Eski To Ti Kone?

Dan lepok Biblik, kifer bann Izraelit ti bizin pey enn dot?

DAN lepok Biblik, kan de fami ti aksepte ki zot zanfan marye, lemarye ouswa so fami ti bizin pey enn dot fami lamarye. Sa dot-la ti kapav bann kitsoz ki ena valer, bann zanimo, ouswa larzan. Parfwa, sa dot-la ti kapav osi enn sertin letan travay. Par exanp, Zakob ti travay set-an pou so boper pou ki li kapav marye ar Rashel. (Zen. 29:17, 18, 20) Kifer ti bizin pey enn dot?

Enn Biblis ki apel Carol Meyers, dir: “Dan sertin fami [planter] kan enn tifi ti marye, se koumadir so fami ti perdi enn zouvriye. Sa dot-la ti koumadir enn konpansasion pou ranplas lapert sa tifi-la.” Enn dot ti osi ranforsi lamitie ki ena ant fami lemarye ek fami lamarye. Gras-a sa lamitie-la, sa de fami-la ti kapav ed zot kamarad dan bann moman difisil. Anplis, sa dot-la ti enn prev ki sa tifi-la ti fianse, ek ki asterla, se so mari ki ti pou pran li swin, pa so papa.

Me kan ti pey enn dot, sa pa vedir ki sa tifi-la ti enn kitsoz ki ti kapav aste ouswa vande. Liv Ancient Israel​—Its Life and Institutions, dir ki ‘kan ti pey enn dot fami lamarye, kitfwa sa ti paret koumadir pe aste enn kitsoz. Me an realite, ti konsider sa dot-la kouma enn konpansasion pou fami lamarye, pa kouma enn pri ki’nn peye pou aste sa tifi-la.’

Azordi, dan sertin pei, bann dimounn ankor pey enn dot kan zot marye. Kan bann paran Kretien rod enn dot avek enn fami, zot montre “ki zot bann dimounn rezonab” kan zot pa demann enn dot ki exazere. (Fil. 4:5, NW; 1 Kor. 10:32, 33) Kan zot fer sa, zot montre ki zot pa kontan kas ek ki zot pa materyalis. (2 Tim. 3:2) Anplis, kan bann paran Kretien pa demann enn dot ki exazere, lemarye pa pou bizin pous dat so maryaz ziska ki li ena ase kas pou pey sa dot-la. Ouswa, si garson-la enn pionie permanan, li pa pou bizin aret so servis parski li bizin travay full-time pou pey sa dot-la.

Dan sertin pei, se bann lotorite ki fixe montan enn dot. Dan sa bann pei-la, bann paran Kretien bizin swiv sa bann lalwa-la. Kifer? Parski Labib dir ki bann Kretien bizin “obeir lotorite ki dirize,” ek ki zot bizin obeir bann lalwa ki pa kont bann lalwa Bondie.​—Rom. 13:1; Zist. 5:29.