Revision Lekol ministere theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 27 août 2007. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 2 juillet ziska 27 août 2007.
TECHNIK ORATOIRE
1. Couma nou kapav montré respé envers lezot dan predication ek dan congregation? [beF p. 192 § 2-4] Kan nou pé preche avek bann dimoune, nou bizin evite corrige seki zot dire, vite-vite, ek nou bizin montré respé kan nou ecoute zot avek patience ek kan nou prend compte zot sentiment. (1 Pierre 3:15) Dan congregation, nou montré respé kan nou garde dan nou l’esprit ki nou bann frere content Jéhovah ek zot envie servi Li. Bann ki pé ecouté pou senti ki nou respecté zot si nou dire “nou” kan nou pé applik bann verset biblik ek kan nou evite touletan servi mot “zot.”
2. Si nou envie koz avek conviction, ki kitsoz ki bien important? [beF p. 196 § 1-3] Pou bann dimoune trouvé ki nou pé koz avek conviction, li bien important ki nou sur ki seki nou pé dire li la verité ek nou bizin koz avek nou leker. Pou montré ki nou sur ki seki nou pé dire ena valeur pou bann ki pé ecouté, nou bizin comprend nou sujet ek servi nou prop mot kan nou pé presente li.
3. Cite certain suggestion ki pou aide nou pou koz avek tact kan nou pé preché? [beF p. 198 § 1-5] Essaye commence conversation lor enn sujet ki interesse dimoune ki pé ecouté-la. Montré ki ou interessé ar seki li dire ek seki li pensé. Sa pou aide ou pou ena enn conversation avek dimoune-la au lieu ki nou faire enn sermon ar li. Nou kapav demann nou-mem, ‘Couma bann dimoune considere seki mo pé dire zot?’ Sa kapav aide nou pou servi nou bon jugement ek evite crée enn barriere inutile. (Prov. 12:8)
4. Kifer eski ena tact vedir choisir bon moment pou dire bann kitsoz kan nou pé preché? (Prov. 25:11) [beF p. 199 § 1-3] Mem si nou pa d’accord avek tou seki sa dimoune-la dire, pa necessaire ki dé-suite nou rente dan enn grand debat avek li lor tou seki li dire ki pa en accord avek la Bible. (Jean 16:12) Ena patience, ek pa reagir vite kan bann dimoune souleve bann l’objection. Garde ou calme ek considere sa couma bann l’occasion pou comprend plus seki dimoune-la pensé.
5. Couma nou kapav presente nou bann sujet dan enn fason encourageant? [beF p. 203 § 3–p. 204 § 1] Si nou ena confiance ki nou bann compagnon chrétien envie faire Jéhovah plaisir, nou pou montré sa confiance-la par seki nou dire ek fason ki nou dire li. (1 Thess. 4:9, 10; 2 Thess. 3:4, 5) Mem kan nou bizin faire enn sujet pou donne enn conseil, kapav presente sujet-la dan enn fason encourageant si nou mette l’accent surtout couma nou kapav evite enn mauvais conduite ek couma bann principe Jéhovah kapav protege nou. (Ps. 119:1)
EXPOSÉ NO. 1
6. Ki nou kapav dire concernant redaction livre Ézékiel, eski li enn livre ki vrai-mem finn inspiré par Bondié, ek ki preuve nou ena pou prouve sa? [siF p. 133 § 3] Livre Ézékiel ti forme partie dan bann livre la Bible ki finn reconette couma vrai ek inspiré dan lepok Ezra ek li apparette dan bann livre dan commencement lepok chrétien, surtout dan canon Origène. Nou kapav prouvé ki li inspiré par Bondié parski bann l’exemple symbolik ki trouve dan livre Ézékiel ressemblé bann ki trouve dan livre Jérémie ek Révélation.
7. Ki qualité bien important pou ki enn kikenn endure bann situation injuste? [wF 05 1/6 p. 29 § 4] Li bizin ena l’humilité. Li pou bien difficile pou kikenn ki ena enn trop grand l’opinion lor li-mem, tolere bann mauvais traitement. Nou bizin faire zeffort pou imite Jésus, ki ti “abaisse li-mem, ek li ti obeir ziska la mort.” (Phil. 2:5, 8) Nou bizin aussi aprann pou considere lezot couma “pli superieur” ki nou, ek prend compte zot l’interet avant nou prop l’interet. (Phil. 2:3, 4)
8. Ki nou aprann dan reponse ki Jésus ti rann bann Sadducéen kan zot ti pose li question lor resurrection? (Luc 20:37, 38) [beF p. 66 § 4] Jésus ti konn l’opinion bann Sadducéen. Li ti koné ki en realité zot pa ti croire dan resurrection. Alors li finn reponn zot question dan enn fason ki ti prend en consideration fausse l’opinion ki zot ti ena ek ki ti pousse zot pou pose sa question-la. Par enn bon raisonnement ek enn recit biblik ki zot ti bien koné, Jésus ti attire l’attention lor enn kitsoz ki jamais pa finn consideré avant. Li’nn donne enn preuve ki sur ki Bondié vrai-mem pou ressuscite bann ki’nn mort.
9. Kan enn etudiant la Bible ou-soit enn compagnon chrétien demann ou ki li bizin faire dan enn certain situation, couma ou bizin reponn? [beF p. 69 § 4-5] Chaque dimoune responsable pou bann prop decision ki li prend dan la vie. (Gal. 6:5) Enn dimoune ki prend bann decision zis pou faire plaisir sa kikenn ki faire so l’etude-la ou-soit enn lot dimoune, en realité li pé servi bann zom, li pa pé vive par la foi. (Gal. 1:10) Alors, pou aide li trouve reponse so question, li pli bon ki nou attire so l’attention lor bann principe ek bann l’exemple biblik approprié ek demann li si li trouve kitsoz ki kapav aide li pou prend enn bon decision.
10. Kan la Bible dire ki nou bizin “renouvelé dan la force ki motive zot l’esprit,” ki sa impliké? (Éph. 4:23) [beF p. 74 § 4] Pou nou kapav ‘mette lor nou la nouvelle personnalité’ nou bizin developpe enn l’attitude mental solid ki en accord avek l’attitude mental Bondié ek Jésus Christ. (Éph. 4:23, 24) Sa vedir ki touletan nou en contact avek bann pensé Jéhovah ek Jésus. Kan nou etudié bann l’Evangile, nou bizin considere sa bann recit lor la vie Jésus-la couma enn model pou nou suive. Nou bizin essaye discerne bann qualité precis ki Jésus ti manifesté ek faire enn grand zeffort pou imite li. (1 Pierre 2:21)
LECTURE LA BIBLE TOULÉ-SEMAINE
11. Dan Ézékiel 9:2-4, sa zom ki ena enn linge en lin-la, ki li representé, ek ki sa ‘marque lor front-la’ prouvé? [wF 88 15/9 p. 14 § 18] Sa zom ki ena enn linge en lin-la represente tou bann chrétien oint lor la terre zordi. Zot mette enn marque symbolik lor tou bann ki forme partie dan “la grande foule,” ki “pé plaigné” a cause bann kitsoz detestable ki’nn faire dan la chrétienté. (Rév. 7:9, 10, 14) Si enn kikenn ena sa ‘marque-la,’ sa li enn preuve ki li voué, baptisé ek li ena personnalité chrétien.
12. Dapré Ézékiel 13:3, kifer eski bann chef religieux la chrétienté zot pareil couma “bann prophete ki bet ek ki [ti] marche dapré zot prop l’esprit”? [wF 99 1/10 p. 13] Pareil couma bann grand-grand chef religieux ki ti ena enn grand l’influence dan lepok Ézékiel, bann chef religieux dan la chrétienté pa averti bann dimoune ki Bondié so jugement pré pou vini. Zot pa expliké ki Royaume Bondié ki’nn etabli, bientot pou prend compte seki bann zom pé faire. (Dan. 2:44) Alors ki zot dire soi-disant ki zot koz au nom Bondié, zot dire zot bann fidel seki bannla envie tendé.
13. Ki bann Israélite ti pé rod faire kan zot ti pé prononce “proverbe” ki trouve dan Ézékiel 18:2, ek ki leson important concernant compte ki nou ena pou rendé, nou trouve bien ladan? [wF 88 15/9 p. 18 § 10] Bann Israélite ti pé essaye justifié zot-mem devant bann mauvais condition ki nation Israël ti pé koné. Zot ti pretann ki zot ti pé recolté bann consequence a cause mauvais conduite zot bann ancetre. Mais Ézékiel ti montré bien ki chaque dimoune ti responsable so prop conduite ek ti pou bizin rann compte Jéhovah. (Ézék. 18:20, 27-30)
14. Dan ki sens Ézékiel ti ‘arrete kozé’ pendant lepok kan bann l’ennemi ti entoure Jérusalem ek ti detruire li? (Ézék. 24:27; 33:22) [wF 03 1/12 p. 29] Ézékiel pa ti vrai-mem perdi la parole. C’est zis ki li pa ti ena nanyin pou dire encore concernant Jérusalem kan Jéhovah ti pé faire so jugement. Mais, li ti prononce bann message condamnation kont bann l’ennemi Bondié ki ti content kan zot ti trouve Jérusalem tombé. (Ézék., chap. 25-32) Plitar, kan parole ki Jérusalem inn detruire ti’nn arrive Babylone, Ézékiel ti annoncé ki Jérusalem ti pou retabli.
15. Kisannla “Gog ki sorti dan pays Magog” ek kan eski li senti-li poussé pou detruire peuple Jéhovah? (Ézék. 38:2, 16) [wF 97 1/3 p. 14 § 1–p. 15 § 3] Li clair ki Gog de Magog represente Satan le Diable depuis ki finn tire li dan le ciel ek ki li trouve dan voisinage la terre. (Rév. 12:13, 17) Apré ki Babylone la Grande fini detruire, li pou rassemblé bann nation, ek li pou attak tou lé-peuple Jéhovah ki parette sans okenn defense. (Ézék. 38:4-6, 8, 11, 15; Rév. 17:12-14) Sa l’attak-la pou declenche Har–Maguédôn, kot Jéhovah pou justifié so souveraineté ek delivré so peuple. (Ézék. 38:21-23)