Eski To Ti Kone?
Kifer ti ena bann etranze dan larme Lerwa David?
DAN larme Lerwa David, ti ena bann zom ki pa ti bann Izraelit, kouma par exanp Zelek, ki ti enn Amonit, Iri, ki ti enn Itit, ek Itma, ki ti enn Moabit.a (1 Kro. 11:39, 41, 46) Ti ena osi bann Keretien, bann Peletien, ek bann Gateen. (2 Sam. 15:18) Bann Keretien ek bann Peletien ti bien pros ar bann Filistin. (Eze. 25:16) Ek bann Gateen kitfwa ti sorti dan lavil Gat, ki ti enn lavil Filistin.—Zozwe 13:2, 3; 1 Sam. 6:17, 18.
Kifer David ti les bann etranze form parti dan so larme? Li ti sir ki zot ti fidel ar li. Me pli inportan, li ti sir ki zot ti fidel ar Zeova. Par exanp, konsernan bann Keretien ek bann Peletien, The New Interpreter’s Dictionary of the Bible, dir: “Zot ti res fidel ar David, sirtou pandan bann sitiasion bien difisil ki li ti viv pandan so regn.” Kouma zot ti montre ki zot ti fidel ar David? Kan Sheba ti kree enn gro dezord ek ki bann Izraelit ti kit Lerwa David pou swiv li, bann Keretien ek bann Peletien ti res fidel ar David. Zot ti osi ed David pou regle sa problem-la. (2 Sam. 20:1, 2, 7) Ek kan Adoniya, garson Lerwa David, ti esey vinn lerwa, bann Keretien ek bann Peletien ti res fidel ar David. Zot ti osi ede pou fer Salomon vinn lerwa, parski Zeova ti swazir li pou vinn prosin lerwa.—1 Ler. 1:24-27, 38, 39.
Enn lot etranze ki ti res fidel ar David se enn Gateen ki ti apel Itay. Kan Absalon, garson Lerwa David, ti esey fer lepep rebel kont David pou li pran so plas, Itay ek so 600 solda ti res fidel ar David. O-koumansman, David ti dir Itay ki li pa ti bizin partisip dan sa lager-la parski li ti enn etranze. Me Itay ti dir li: “Tanki Zeova li vivan, ek tanki mo segner lerwa li vivan, ninport kotsa mo segner lerwa pou ete, ki li dan lamor ouswa dan lavi, to serviter pou ansam avek li!”—2 Sam. 15:6, 18-21.
Itay ti fidel ar David, lerwa ki Zeova ti swazir
Mem si bann Keretien, bann Peletien, ek bann Gateen ti bann etranze, zot ti aksepte ki Zeova Li vre Bondie, ek zot ti aksepte David kouma zot lerwa. Sirman David ti kontan ki li ti ena bann zom fidel koumsa dan so larme!
a Dapre lalwa Bondie, ki trouv dan Deteronom 23:3-6, bann Amonit ek bann Moabit pa ti gagn drwa form parti dan pep Izrael. Selman, sa lalwa-la kitfwa pa ti anpes zot frekant ouswa viv parmi bann Izraelit. Get Étude perspicace des Écritures, Volim 1, p. 100.