Zistwar 41

Enn Serpan An Kwiv

ESKI sa serpan ki otour sa poto la li enn vre serpan? Non. Se enn serpan an kwiv. Jéhovah ti dir Moïse met li lor poto pou ki lepep kapav get li ek kontign viv. Me bann lezot serpan ki anba se bann vre serpan. Zot finn pik bann dimounn ek bannla inn tom malad. Eski to kone kifer?

Se parski bann Izraelit ti koz kont Bondie ek Moïse. Zot plengne: ‘Kifer to’nn fer nou sorti dan l’Égypte pou vinn mor dan dezer? Pena ni manze ni delo isi. Ek nou’nn plin ar manz sa lamann-la.’

Me lamann enn bon manze sa. Jéhovah ti donn zot sa atraver enn mirak. Ek se osi par enn mirak ki Li ti donn zot delo. Me lepep pena rekonesans anver Bondie pou fason ki Li’nn pran zot swin. Alor Jéhovah avoy sa bann serpan ranpli ar pwazon la pou pini bann Izraelit. Bann serpan pik zot ek boukou parmi zot mor.

Finalman lepep vinn get Moïse ek dir: ‘Nou’nn fer pese, parski nou’nn koz kont Jéhovah ek kont twa. Asterla priye Jéhovah pou ki Li tir sa bann serpan-la.’

Alor Moïse priye pou lepep. Ek Jéhovah dir Moïse fer sa serpan an kwiv la. Li dir met li lor enn poto, ek ninport kisannla ki’nn gagn pike bizin get li. Moïse fer exakteman seki Bondie dir. Ek bann dimounn ki ti gagn pike get sa serpan an kwiv la ek zot bien.

Sa aprann nou enn leson. Dan enn sertin fason, nou tou nou kouma bann Izraelit ki’nn gagn pike ar sa bann serpan-la. Nou tou nou dan enn sitiasion kot nou pou mor. Get otour twa, to pou trouv bann dimounn pe vinn vie, pe malad ek mor. Sa se parski Adam ek Ève, premie zom ek premie fam, ti tourn ledo ar Jéhovah, ek nou, nou zot bann zanfan. Me Jéhovah inn donn nou enn mwayin pou ki nou kapav viv pou touletan.

Jéhovah inn avoy so Garson, Jésus Christ, lor later. Ti koulout Jésus lor enn poto, parski boukou dimounn ti panse ki li move. Me Jéhovah ti ofer Jésus pou sov nou. Si nou get Jésus, setadir si nou swiv li, nou pou gagn lavi eternel. Me plitar nou pou aprann plis lor la.

Nombres 21:4-9; Jean 3:14, 15.