa servi sa page-la temps en temps dan ou l’etude familial? Ou kapav servi l’Index ou-soit CD-ROM Watchtower Library pou rod bann reponse pou bann question ki inpé pli difficile. Coumsa, ou pou montré ou zenfant couma pou faire bann recherche. Si ou zenfant enn tipé pli grand, kifer ou pa demann zot rod bann reponse par zot-mem pou bann question ki pli compliké couma seki ena dan partie “ Qui suis-je ? ” ou-soit “ Situez dans le temps. ” Donne zot sa a l’avance. Lerla zot pou kapav partage zot bann recherche pendant l’etude familial. Kan bann parent servi sa page-la dan enn fason efficace, c’est enn fason kot zot kapav enseigne zot zenfant Parole Bondié ek faire sa rentre dan zot la-tête, ek aide zot pou “konn bann l’Ecriture sacré” depuis ki zot encore bien tipti.—2 Tim. 3:15; Deut. 6:7.