Ki Ou Kapav Fer pou Viv dan sa Nouvo Lemond-la?

Bann lartik avan finn montre ki Bondie pou detrir bann move dimounn ek tou bann problem ki ena dan sa lemond-la. Nou kapav sir ki sa pou arive. Kifer? Parski Bondie finn promet dan so Parol, Labib:

“Lemonn . . . pe al fini.”—1 ZAN 2:17.

Nou kapav sir ki pou ena bann dimounn ki pou sirviv parski verse-la kontigne ek li dir:

“Bann ki fer volonte Bondie pou viv pou touzour.”

Alor, si nou anvi sirviv, nou bizin fer volonte Bondie. Pou kone ki ete volonte Bondie, nou bizin aprann konn Bondie avan.

OU KAPAV SIRVIV LAFIN SA LEMOND-LA KAN OU “APRANN KONN” BONDIE

Zimaz: 1. Dan enn lopital, enn ners ki’nn fatige ek dekouraze pe asiz anba. 2. Li pran enn poz ek li trouv so koleg travay ki pe lir enn magazinn avek enn sourir. 3. Koleg-la lir enn verse Labib avek li ek donn li enn kart vizit jw.org.

Zezi ti dir: “Samem ki vedir lavi eternel, ki zot aprann konn twa, sel vre Bondie.” (Zan 17:3, NW) Pou sirviv lafin sa lemond-la ek viv pou touletan, nou bizin “aprann konn” Bondie. Se pa zis krwar dan Bondie ek konn de-trwa kitsoz lor li, me nou bizin vinn so kamarad. Si nou anvi ki nou lamitie vinn for avek enn kamarad, nou bizin pas letan avek li. Nou lamitie avek Bondie osi parey. Anou get de-trwa lansegnman inportan ki ena dan Labib, ki pou ed nou devlop ek gard enn lamitie ar Bondie.

Bann Lansegnman Ki Nou Kapav Aprann dan Labib

Nou aprann ki Bondie ti anvi ki nou viv dan Paradi.

Li ti kree bann premie dimounn, Adan ek Ev, ek ti met zot dan enn zoli landrwa ki apel zardin Edenn. Zot ti parfe, ek Bondie ti donn zot tou seki zot bizin pou ki zot kapav profit enn zoli lavi. Zot ti pou kapav viv pou touletan. Tanki zot ti res kamarad ar Bondie, zame zot ti pou mor. Me zot ti swazir pou dezobeir enn sinp ti komannman ki Bondie ti donn zot.

Nou aprann kifer nou pe soufer.

Adan, premie zom ki Bondie ti kree, ti perdi posibilite pou viv pou touletan ek ti anpes limanite osi gagn sa posibilite-la kan li ti dezobeir Bondie. Labib dir: “Par enn zom pese finn vinn dan lemonn, e lamor finn rantre par pese, e lamor finn tous tou dimoun.” (Romin 5:12) Parey kouma enn dimounn kapav erit enn maladi ar so paran, tou bann zanfan Adan inn erit linperfeksion ar li. Rezilta: nou vinn vie ek nou mor.

Nou aprann seki Bondie finn fer pou ed nou.

Labib dir: “Bondie finn telman kontan lemonn, ki li finn donn so Sel Garson pouki tou dimoun ki krwar dan Li, pa mor me gagn lavi eternel.” (Zan 3:16) Bondie ti avoy Zezi lor later pou donn so lavi pou nou. Konsernan sa aksion ki ranpli ar lamour la, Prabhakar, enn misie 86-z-an ki res dan Lenn, dir: “Sa montre ki kantite Zeovaa kontan mwa. So lamour inn donn mwa lespwar pou kapav viv pou touletan.”

Nou aprann kouma nou kapav montre nou rekonesans pou seki Bondie inn fer pou nou.

Labib dir ki nou kapav montre nou rekonesans pou seki Bondie inn fer pou nou kan nou “gard so komannman.” (1 Zan 2:3) Zeova montre nou avek boukou lamour seki nou kapav fer pou profit lavi depi asterla mem. (Izai 48:17, 18) Bondie pa anvi ki nou soufer. Li promet nou ki, si nou obeir so bann komannman, nou pa pou zis profit enn zoli lavi asterla, me nou pou gagn posibilite pou viv pou touletan.

LIR PAROL BONDIE, LABIB, TOULEZOUR

Pandan so poz midi, ners-la pe get lesiel apre ki li’nn lir so Labib. — Ou kapav sirviv lafin sa lemond-la kan ou priye Bondie pou ed ou ek kan ou fer seki Li anvi

Toulezour, nou bizin manze pou res vivan. Me Zezi ti dir: “Dimoun pa viv zis ar dipin me ar tou bann parol ki sorti dan labous Bondie [Zeova, NW].”—Matie 4:4.

Azordi, nou kapav trouv bann parol Zeova dan Labib. Amezir ki ou etidie sa liv sakre la, ou pou aprann bann lansegnman inportan konsernan seki Bondie inn fer dan lepase, seki Li pe fer asterla, ek seki Li pou fer dan lavenir.

PRIYE BONDIE POU GAGN LED

Ki ou kapav fer si ou anvi obeir Bondie me ou trouv sa difisil pou aret fer bann move kitsoz? Si ou konn Bondie bien, sa kapav vremem ed ou.

Anou get lexanp enn madam ki nou pou apel Sakura. Sakura ti ena enn lavi imoral. Kan li ti koumans etidie Labib, li ti aprann ki Bondie ti donn lord pou “sove devan limoralite sexiel.” (1 Korintien 6:18) Sakura ti priye Bondie pou gagn lafors ek li ti reisi aret fer sa bann move kitsoz-la. Me li ti bizin kontign reziste kont bann tantasion. Li dir: “Si bann panse imoral vinn dan mo latet, mo dir Zeova tou dan mo lapriyer parski mo kone ki mo pa pou kapav fer fas ar sa zis mo tousel. Lapriyer inn ed mwa pou vinn pli pros ar Zeova.” Parey kouma Sakura, bann milyon dimounn pe aprann konn Bondie. Bondie pe donn zot lafors ki zot bizin pou zot kapav fer bann sanzman dan zot lavi ek viv dan enn fason ki fer Li plezir.—Filipien 4:13, NW.

Plis ou aprann konn Bondie, plis Li pou ‘konn ou’ kouma so bon kamarad. (Galat 4:9; Psom 25:14, NW) Lerla, ou pou kapav viv dan nouvo lemond Bondie. Me, kouma sa nouvo lemond-la pou ete? Prosin lartik pou koz lor la.

a Dan Labib, nom Bondie se Zeova.