Revision Lekol Ministere Theocratik

Nou pou examine bann question ki lor sa feuille-la dan Lekol ministere theocratik pendant semaine ki commence a partir le 25 juin 2007. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 7 mai ziska 25 juin 2007. [Note: Kan pena okenn reference apré bann question, ou pou bizin faire ou prop recherche pou trouve bann reponse.—Guette livre École du Ministère, p. 36-7.]

TECHNIK ORATOIRE

1. Kan nou pé kozé, ki kapav aide nou pou relax ek ameliore qualité nou la-voix? [beF p. 184 § 3–p. 185 § 2] D’abord nou bizin ena enn bon point de vue lor bann dimoune ki pé ecoute nou. Si c’est bann dimoune ki nou joinde dan nou ministere, nou bizin rappel ki zot bizin tann bann l’enseignement ki ena enn grand valeur ki nou koné concernant projet Jéhovah. Ki zot conscient ou-soit non, zot ­bizin sa l’aide-la. Si nou pé faire enn discours dan la Salle du Royaume, nou bizin rappel ki nou pé koz avek bann camarade ki envie ki nou reussi. Deuxiemement, qualité nou ­la-voix pou amelioré si nou detann nou licou, nou la-gorge ek bann muscle nou zepaule.

2. Couma nou kapav “vinn tou kitsoz pou tou sorte qualité dimoune” dan nou ministere? (1 Cor. 9:20-23) [beF p. 186 § 2-4] Enn fason, c’est kan avant mem ki nou koz ar zot, nou remark bann detail ki faire nou koné ki kitsoz ki interesse zot, ki zot bann croyance religieux, ou-soit zot situation familial. Reflechi bien lor presentation ki ou pou servi pou aborde bann dimoune. Li bon ki ou servi enn presentation ki pou touche zot ek aide zot. Nou bizin fixé l’objectif pou prepare bann pensé biblik ki applik ar tou sa bann different qualité dimoune ki nou joinde dan predication-la. (1 Tim. 2:4)

3. Couma nou kapav imite l’exemple Jéhovah kan nou ecoute lezot? (Gen. 18:23-33; 1 Rois 22:19-22) [beF p. 187 § 1-2, 5] Nou kapav faire sa kan nou encourage lezot pou exprime seki zot ressenti ek kan vrai-mem nou ecoute zot kan zot kozé. Apré ki nou’nn pose enn question approprié, nou bizin donne zot assez lé-temps pou reponn. Si nou “pré pou tendé,” sa pou montré ki nou respecté bann pensé ek bann sentiment lezot. (Jacq. 1:19; Rom. 12:10)

4. Dan ki fason pratik nou kapav aide lezot pou faire bann progré spirituel? [beF p. 187 § 6–p. 188 § 3] Kan nou mentionne lezot dan nou la-priere, sa pou pousse nou pou contigne pense zot avek l’objectif pou partage bann l’enseignement biblik ki adapté ar zot bann besoin. Nou kapav aide nou bann etudiant pou faire bann recherche dan nou bann publication pou aide zot pou faire face ar bann zot difficulté. Fodé ki nou toujours ena l’objectif pou laisse Parole Bondié ek so l’esprit motive zot, parski Jéhovah envie ki bann dimoune servi Li avek tou zot leker. (Ps. 110:3)

5. Montré respé pou lezot, kifer eski nou bizin considere sa couma enn kitsoz ki important? [beF p. 190 § 3, l’encadré] Montré respé pou lezot, sa c’est enn kitsoz ki bien ­important pou enn chrétien, ek sa li crée enn l’atmosphere kot bann dimoune pli disposé pou accepté message ki nou pé annoncé. Kan nou respecté lezot, sa kapav enleve bann obstacle ki riské empeche nou koz lor la bonne nouvelle.

EXPOSÉ NO. 1

6. Kifer nou bizin faire zeffort pou touche leker bann ki nou enseigné? [beF p. 59 § 1] Li bien important parski pratik vrai l’adoration pa zis vedir garde en memoire certain point important ek respecté certain reglement. Vrai l’adoration vedir developpe enn bon relation avek Jéhovah ek apprecié tou so bann fason agir. (Deut. 10:12, 13; Luc 10:25-27)

7. Ki l’effet nou l’exemple ena lor bann ki nou enseigné? [beF p. 60 § 4] Nou bann action, c’est enn l’exemple pratik lor couma pou applik bann kitsoz ki nou pé enseigné. Bann zenfant ki imite zot parent envie koné couma sa été kan zot faire seki pareil couma zot parent. Li pareil aussi pou bann ki nou enseigné. Kan zot ‘imite nou, pareil couma nou, nou imite Christ,’ zot commence gagne bann bienfait ki gagné kan marche dan bann chemin Jéhovah. (1 Cor. 11:1)

8. Couma eski dan nou lakaz, nou kapav ameliore nou capacité pou faire bann bon conversation? [beF p. 62 § 3] Pou ameliore nou capacité pou faire bann bon conversation, li bien important ki nou interesse sincerement ar lezot. (Deut. 6:6, 7; Prov. 4:1-4) Enn lot kitsoz important, c’est ki nou ena bann kitsoz ki vaut la peine, pou dire. Nou kapav ena bann bon conversation en famille si nou partage bann point ki nou’nn aprann dan nou program lecture la Bible ek l’etude personnel, bann l’experience interessant ki nou’nn gagné dan predication, ek lezot sujet ki’nn encourage nou.

9. Ki l’exemple courage ek zèle prophete Jérémie inn laissé? [siF p. 129 § 36] Jérémie pa ti peur pou annonce bann dimoune ki pa ti ena okenn respé pou Bondié enn message ki beaucoup pa ti apprecié. Li ti rejette compagnie bann mauvais dimoune. Li ti comprend ki bann dimoune ti bien bizin tann message Jéhovah. Avek tou so leker, li ti faire travail ki Jéhovah ti donne li, ek jamais li ti pense pou arreté. Li ti rann-li compte ki Parole Bondié ti couma enn difé dan so bann lezo; sa-mem ki ti donne li enn grand la-joie dan so leker. (Jér. 15:16, 17; 20:9)

10. Livre Lamentations koz lor confiance en kisannla, mais kifer li bon ki sa livre-la koz lor bann jugement bien severe ki Bondié envoye lor bann mauvais dimoune? [siF p. 132 § 13] Livre Lamentations montré confiance total ki Jérémie ti ena en Bondié. Sa bizin pousse tou bann vrai adorateur pou obeir ek reste fidel. En mem temps, pou bann ki mank respé pou pli grand nom ki existé ek pou so signification, li enn l’avertissement ki faire peur. Sa livre-la vrai-mem utile parski li montré nou couma Bondié pou puni dan enn fason severe bann dimoune ki ena la tête dur, ki rebelle ek ki pa’lé repenti.

LECTURE LA BIBLE TOULÉ-SEMAINE

11. En accord avek l’experience ki Jérémie inn faire, ki nou kapav lire dan Jérémie 37:21, ki l’assurance nou kapav ena? Jéhovah ti soutenir Jérémie kan bann l’ennemi ti entoure Jérusalem, kan bann dimoune ‘ti mange di-pain par poids ek avek tracas’ ek kan certain femme ti mem mange la chair zot prop zenfant. (Ézék. 4:16; Lam. 2:20) L’experience ki Jérémie inn faire, donne bann fidel serviteur Jéhovah l’assurance ki Li kapav soutenir nou pendant sa bann dernier jour-la ziska ­Har–Maguédôn, mem kan bann situation kapav parette sans okenn l’espoir.

12. Kifer eski kitfois Barouk ti dire ki Jéhovah ti ‘ajoute tristesse ar so douleur,’ seki ti faire li ‘fatigué,’ ek kan li ti gagne sa problem-la, ki ti so premier reaction? (Jér. 45:1-5) Kitfois Barouk ti chagrin ek ti fatigué parski bann Juif ti tardé pou reagir. Pendant plusieurs l’année zot ti ignore bann l’avertissement ki Jéhovah ti pé contigne donne zot, ek zot ti contigne pratik l’apostasie. Alors Barouk ti commence ‘rod bann grand-grand kitsoz pou li-mem,’ kitfois bann di-bien ek securité lor plan materiel ou-soit mem enn grand position. Avek amour, Jéhovah ti rappel li ki malheur ti derriere la porte. Alors, pa ti enn lepok pou li rod bann kitsoz ki touffe so spiritualité.

13. Depuis kan eski finn nepli ena okenn habitant dan Babylone, ek ki li’nn vinn “enn l’endroit kot nepli ena nanyin ditou”? (Jér. 50:13) Apré l’année 140 a.n.l., la terre tout autour Babylone ti rempli ar di-sel mineral ek alcali, a cause sa pa ti kapav plante nanyin. Apepré 200 an plitar, Babylone ti encore enn la-ville kot ti ena beaucoup habitant, mais li pa’nn reste coumsa pendant longtemps. (1 Pierre 5:13) Vers troisieme siecle n.l., historien Dion Cassius (vers 150-235 n.l.) ti dire ki enn visiteur ti trouve zis “bann la digue ek bann roche ek bann ruine” dan Babylone.

14. Ki principe concernant la priere nou trouve bien dan Lamentations 3:8, 9, 42-45? En l’année 607 a.n.l., Jéhovah pa ti ecoute la priere bann Juif ki pa ti oulé changé. Pou ki Jéhovah reponn nou la-priere, nou bizin obeir Li ek montré ki nou repenti avek tou nou leker. (Prov. 28:9)

15. Ki sa char ki decrire dan Ézékiel chapitre 1, li representé?Sa char ki extraordinaire-la, represente l’organisation Jéhovah ki invisible, setadir tou bann creature spirituel Bondié ki fidel. La Bible dire ki Jéhovah conduire sa char-la. Sa vedir ki Li servi sa pou realise so projet. (Ps. 103:20; Ézék. 1:22, 25, 26, 28) Sa char-la realise volonté Jéhovah bien-bien vite ek li bouge dan n’importe ki direction kot l’esprit Bondié pousse li pou allé. (Ézék. 1:12, 14)