LARTIK LETID 20
KANTIK 7 Zeova, Nou Lafors
To Kapav Sir ki Zeova Pou Rekonfort Twa
“Nou loue . . . Papa ki ena boukou mizerikord ek Bondie ki konsol bann dimounn dan tou kalite sitiasion.”—2 KOR. 1:3.
PWIN PRINSIPAL
Dan sa lartik-la, nou pou aprann kouma Zeova ti rekonfort bann Zwif ki ti bizin al res Babilonn.
1. Kouma lavi bann Zwif ti ete dan Babilonn?
PANDAN boukou lane, bann Zwif plizir fwa inn dezobeir Zeova. Ek akoz sa, Zeova inn les bann Babilonien detrir Zerizalem ek amenn zot an kaptivite dan Babilonn. Kouma lavi bann Zwif ti ete dan Babilonn? (2 Kro. 36:15, 16, 20, 21) Li vre ki zot ti ena enn sertenn liberte dan Babilonn, ek ki zot ti kapav fer bann kitsoz ki zot ti abitie fer. (Zer. 29:4-7) Selman, zot lavi pa ti fasil laba. Anplis, zot pa ti swazir pou al viv dan Babilonn. Okontrer, ti obliz zot pou al viv laba. Ki zot ti resanti akoz sa sitiasion-la? Enn parmi sa bann Zwif-la ti dir: “Pre kot bann larivier Babilonn, nou ti asize. Nou ti plore kan nou ti pans Sion.” (Ps. 137:1) Sa bann Zwif-la ti bien bizin rekonfor, me kotsa zot ti pou gagn sa?
2-3. (a) Ki Zeova ti fer pou bann Zwif ki ti dan Babilonn? (b) Ki nou pou examine dan sa lartik-la?
2 Labib dir ki Zeova Li “Bondie ki konsol bann dimounn.” (2 Kor. 1:3) Zeova kontan so bann serviter ek Li anvi rekonfort zot. Li ti kone ki sertin Zwif dan Babilonn ti pou regrete ki zot inn dezobeir Li, ek ki zot ti pou rekoumans servi Li. (Iza. 59:20) Se pou sa rezon-la ki, plis ki 100 an avan ki bann Zwif al dan Babilonn, Zeova ti fer profet Izai ekrir enn liv pou “konsol [So] pep.” (Iza. 40:1) Wi, gras-a liv Izai, Zeova ti kapav rekonfort bann Zwif ki ti dan Babilonn.
3 Parey kouma sa bann Zwif-la, nou osi parfwa nou bizin rekonfor. Dan sa lartik-la, nou pou get trwa fason kouma Zeova ti rekonfort bann Zwif: (1) Li ti promet ki Li ti pou pardonn bann ki repanti, (2) Li ti donn so bann serviter enn lespwar, ek (3) Li ti ed zot pou aret gagn per. Apre sa, nou pou gete kouma Zeova kapav rekonfort nou parey kouma Li ti rekonfort bann Zwif.
ZEOVA PARDONN NOU
4. Kouma Zeova inn montre ki Li ena mizerikord? (Izai 55:7)
4 Zeova Li enn “Papa ki ena boukou mizerikord.” (2 Kor. 1:3) Li ti promet bann Zwif ki, si zot repanti, Li pou pardonn zot. (Lir Izai 55:7.) Li ti dir zot: “Akoz mo lamour fidel ki eternel, mo pou ena pitie pou twa.” (Iza. 54:8) Kouma Zeova ti montre mizerikord anver bann Zwif ki ti dan Babilonn? Mem si zot ti bizin pey bann konsekans zot bann aksion, Zeova ti promet zot ki zot pa ti pou res touletan dan Babilonn. (Iza. 40:2) Sa bann parol-la sirman ti bien rekonfort bann Zwif ki ti repanti!
5. Konpare ar bann Zwif dan Babilonn, kifer nou konpran pli bien mizerikord Zeova?
5 Ki leson nou aprann? Zeova touletan pre pou pardonn so bann serviter. Azordi, konpare ar bann Zwif dan Babilonn, nou konpran pli bien mizerikord Zeova. Kifer nou dir sa? Parski nou kone seki Zeova inn fer pou ki nou kapav gagn pardon nou bann pese. Plizir santenn lane apre ki Izai ti ekrir so liv, Zeova ti avoy So Garson lor later pou ki li donn so lavi kouma enn ranson pou tou dimounn. Ek gras-a lamor Zezi, Zeova kapav “efas” net pese bann ki repanti. (Zist. 3:19; Iza. 1:18; Efe. 1:7) Nou servi enn Bondie ki ena boukou mizerikord, pa vre!
6. Kan nou mazinn mizerikord Zeova, kifer sa rekonfort nou? (Get zimaz osi.)
6 Eski nou pe kontign santi nou koupab pou bann pese ki nou’nn fer dan lepase mem si nou’nn repanti? Si wi, bann parol ki Zeova ti dir bann Zwif dan Izai 55:7 kapav rekonfort nou. Kitfwa nou ankor pe santi nou koupab parski nou ankor pe pey bann konsekans pou bann erer ki nou’nn fer. Selman, si nou’nn konfes nou pese ek ki nou’nn fer bann sanzman ki bizin, nou kapav sir ki Zeova inn pardonn nou. Ek kan Zeova pardone, Li bliye net bann pese ki nou’nn fer. (Konpar ar Zeremi 31:34.) Alor, si Zeova inn bliye net bann pese ki nou’nn fer dan lepase, nou osi nou bizin fer parey. Seki pli inportan pou Zeova se seki nou pe fer aster-la, pa bann erer ki nou’nn fer dan lepase. (Eze. 33:14-16) Ek biento, dan lemond nouvo, Zeova pou tir tou bann konsekans ki nou pe bizin peye azordi akoz bann pese ki nou’nn fer.
Seki pli inportan pou Zeova se seki nou pe fer aster-la, pa bann erer ki nou’nn fer dan lepase (Get paragraf 6)
7. Si nou pe kasiet enn pese ki nou’nn fer, ki kitsoz kapav motiv nou pou al rod led bann ansien?
7 Me ki nou bizin fer si nou konsians pe fatig nou parski nou pe kasiet enn pese ki nou’nn fer? Labib ankouraz nou pou rod led bann ansien. (Zak 5:14, 15) Li pa touletan fasil pou dir bann ansien seki nou’nn fer. Selman, nou bizin rapel ki Zeova servi sa bann zom-la pou ed nou, ek ki zot pou montre lamour ek mizerikord anver nou parey kouma Zeova. Si nou rapel sa ek si nou repanti, sa pou motiv nou pou al koz ar zot. Anou gete kouma Zeova ti servi bann ansien pou rekonfort enn frer ki apel Arthur.a Arthur so konsians ti pe fatig li parski li ti fer enn pese. Li dir: “Pandan apepre enn an, mo ti pe get pornografi. Me apre ki mo ti tann enn diskour ki ti koz lor konsians, mo ti konfes mo pese ar mo madam ek ar bann ansien. Mo ti santi mwa pli bien apre ki mo ti koz ar bann ansien, parski mo konsians ti nepli fatig mwa. Selman, mo ti ankor santi mwa bien tris akoz seki mo ti fer. Lerla, bann ansien ti rapel mwa ki Zeova pa ti rezet mwa, ek ki Li disiplinn nou parski Li kontan nou. Zot bann parol ti bien rekonfort mwa, ek sa ti ed mwa pou konpran ki Zeova ti vremem pardonn mwa.” Azordi, Arthur pe servi kouma pionie ek serviter lasanble. Kan nou kone ki Zeova touletan pre pou pardonn nou kan nou repanti, sa vremem rekonfort nou, pa vre!
ZEOVA DONN NOU ENN LESPWAR
8. (a) Ki lespwar Zeova ti donn bann Zwif ki ti dan Babilonn? (b) Dapre Izai 40:29-31, ki lefe sa lespwar-la ti ena lor bann Zwif?
8 Bann Zwif kitfwa ti panse ki zame zot pa ti pou retourn Zerizalem, parski bann Babilonien pa ti abitie larg zot bann prizonie. (Iza. 14:17) Selman, Zeova ti donn so pep enn lespwar. Li ti promet zot ki Li ti pou liber zot, ek nanye pa ti pou kapav anpes Zeova realiz so promes. (Iza. 44:26; 55:12) Pou Zeova, Babilonn ti koumadir “enn kous lapousier.” (Iza. 40:15) Parey kouma kan soufle lor lapousier li anvole, se koumsa mem ki Zeova ti pou liber so pep depi Babilonn. Kouma sa promes-la ti donn enn lespwar bann Zwif ki ti dan Babilonn? Sa promes-la pa ti zis rekonfort zot; li ti fer plis ki sa. Izai ti dir: “Bann ki ena lespwar dan Zeova pou regagn lafors.” (Lir Izai 40:29-31.) Wi, sa promes-la ti donn bann Zwif enn lespwar, ek sa ti donn zot telman boukou lafors ki se koumadir zot ti kapav “mont dan ler koumadir zot ena lezel, parey kouma bann leg.”
9. Kifer bann Zwif ti ena bann bon rezon pou ena konfians dan promes Zeova?
9 Bann Zwif ki ti dan Babilonn ti ena bann bon rezon pou ena konfians an Zeova. Kifer nou dir sa? Parski plizir profesi ki Zeova ti anonse, ti fini realize. Par exanp, parey kouma Zeova ti predir, Lasiri ti gagn laviktwar lor dis tribi rwayom lenor Izrael ek zot ti deport boukou Zwif. (Iza. 8:4) Bann Zwif ti osi trouv bann Babilonien detrir Zerizalem ek amenn zot an kaptivite. (Iza. 39:5-7) Zot ti aprann osi ki lerwa Babilonn ti fer Lerwa Sedesias vinn aveg ek ti amenn li dan Babilonn. (Zer. 39:7; Eze. 12:12, 13) Tou seki Zeova ti predir ti realize! (Iza. 42:9; 46:10) Alor, parski tousala ti realize, sirman zot ti sir ki Zeova ti pou tini so promes pou liber zot!
10. Pandan bann dernie zour, kouma nou kapav gard nou lesperans bien kler dan nou lespri?
10 Ki leson nou aprann? Kan nou tris ek dekouraze, bann promes Zeova kapav ankouraz nou ek donn nou lafors. Nou pe viv dan enn lepok bien difisil, ek bann lennmi Bondie pe fer tou pou dekouraz nou. Selman, fode pa nou dekouraze, parski Zeova inn donn nou enn zoli lesperans; Li’nn promet nou ki nou pou kapav viv pou touletan dan enn paradi, kot pou ena lape ek sekirite. Alor, nou lesperans bizin bien kler dan nou lespri ek nou bizin res bien konsantre lor la. Nou lesperans li koumadir enn zoli peizaz, ek si nou pa res bien konsantre lor la, li kapav vinn flou. Lerla, nou lesperans pou koumadir enn zoli peizaz ki nou pe get atraver enn lafnet ki bien sal. Alor, kouma nou kapav “netway sa lafnet-la,” setadir gard nou lesperans bien kler dan nou lespri? Nou bizin pran letan regilierman pou reflesi lor kouma nou lavi pou ete dan lemond nouvo. Ek pou nou fer sa, nou bizin lir bann lartik, get bann video, ek ekout bann sante ki koz lor nou lesperans. Anplis, kan nou priye Zeova, nou kapav koz lor tou bann promes ki tous nou personelman ek ki nou anvi trouv Li realize dan Paradi.
11. Ki kitsoz ed Joy pou regagn lafors?
11 Anou get lexanp enn ser ki apel Joy ek ki ena enn maladi kronik. Joy explike kouma so lesperans rekonfort li ek donn li lafors. Li dir: “Kan mo tris ek dekouraze, mo ouver mo leker ar Zeova parski mo kone ki Li konpran mwa. Dan sa bann moman-la, Li donn mwa ‘sa pwisans ki plis ki seki normal la.’” (2 Kor. 4:7) Enn lot kitsoz ki ed Joy, se kan li mazinn limem dan lemond nouvo, kot “okenn abitan pa pou dir: ‘Mo malad.’” (Iza. 33:24) Parey kouma Joy, si nou osi nou ouver nou leker ar Zeova ek nou res bien konsantre lor nou lesperans, nou pou regagn lafors.
12. Kifer nou ena bann bon rezon pou ena konfians dan bann promes Zeova? (Get zimaz osi.)
12 Parey kouma bann Zwif ki ti dan Babilonn, nou osi nou ena bann bon rezon pou ena konfians an Zeova. Kifer nou dir sa? Parski ena boukou profesi ki nou pe trouv realize azordi. Par exanp, konsernan Pwisans Mondial Anglo-Ameriken, nou pe trouve kouma ‘enn parti sa rwayom-la li for ek enn parti li feb.’ (Dan. 2:42, 43) Nou pe osi tann bann “tranbleman-de-ter dan enn landrwa apre lot,” ek nou pe pres ar bann dimounn ki sorti dan “tou bann nasion.” (Mat. 24:7, 14) Alor, parski nou pe trouv sa bann profesi-la ek lezot ankor realize, sa fer nou ena konfians ki Zeova pou realiz so bann promes.
Nou pe trouv sa bann profesi-la realize azordi ek sa fer nou ena konfians ki Zeova pou realiz so bann promes (Get paragraf 12)
ZEOVA ED NOU POU ARET GAGN PER
13. (a) Kan ti pou ariv ler pou ki bann Zwif libere ar Babilonn, ki difikilte zot ti pou gagne? (b) Dapre Izai 41:10-13, kouma Zeova ti rekonfort zot?
13 Mem si Zeova ti promet bann Zwif ki Li ti pou liber zot, Li ti kone ki zot ti pou gagn bann difikilte kan sa ti pou arive. Zeova ti predir ki enn lerwa bien pwisan ti pou atak bann pep ki otour Babilonn, ek ki apre, li ti pou atak Babilonn osi. (Iza. 41:2-5) Selman, bann Zwif pa ti ena okenn rezon pou per, parski Zeova ti fini rekonfort zot. Li ti dir zot: “Pa per, parski mo avek twa. Pa trakase, parski mo to Bondie.” (Lir Izai 41:10-13.) Kan Zeova ti dir bann Zwif “mo to Bondie,” ki Li ti pe rod dir? Li pa ti pe rod dir bann Zwif ki zot ti bizin ador Li, parski bann-la ti deza kone ki zot ti bizin fer sa. Olie sa, Li ti pe rapel zot ki Li ti avek zot ek ki Li ti pou ed zot.—Ps. 118:6.
14. Kouma Zeova ti ed bann Zwif pou aret gagn per?
14 Zeova ti osi ed bann Zwif pou aret gagn per kan Li ti rapel zot ki Li bien pwisan ek ki Li konn tou kitsoz. Li ti dir zot get bann zetwal, ek Li ti explik zot ki Li pa ti zis kree bann zetwal, me ki Li osi konn sakenn so nom. (Iza. 40:25-28) Si Zeova konn nom sak zetwal, nou kapav sir ki Li konn nom sakenn parmi so bann serviter. Ek si Li ena pouvwar pou kree bann zetwal, nou kapav sir ki Li ena pouvwar pou ed so bann serviter. Alor, bann Zwif pa ti ena okenn rezon pou gagn per!
15. Kouma Zeova ti prepar so pep pou seki ti pou arive apre?
15 Zeova ti osi prepar so pep pou seki ti pou arive apre. Dan liv Izai, li ti dir so pep: “Rant dan to bann lasam ki trouv andan, ek ferm laport deryer twa. Kasiet pou enn ti moman ziska ki lakoler pase.” (Iza. 26:20) Sa verse-la kitfwa ti realize enn premie fwa kan Lerwa Siris ti atak Babilonn. Enn istorien dir ki kan Siris ti rant dan Babilonn, li “ti donn [so bann solda] lord pou touy tou bann dimounn ki ti andeor zot lakaz.” Bann ki ti pe res Babilonn sirman ti bien per kan sa ti arive. Parkont, bann Zwif ki ti res dan Babilonn kitfwa ti reisi sape parski zot ti obeir bann instriksion Zeova.
16. Kifer fode pa nou per konsernan seki pou arive pandan gran soufrans? (Get zimaz osi.)
16 Ki leson nou aprann? Biento, gran soufrans pou koumanse, ek kan sa pou arive, bann dimounn pou panike ek zot pou per. Parkont nou, nou pa pou per parski nou kone ki Zeova Li nou Bondie. Nou pou ena kouraz parski nou kone ki “[nou] delivrans pe koste.” (Lik 21:28) Ek mem kan bann nasion pou zwenn ansam pou atak nou, nou pou kontign fer Zeova konfians. Dan sa ler-la, Zeova pou servi so bann anz pou protez nou ek Li pou donn nou bann instriksion ki kapav sap nou lavi. Kouma eski nou pou gagn sa bann instriksion-la? Nou pankor kone! Selman, kitfwa Li pou donn nou sa bann instriksion-la atraver nou lasanble. Dan enn sertenn fason, nou lasanble pou koumadir nou “bann lasam ki trouv andan,” kot nou pou santi nou an sekirite. Kouma nou kapav prepar nou pou seki pou arive? Nou bizin res pros ar nou bann frer ek ser, kontign obeir bann instriksion ki Zeova donn nou, ek kontign ena konfians ki se Zeova ki pe diriz so lorganizasion.—Ebre 10:24, 25; 13:17.
Kan nou reflesi lor pouvwar ek kapasite ki Zeova ena pou sap nou, nou pa pou trakase plis ki bizin pandan gran soufrans (Get paragraf 16)b
17. Kifer nou sir ki Zeova pou rekonfort nou?
17 Mem si lavi bann Zwif pa ti fasil dan Babilonn, Zeova ti rekonfort zot. Li pou fer parey pou nou osi! Alor, ninport ki arive demin, to kapav sir ki Zeova pou rekonfort twa. Rapel ki Li touletan pre pou pardonn so bann serviter, ek ki Li gagn to traka. Ek kontign gard to lesperans bien kler dan to lespri. Fode zame to bliye osi ki Zeova Li to Bondie, alor to pena nanye pou per!
KANTIK 3 Nou Lafors, Nou Lespwar, Nou Konfians
a Finn sanz sertin nom dan sa lartik-la.
b DESKRIPSION ZIMAZ: Enn ti group Temwin inn zwenn ansam. Par lafnet, zot pe get bann zetwal, ek sa rapel zot ki Zeova ena pouvwar ek kapasite pou protez so bann serviter.