Revision Lekol Ministere Theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 29 octobre 2007. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 3 septembre ziska 29 octobre 2007.
TECHNIK ORATOIRE
1. Kifer eski repetition li enn bon methode l’enseignement? [beF p. 206 § 1-2, l’encadré] Repetition aide nou pou rappel. Nou kapav servi sa method-la pou mette l’accent lor bann point principal ek aide nou l’auditoire pou comprend sa bann point-la bien. Nou l’objectif c’est pou donne bann ki ecoute nou, bann l’information ki zot pou kapav servi. Si zot pa rappel seki nou dire, nou bann parole pa pou ena okenn l’influence lor seki zot croire ek lor zot conduite.
2. Dan ki fason nou kapav mette l’accent lor theme enn sujet? [beF p. 210, l’encadré] D’abord, choisir bann point important ki aide ou pou developpe theme-la. Apré, reflechi kan ek couma ou pou mette l’accent lor ou theme, ek assure-ou ki ou mentionne li toute longue ou sujet. Pendant ou sujet repete bann mot ou-soit bann l’idée principal ki ena dan theme-la.
3. Ki bann point principal enn sujet, ek ki kitsoz pou guide enn orateur kan li choisir sa bann point-la? [beF p. 212 § 1-3] Bann point principal, zot bann l’idée important ki ou bizin developpé pou ki ou reussi faire ressorti l’objectif sa sujet-la. Bann point important ki ou pou choisir ek fason ki ou pou servi zot pou depann lor ou l’auditoire ek l’objectif sa sujet-la. Nou bizin garde bien dan nou l’esprit nou l’objectif kan nou pé koz ar enn certain l’auditoire, ek choisir zis bann l’information ki vrai-mem approprié.
4. Kifer fodé pa nou ena trop beaucoup point principal dan enn sujet? [beF p. 213 § 3-5] Zis dé-trois point principal necessaire pou developpe n’importe ki theme. Si nou ena trop beaucoup point, sa pou empeche nou pou developpe tou couma bizin. Kan nou developpe zis dé-trois point, bann ki pé ecouté gagne le temps pou examine chaque point, ek sa pou reste bien gravé dan zot l’esprit.
5. Kifer li important ki nou l’introduction capté l’interet bann ki pé ecouté, ek couma nou kapav faire sa? [beF p. 215 § 1; p. 216 § 1-3, l’encadré] C’est nou l’introduction ki pou faire dimoune decidé si zot pou ecoute nou ek ki quantité zot pou ecouté. Bann question ki faire bann dimoune reflechi ek ki faire zot reponn question-la zot-mem dan zot l’esprit, sa-mem ki pou eveille zot l’interet. Enn l’experience réel kapav capté zot l’attention, mais li bizin aussi pose enn fondement pou certain point important ki nou pou developpé apré dan nou discours. Si li approprié pou sa sujet-la, ou pou kapav capté l’interet si ou mentionne enn kitsoz ki’nn fek dire dan l’information ou-soit enn kitsoz ki’nn ecrire dan enn journal.
EXPOSÉ NO. 1
6. Couma eski Psaume 119:89, 90 aide nou pou comprend ki nou kapav compte lor parole Bondié? [wCE 05 1/5 p. 8 § 3] Grace a parole Bondié—so “bann la-loi ki gouverne le ciel”—soleil, la lune ek bann zetoile suive zot chemin couma bizin, ek la terre finn fixé pou touletan. (Job 38:31-33; Ps. 104:5) Nou kapav compte lor tou parole ki sorti dan la bouche Jéhovah; tou seki Li dire “pou reussi” pou ki so bann projet realisé. (Is. 55:8-11)
7. Lor ki kitsoz livre Ézékiel mette l’accent, ek ki resultat bann ki sanctifié nom Jéhovah dan zot la-vie, pou gagné? [siF p. 138 § 33] Prophetie Ézékiel faire nou koné ki sanctification nom Jéhovah pli important ki tou lezot kitsoz. (Ézék. 36:23) Jéhovah pou faire so nom vinn saint kan Li pou detruire tou bann ki sali sa nom-la. Bann ki sanctifié Jéhovah zordi dan zot la-vie kan zot adore Li couma Li demann zot, pou gagne guerison ek la vie eternel grace a sa la-riviere ki sorti dan so temple-la.
8. Couma “parole Jéhovah” kapav protege nou leker? (Ps. 18:30) [wF 05 1/9 p. 30 § 2] Kan dan desert, Jésus ti dementi seki Satan ti dire, li pa ti zis envie laguerre lor bann mot pou montré kisannla pli koné. Kan li ti servi bann l’Ecriture pou defann li, Jésus ti koz avek so leker, ek c’est a cause sa ki bann manigance Satan, ki ti bien marché dan jardin Éden, pa ti marché avek Jésus. (Luc 4:1-13) Si nou rempli nou leker avek bann parole Jéhovah, bann manigance Satan pa pou reussi marché avek nou aussi.
9. Couma eski livre Daniel mette l’accent lor l’esperance Royaume Bondié? [siF p. 143 § 23] Livre Daniel presente Bondié Jéhovah couma Souverain supreme ki etabli enn Royaume ki jamais pa pou detruire. (Dan. 2:19-23, 44; 4:25) Livre Daniel presente Jéhovah couma ‘l’Ancien des jours’ ki juge bann dimoune ek bann nation dapré zot position envers so Royaume, ek li donne “enn kikenn ki ressemblé garson enn zom . . . domination, grandeur ek enn royaume” pou touletan. “Bann saint sa Supreme-la” partage Royaume Bondié avek Jésus Christ, “Fils de l’homme.” (Dan. 7:13, 14, 18, 22; Mat. 24:30; Rév. 14:14) Li-mem Mikaël, grand prince ki servi so pouvoir en tant ki le roi sa Royaume-la pou crase ek detruire tou bann royaume sa vié lé-monde-la. (Dan. 2:44; 12:1; Rév. 12:7-10)
10. Couma eski livre Hoshéa fortifié nou la-foi dan bann prophetie ki Jéhovah finn faire ecrire dan la Bible? [siF p. 145 § 14] Tou seki Hoshéa ti prophetisé concernant Israël ek Juda ti realisé. Bann nation tout autour bann amant Israël ki ti adore bann idole, ek ki avant ti content li avek passion, ti abandonne li asterla, ek Israël ti recolté enn destruction total ar l’Assyrie en 740 a.n.l. (2 Rois 15:20; 17:3-6, 18; Hosh. 8:7-10) Jéhovah ti montré so misericorde envers Juda ek ti sap li, pa par bann puissance militaire, mais par enn ange ki ti touye 185,000 Assyrien. (2 Rois 19:34, 35; Hosh. 1:7) Bann prophetie ki Hoshéa ti annoncé concernant retablissement ti realisé kan Jéhovah ti rassemblé Juda ek Israël ek ti faire zot sorti dan pays kot zot ti en exil, en 537 a.n.l. (Ezra 2:1; 3:1-3; Hosh. 1:10, 11; 2:14-23; 3:5; 11:8-11; 13:14; 14:1-9)
LECTURE LA BIBLE TOULÉ-SEMAINE
11. Dan enn vision, Ézékiel ti trouve enn zom ki pé mesure temple. Ki sa representé, ek ki l’assurance sa donne nou zordi? (Ézék. 40:2-5) [wF 99 1/3 p. 9 § 6; p. 14 § 7] Sa vision-la ti donne l’assurance bann Juif ki ti al en exil, ki vrai l’adoration ti pou retabli completement dan temple Bondié. Sa ti aussi enn garanti ki Bondié ti donné ki sa vision-la vrai-mem ti pou realisé. Zordi, nou ena l’assurance ki nanyin, pa mem bann grand l’opposition ki nou gagné ar bann gouvernement bien puissant, pa pou empeche vrai l’adoration retabli.
12. Dan realisation final vision Ézékiel, kisannla ‘sa chef-la’? (Ézék. 48:21) [wF 99 1/3 p. 15-16 § 13-15; p. 22-3 § 19-20] ‘Sa chef-la’ represente enn group zom ki ena l’esperance pou vive lor la terre ek ki pou aidé pou dirige la terre dan le monde nouveau. (Ézék. 45:8, 9) Pendant plusieurs dizaine l’année, bann ancien ki bann chrétien oint, finn forme sa groupe ki pé augmenté-la. Alors ki bann 144,000 pou dirigé avek Jésus Christ dan le ciel, sa groupe-la pou travail enba direction sa Royaume-la, ek zot pou donne bann dimoune l’instruction ki bizin.
13. Ki signification Daniel 2:21? [wF 98 15/9 p. 12 § 9] Mem si Jéhovah pa responsable directement pou tou bann victoire ou-soit tou bann changement gouvernement, Li ena capacité pou etabli ek enleve bann dirigeant. Li faire sa dan l’heure ki Li’nn fixé ek dapré so prop volonté.
14. Kifer eski Jéhovah ti considere Daniel couma enn “kikenn ki bien desirable”? (Dan. 9:23) [dpF p. 185 § 12; wCE 04 1/8 p. 22 § 17] Daniel ti bien decidé pou reste attaché ar vrai l’adoration mem si li ti gagne bann l’epreuve ki ti mette so la-vie en danger. (Dan. 1:8; 2:12, 13; 6:8-11) Li ti prié Jéhovah regulierement. Li ti etudié Parole Bondié ek So bann projet, ek li ti medite lor la. (Dan. 9:1, 2) Li ti mette l’accent lor la justice Bondié, ek avek humilité li ti reconette so bann prop faute. (Dan. 9:7, 14, 16, 20)
15. Dan ki sens pa ti ena okenn “connaissance Bondié dan pays” Israël, ek couma sakenn parmi nou bizin considere sa bann parole-la? (Hosh. 4:1, 2, 6) [wCE 05 1/12 p. 11 § 21; jdF p. 57-8 § 5; p. 61 § 10] Sa pa vedir ki bann Israélite pa ti konn nanyin lor Parole Bondié, mais “zot ti vinn satisfait ar seki zot ti’nn gagné ek zot leker ti commence prend grandeur.” (Hosh. 13:6) Parski zot ti satisfait avek bann bien materiel ki zot t’inn gagné, zot pa finn agir en accord avek “connaissance Bondié.” (Hosh. 4:1, 2) Zordi, nou bizin prend sa bann parole-la couma enn l’avertissement pou nou. Fodé pa nou laisse nou l’amour pou Bondié diminué parski sa kapav amenn nou pou desobeir bann principe Jéhovah.