Eski To Ti Kone?

Lor ki kalite transpor sa ofisie Etiopien la ti ete kan Filip ti koste ar li?

LABIB New World Translation servi mo “kales” pou dekrir sa transpor-la. Me dan lang sa lepok-la, mo ki’nn servi pou tradir “kales,” kapav vedir diferan kalite transpor. (Zist. 8:​28, 29, 38) Li posib ki sa ofisie Etiopien la ti dan enn gran kales; li pa ti dan enn ti kales ki ti servi pou lager ouswa pou fer bann lekours. Anou gete kifer nou dir sa.

Etiopien-la ti enn gran fonksioner ek li ti vwayaz enn long distans. Sa zom-la “ti ena lotorite dan gouvernman Kandas, larenn Letiopi. Li ti an-sarz tou bann trezor sa larenn-la.” (Zist. 8:27) Soudan ek enn parti lesid Lezip ki existe azordi, ti form parti dan Letiopi sa lepok-la. Sa zom-la kitfwa pa ti servi mem transpor toutlong so vwayaz. Selman, pou fer sa long vwayaz-la, sirman li ti ena bann bagaz avek li. Dan premie siek, parmi bann transpor ki bann dimounn ti pe servi pou vwayaze, ti ena bann kales ki kouver ek ki ena kat larou. Liv Acts—An Exegetical Commentary dir: “Dan sa kalite kales-la, bann dimounn ti kapav amenn pli boukou bagaz, zot ti pli konfortab, ek zot ti kapav vwayaz bann pli long distans.”

Etiopien-la ti pe lir kan Filip ti koste ar li. Labib dir ki “Filip ti galoup akote kales-la ek ti tann [ofisie-la] pe lir liv profet Izai for.” (Zist. 8:30) Bann kales ki bann dimounn ti servi pou vwayaze pa ti roul vit. Akoz sa, Etiopien-la ti reisi lir dan kales-la, ek Filip ti reisi ariv kot kales-la, mem si li ti apie.

Etiopien-la “ti demann Filip pou mont dan kales ek pou asiz akote li.” (Zist. 8:31) Lor enn kales lekours, bann kavalie bizin debout. Me dan enn kales pou vwayaze, ti pou ena ase plas pou ki Etiopien-la ek Filip asize.

Avek seki ena dan Zistwar Bann Zapot sapit 8 ek bann prev istorik ki nou ena, aster-la dan nou bann piblikasion, kan nou montre zimaz sa Etiopien-la dan so kales, nou nepli montre enn ti kales ki servi pou lager ouswa pou fer bann lekours, nou montre zimaz enn gran kales.