Travail ki faire nou gagne plus la joie
1. Dan nou lepok ki travail pé faire, pou aide bann dimoune konn Jéhovah?
1 Bann ki ti temoin enn guerison physik dan premier siecle ti ressenti enn grand la joie dan zot leker. (Luc 5:24-26) Dan nou lepok, nou content kan nou participe dan travail pou aide lezot konn Jéhovah. (Rév. 22:1, 2, 17) Sa faire nou enn grand plaisir kan nou lire bann l’experience ki raconté couma Parole Jéhovah ek l’esprit saint inn transforme la vie bann dimoune! Mais ki kitsoz faire nou gagne plus satisfaction encore? C’est kan nou participe dan sa travail-la kan nou faire enn l’etude la Bible ki pé progressé.
2. Ki la joie nou gagné kan nou enseigne enn dimoune la verité?
2 Couma Bondié appelé? Kifer Li permette souffrance? Ki Royaume Bondié pou faire pou bann dimoune? Sa faire nou enn grand plaisir pa zis pou reponn sa bann question-la mais aussi kan nou trouve la joie lor figure nou etudiant kan li aprann la verité. (Prov. 15:23; Luc 24:32) A mesure ki enn etudiant progressé, li commence servi nom Jéhovah. Li change so fason habillé ek coiffé, li arrete bann pratik ki faire li di-tort, ek li commence preche avek lezot. Si li progressé ziska ki li voué so la vie ar Jéhovah ek li prend bapteme, li pou vinn nou frere ek nou compagnon travail. Sakenn parmi sa bann l’etape positif ki li faire-la c’est bann kitsoz ki faire nou ena enn grand la joie.—1 Thess. 2:19, 20.
3. Ki bann kitsoz pratik nou kapav faire pou commence enn l’etude la Bible?
3 Eski ou aussi ou pou gagne la joie? Si ou envie participe dan sa travail ki faire nou gagne plus la joie-la, demann Jéhovah aide ou gagne enn l’etude la Bible, ek apré faire zeffort pou travail en accord avek ou la priere. (1 Jean 5:14) Preché kot ena dimoune ek kan ena dimoune. Chaque l’occasion ki ou gagné, offert enn l’etude la Bible. (Eccl. 11:6) Kan ou joinde enn dimoune ki interessé ek ou plante enn la grain la verité, retourné pou arrose li.—1 Cor. 3:6-9.
4. Kifer nou bizin offert bann l’etude la Bible avek enn sentiment ki pa reste beaucoup le temps encore?
4 Ena encore beaucoup-beaucoup dimoune ki pé faim ek soif la justice. Kisannla pou aide zot pou satisfaire besoin ki zot ena pou konn Jéhovah? Kisannla pou etudié la Bible avek zot? (Mat. 5:3, 6) Anou disposé pou offert nou l’aide pou complete travail predication ek l’activité pou faire bann disciple avant ki travail recolte fini.—Is. 6:8.