‘Bienere Bann Ki Res Fidel’ Ar Zeova

1-2. (a) Kouma sertin gouvernman inn persekit pep Bondie, ek kouma pep Bondie inn reazir? (b) Kifer nou kapav ere mem si nou pe gagn persekision? (Get zimaz lor kouvertir.)

AZORDI, nou laktivite interdi ouswa lor restriksion dan plis ki 30 pei dan lemond antie. Dan sertin parmi sa bann pei-la, bann lotorite inn mem met nou bann frer ek ser dan prizon. Pou Zeova, zot pa’nn fer nanye de mal. Zot inn zis lir ek etidie Labib, partaz zot krwayans ar lezot, ek asiste bann renion ansam ar bann lezot Kretien. Zot inn osi refiz pou pran par dan bann zafer politik sa lemond-la. Mem si zot inn gagn bann gran persekision, sa bann serviter Zeova la pa’nn bes lebra ek zot inn kontign res fidel ar Zeova. Ek zot ere ki zot inn fer sa!

² Sirman to’nn remark sourir sa bann Temwin-la lor bann foto. Zot ere parski zot inn res fidel ar Zeova ek zot kone ki zot inn fer so leker kontan. (1 Kro. 29:17a) Zezi ti dir: “Bienere zot ki dimoun pe persekite akoz zot fer dibien . . . Zot bizin dan lazwa e santi zot ere parski zot ena enn rekonpans dan lesiel.”​—Mat. 5:10-12.

ENN LEXANP POU NOU

3. Dapre Zistwar Bann Apot 4:19, 20, kouma bann zapot ti reazir kan zot ti gagn persekision dan premie siek, ek kifer zot ti reazir koumsa?

³ Nou bann frer ek ser pe viv mem sitiasion ki bann zapot dan premie siek. Bann zapot ti gagn persekision parski zot ti pres mesaz konsernan Zezi. Plizir fwa bann ziz dan lakour siprem Zwif ti “donn zot lord aret koz dan nom Zezi.” (Zist. 4:18; 5:27, 28, 40) Kouma bann zapot ti reazir? (Lir Zistwar Bann Apot 4:19, 20.) Zot ti kone ki enn kikenn ki ena enn pli gran lotorite ti ‘komann zot pou anons Bonn Nouvel e rann temwagnaz’ lor Zezi Kris. (Zist. 10:42) Lerla, Pier ek Zan ti koz dan plas tou bann disip, ek zot ti dir avek kouraz ki zot pou obeir Bondie olie ki zot obeir sa bann ziz-la. Zot ti dir osi ki zot pa pou aret koz lor Zezi. Se koumadir zot ti pe poz sa bann ziz-la sa kestion-la, ‘Eski zot pe rod dir ki zot bann komannman pli siperyer ki bann komannman Bondie?’

4. Dapre Zistwar Bann Apot 5:27-29, ki lexanp bann zapot inn donn tou bann vre Kretien, ek kouma nou kapav imit zot lexanp?

⁴ Bann zapot inn donn enn zoli lexanp ki tou bann vre Kretien ankor pe swiv azordi. Zot ti bien deside pou “obeir Bondie plito ki obeir dimoun.” (Lir Zistwar Bann Apot 5:27-29.) Apre ki bann zapot ti gagn bate parski zot ti res fidel, zot ti sorti dan lakour siprem “leker kontan parski ti konsider zot dign pou gagn maltrete akoz nom Zezi,” ek zot ti kontign prese!​—Zist. 5:40-42.

5. Ki bann kestion nou bizin poz noumem?

⁵ Lexanp bann zapot fer nou poz noumem sertin kestion. Par exanp, kouma bann zapot inn “obeir Bondie plito ki obeir dimoun,” ek anmemtan obeir lord ki Labib done pou “obeir lotorite ki dirize”? (Rom. 13:1) Kouma nou kapav “respekte bann dirizan ek bann otorite sivil,” ek anmemtan res fidel ar Bondie, ki nou Dirizan Siprem?​—Tit 3:1.

BANN “LOTORITE”

6. (a) Kisann-la “lotorite” ki mansione dan Romin 13:1, ek kouma nou bizin tret zot? (b) Ki nou kapav dir konsernan tou bann dirizan imin?

⁶ Lir Romin 13:1. Dan sa verse-la, mo “lotorite” reprezant bann dirizan imin ki ena pouvwar lor lezot. Bann Kretien bizin obeir sa bann dirizan-la. Kifer? Parski zot fer sir ki ena lape, ki bann dimounn obeir lalwa, ek parfwa zot mem defann bann serviter Zeova. (Rev. 12:16) Akoz sa, nou bizin pey tax, ek donn zot loner ek respe ki zot merite. (Rom. 13:7) Selman, si bann gouvernman ena sa lotorite-la, se zis parski Zeova permet ki zot ena sa lotorite-la. Zezi ti explik sa dan enn fason kler kan Gouverner Romin Pons Pilat ti poz li bann kestion. Kan Pilat ti dir Zezi ki li ena lotorite pou sap so lavi ouswa pou touy li, Zezi ti dir: “To pena pouvwar lor mwa exsepte seki to finn resevwar depi lao.” (Zan 19:11) Parey kouma Pilat, lotorite ki tou bann gouvernman ek politisien ena azordi, li limite.

7. Kan eski nou pa pou obeir bann dirizan imin, ek ki kitsoz zot bizin rapel?

⁷ Bann Kretien bizin soumet ar bann gouvernman tanki zot bann lalwa pa al kont bann lalwa Bondie. Parkont, fode pa nou obeir bann gouvernman kan zot demann nou pou fer bann kitsoz ki Bondie kondane, ouswa kan zot anpes nou fer bann kitsoz ki Bondie demann nou pou fer. Par exanp, kitfwa zot kapav obliz bann zenn zom pou fer servis militer.b Ouswa zot kapav interdi nou tradiksion Labib ek nou bann piblikasion. Zot kapav osi anpes nou prese ek ador Zeova ansam ar nou bann frer ek ser. Kan bann dirizan mal servi zot lotorite, par exanp kan zot persekit bann disip Zezi, zot bizin rapel ki zot ena bann kont pou rann Bondie. Zeova pe get zot!​—Ekle. 5:8.

8. Ki diferans ena ant lotorite ki bann gouvernman ena ek lotorite ki Zeova ena, ek kifer sa li inportan?

⁸ Bann gouvernman ena enn gran lotorite, me zot pena lotorite siprem. Se zis Zeova ki ena lotorite siprem, setadir pli gran lotorite ki enn kikenn kapav ena. Dan Labib, plizir fwa apel Zeova, “sa Kikenn ki Siprem la.”​—Dan. 7:18, 22, 25, 27.

“SA KIKENN KI SIPREM LA”

9. Ki kitsoz profet Daniel ti trouve dan bann vizion?

⁹ Profet Daniel ti gagn bann vizion ki ti montre dan enn fason bien kler ki Zeova ena pli gran lotorite ki ninport kisann-la. Daniel ti trouv kat gro bebet ki reprezant bann pwisans mondial dan lepase ek azordi, setadir Babilonn, Lanpir Medo-Pers, Lagres, Rom, ek Pwisans Mondial Anglo-Ameriken. (Dan. 7:1-3, 17) Lerla, Daniel ti trouv enn lakour ki’nn reini dan lesiel, ek Zeova ti pe asiz lor So tronn. (Dan. 7:9, 10) Seki Daniel ti trouve apre, li enn lavertisman pou tou bann dirizan azordi!

10. Dapre Daniel 7:13, 14, 27, kisann-la Zeova pou donn lotorite lor later antie, ek ki sa montre lor Zeova?

¹⁰ Lir Daniel 7:13, 14, 27. Zeova pou tir tou pouvwar ek lotorite ar bann dirizan imin, ek Li pou donn sa lotorite-la bann ki vremem merit sa ek ki pli pwisan. Kisann-la Li pou donn sa? Li pou donn sa “enn kikenn ki resanble garson enn zom,” setadir Zezi Kris, ek “bann sin ki pe servi sa Kikenn ki Siprem la,” setadir bann 144,000 ki pou regne “pou touletan, wi pou leternite.” (Dan. 7:18) Li kler ki Zeova Li “sa Kikenn ki Siprem la,” parski Li tousel ena lotorite pou fer sa.

11. Dapre Daniel, ki kitsoz ankor montre ki Zeova ena lotorite siprem?

¹¹ Seki Daniel ti trouve dan sa vizion-la, li an-akor ar seki li ti dir dan bann verse avan. Daniel ti dir: “Bondie lesiel . . . tir bann lerwa ek Li etabli bann lerwa.” Li ti dir osi ki “sa Kikenn ki Pli Gran la, Li Sef dan rwayom bann dimounn ek ki Li donn sa ninport kisann-la Li anvi.” (Dan. 2:19-21; 4:17) Eski Zeova inn deza tir ouswa etabli bann dirizan? Biensir!

12. Donn enn lexanp pou montre kouma Zeova ti tir sertin lerwa lor zot tronn dan lepase. (Get zimaz.)

¹² Dan lepase, Zeova inn montre dan enn fason kler ki Limem ena pli gran “lotorite” ki ena. Anou get trwa lexanp. Dan Lezip, Faraon ti fer pep Zeova vinn so bann esklav ek plizir fwa li ti refiz pou liber zot. Me Zeova ti liber zot ek Li ti nway Faraon dan Lamer Rouz. (Ex. 14:26-28; Ps. 136:15) Baltazar, lerwa Babilonn, ti fer enn gran fet. Dan sa fet-la, li ti “elev [limem] kont Lesegner ki dan lesiel” ek li ti “donn laglwar bann bondie larzan ek lor,” olie ki li donn Zeova laglwar. (Dan. 5:22, 23) Me Zeova ti imilie sa zom gran-nwar la. “Sa lanwit-la mem,” Baltazar ti mor ek ti donn so rwayom Lanpir Medo-Pers. (Dan. 5:28, 30, 31) Lerwa Palestinn, Erod Agripa I, ti touy lapot Zak. Li ti osi met lapot Pier dan prizon ek li ti pe rod touy li. Me Zeova ti anpes Erod fer seki li ti plann. “Enn anz Lesegner [ti] zet Erod anba,” ek li ti mor.​—Zist. 12:1-5, 21-23.

13. Donn enn lexanp pou montre kouma Zeova ti gagn laviktwar lor bann dirizan ki ti fer enn lalians.

¹³ Zeova inn osi montre ki Li ena lotorite siprem, mem kan plizir dirizan zwenn ansam pou fer enn lalians. Par exanp, Zeova ti lager pou Izrael ek Li ti ed zot pou detrir 31 lerwa Kananeen ki ti fer enn lalians. Li ti osi ed bann Izraelit pou gagn bann teritwar dan Later Promiz. (Zozwe 11:4-6, 20; 12:1, 7, 24) Zeova ti osi ed bann Izraelit pou gagn laviktwar lor Lerwa Benn-Adad ek 32 lezot dirizan Sirien ki ti lager kont Izrael.​—1 Ler. 20:1, 26-29.

14-15. (a) Ki kitsoz Lerwa Naboukodonozor ek Darius ti dir konsernan lotorite ki Zeova ena? (b) Ki kitsoz enn ekrivin Psom ti dir konsernan Zeova ek So pep?

¹⁴ Depi touletan, Zeova inn montre ki Limem sa Kikenn ki Siprem la. Par exanp, olie ki lerwa Babilonn, Naboukodonozor, ti rekonet avek limilite ki Zeova merit loner, li ti fer vantar akoz ‘so prop lafors ek pwisans ek pou laglwar so grander.’ Lerla, Zeova ti fer li vinn fou. Me kan li ti regagn so lespri, Naboukodonozor ti “loue sa Kikenn ki Pli Lao la” ek li ti rekonet ki “rwayom [Zeova] pou regne pou touletan,” ek ki “pena personn ki kapav anpes Li fer kitsoz.” (Dan. 4:30, 33-35) Kan Daniel ti res fidel ar Zeova ek ki Zeova ti sap li dan lakav bann lion, Lerwa Darius ti dir: “Bann dimounn [bizin] ena lakrint ek respe pou Daniel so Bondie. Parski Limem Bondie vivan ek Li existe pou touletan. So rwayom pa pou detrir zame ek li pou dirize pou touletan.”​—Dan. 6:7-10, 19-22, 26, 27.

¹⁵ Enn ekrivin Psom ti dir: “LESEGNER kas plan bann diferan popilasion; Li anpes zot realiz zot bann proze.” Li ti dir osi: “Enn nasion li ere kan LESEGNER limem so Bondie, enn pep li bienere si LESEGNER finn swazir li kouma so prop dibien.” (Ps. 33:10, 12) Se vremem bann bon rezon pou nou res fidel ar Zeova, pa vre!

LAGER FINAL

16. Ki nou kapav sir konsernan “gran detres,” ek kifer? (Get zimaz.)

¹⁶ Nou’nn trouve seki Zeova inn fer dan lepase. Me ki pou arive dan lavenir? Nou kapav sir ki Zeova pou sap so pep pandan “gran detres.” (Mat. 24:21, NW; Dan. 12:1) Li pou fer sa kan Gog ki sorti pei Magog, setadir plizir nasion ki’nn zwenn ansam, pou atak bann fidel serviter Zeova partou lor later. Mem si parmi zot pou ena sa 193 manb l’ONU la, zot pa pou kapav lager kont Zeova ek so larme ki dan lesiel. Zeova fer sa promes-la: “Ek vremem, mo pou glorifie mwa, ek mo pou sanktifie mwa ek mo pou fer boukou nasion konn mwa; ek zot pou bizin kone ki momem Zeova.”​—Eze. 38:14-16, 23; Ps. 46:10.

17. Ki Labib dir konsernan lavenir bann lerwa lor later ek bann ki res fidel ar Zeova?

¹⁷ Kan Gog pou atak pep Bondie, Zeova pou deklans lager Armagedon kan Li pou detrir “bann lerwa lemonn antie.” (Rev. 16:14, 16; 19:19-21) Apre sa, “zis bann dimounn drwat pou res lor later, ek bann dimounn ki fidel ki pou res lor la.”​—Prov. 2:21, not.

NOU BIZIN RES FIDEL

18. Ki kitsoz boukou vre Kretien ti bien deside pou fer, ek kifer? (Daniel 3:28)

¹⁸ Toutlong listwar, bann vre Kretien inn sakrifie zot liberte ek zot inn mem riske zot lavi parski zot kontan zot Dirizan, Zeova. Sa bann vre Kretien-la ti bien deside pou res fidel ar Zeova. Zot parey kouma sa trwa Ebre ki Bondie ti sap dan four dife la, parski zot ti res fidel ar Li.​—Lir Daniel 3:28.

19. Lor ki kitsoz Zeova pou ziz so pep, ek ki nou bizin fer depi aster-la mem?

¹⁹ David ti koz lor linportans pou res fidel ar Bondie. Li ti dir: “SEGNER, twa ki ziz lor tou dimoun, ziz mwa dapre mo drwatir, ziz mwa dapre mo lintegrite.” (Ps. 7:8) Li ti dir osi: “Fer ki lonette ek drwatir prezerv mwa.” (Ps. 25:21) Meyer desizion ki nou kapav pran, se res fidel ar Zeova ninport ki arive. Lerla, nou pou ena mem santiman ki sa ekrivin Psom, ki ti dir: “Bienere bann ki amenn enn lavi san repros ouswa res fidel, ki viv dapre lalwa LESEGNER.”​—Ps. 119:1.