LAVI PE VINN PLI SER—KOUMA POU FER FAS?

Konn Zer Ou Kas

Kan bann pri monte, sa kapav bien difisil pou nou tou. Me fode pa ou santi ou dezespere. Ena bann kitsoz ki ou kapav fer pou amelior ou sitiasion.

KIFER SA LI INPORTAN?

Si ou pa fer zefor pou bien servi ou larzan, ou kapav gagn plis problem, ek sa kapav fer ou plis trakase ek angwase. Mem si ou pena boukou kas, ena bann kitsoz ki ou kapav fer pou amelior ou sitiasion.

SEKI OU KAPAV FER

Viv dapre ou mwayin. Si ou fer sa, ou pou ena plis kontrol lor ou kas ek ou pou mem kapav pey pou bann depans ki ou pa ti atann.

Pou kapav viv dapre ou mwayin, fer enn bidze, setadir ekrir kantite kas ki ou gagne ek ou bann depans. Ek kan ou pe fer ou bidze, fer sir ki ou pe depans ou larzan lor bann kitsoz ki ou vremem bizin. Lerla, fer ou best pou swiv bidze-la ek adapte li si zame ou lapey ouswa bann pri sanze. Biensir, si ou marye, inplik ou konzwin kan ou ena bann desizion pou pran.

Esey sa: Olie ki ou aste bann kitsoz lor kredi, si posib, pey zot kash. Sertin dimounn finn trouve ki kan zot fer sa, zot kapav zer zot bidze pli bien ek zot evit met bann det lor zot latet. Ek osi, pran letan pou chek ou bann bank statement, ouswa not bann depans ki ou fer toulezour ek sak mwa. Kan ou kone komie kas pe rantre ek sorti, ou pou mwins strese.

Li kapav difisil pou viv dapre ou mwayin. Me kan ou fer enn bon bidze, sa kapav vremem ede, ek ou pou mwins strese akoz kas.

‘Kalkile komie sa pou koute.’—Lik 14:28.

Travay dir pou pa perdi ou travay. Ki ou kapav fer pou gard ou travay? Ala de-trwa konsey: Ariv dan ler dan travay. Gard enn latitid pozitif anver ou travay. Ed lezot, ek travay dir. Montre respe. Swiv bann reg, ek fer zefor pou vinn pli bon dan ou travay.

Pa gaspiy ou kas. Demann oumem, ‘Eski souvan mo depans larzan lor bann kitsoz ki ser, ki pa neseser ouswa mem ki pa bon pou mwa?’ Par exanp, boukou dimounn gaspiy zot kas lor bann kitsoz ki pa bon kouma ladrog, zwe pou kas, fime, ouswa bwar tro boukou. Sa bann kitsoz-la kapav gat zot lasante ek mem fer zot perdi zot travay.

“Ere enn kikenn ki trouv lasazes . . . Li pli bon ki enn dimounn gagn sazes ki li gagn larzan.”—Proverb 3:13, 14.

Ramas kas pou bann sitiasion ki ou pa atann. Kan ou kapav, met enn ti-kas dekote pou bann depans ouswa bann sitiasion ki ou pa atann. Sa ti-kas la kapav ed ou pou pa trakase plis ki bizin si arive oumem ouswa enn manb lafami tom malad, perdi travay ouswa si enn kout ariv enn sitiasion ki ou pa ti atann.

“Bann moman difisil ek bann sitiasion ki personn pa atann ariv [nou] tou.”—Ekleziast 9:11.

Bann Konsey pou Fer Lekonomi

Manz plis bann manze ki’nn prepare lakaz.

Sa kapav kout ser si souvan ou manz deor ouswa ou aste manze ek bwar ki’nn fini prepare. Mem si sa pran letan ek demann zefor pou kwi ou manze lakaz, si ou fer sa, sa kapav ed ou fer boukou lekonomi. Anplis, ou pou ena plis kontrol lor kalite manze ki ou pe met dan ou lekor.

Reflesi bien avan ou aste.

Fer enn lalis komision ek pran zis seki ou finn ekrir. Pa aste brit-brit.
Si ou bidze permet ou, aste bann kitsoz an gro kan li pli bomarse. Me selman, fer sir ki ou ena plas pou gard bann manze-la pou ki zot pa gate.
Aste bann mark ki mwin ser si kalite-la paret korek.
Aste bann kitsoz online pou gagn bann pli bon pri, pou evit aste bann kitsoz ki ou pa ti pou aste, ek pou vey bien kouma ou pe depans ou larzan. Si kot ou reste ou kapav aste bann kitsoz online, eski ou kapav esey fer sa?
Vey bann promosion. Konpar bann pri, ek gete osi komie lenerzi prodwi-la pou servi ek komie sa pou koute pou fer mintenans plitar.

Reflesi de fwa avan ou ranplas seki ou deza ena.

Bann konpagni ki fabrik telefonn ek bann lezot prodwi touletan pe tir bann nouvo model pou ogmant zot profi. Alor, pran enn ti letan ek demann oumem: ‘Eski sa pou vremem itil pou mwa si mo aste sa dernie model la? Eski mo vremem bizin sanz mo laparey aster-la? Ek mem si mo bizin sanze, eski mo vremem bizin dernie model?’

Repar ek reservi bann kitsoz ki’nn kase.

Pran bien swin ou bann kitsoz kouma ou frizider ek ou plak gaz. Ek kan zot kase, si posib, repar zot. Ou kapav osi fer lekonomi kan ou aste bann kitsoz segonnme.

Plant ou prop legim ek frwi.

Eski ou kapav fer enn ti plas kot ou pou plante? Koumsa, ou pou depans mwins larzan pou aste manze. Ou pou kapav mem vande, partaz avek lezot ouswa mem fer esanz.

“Bann plan enn kikenn ki travay dir vremem pou reisi.”—Proverb 21:5.

“Nou vey bien pri bann kitsoz ki nou servi toulezour, ek nou fer atansion ar fason ki nou servi nou bann kart kredi.”—Miles, Langleter.

“Avan ki nou al fer nou bann komision, mwa ek mo fami nou touletan fer enn lalis bann kitsoz ki nou bizin.”—Jeremy, Lamerik.

“Regilierman nou reget nou bidze pou gete si nou ankor ena mwayin pou aste bann kitsoz ki nou ti plann pou aste. Ek nou met enn ti-kas dekote pou bann depans ki nou pa atann.”—Yael, Izrael.

“Olie ki nou aste bann nouvo kitsoz, nou’nn montre nou bann zanfan pou repar bann kitsoz ki’nn kase. Parmi ena nou loto ek bann kitsoz dan lakaz. Mwa ek mo madam nou osi evit aste bann dernie model ki fek sorti.”—Jeffrey, Lamerik.

“Mo’nn diminie mo bann depans parski mo plant mo prop legim ek mo swagn de-trwa poul. Mo kapav mem partaz mo bann legim avek lezot dimounn.”—Hono, Birmani.