Kifer Eski U Kapav Fer Labib Konfyans

Ena dimunn dir ki pa kapav kont lor seki Labib dir ek buku lezot dimunn aksepte sa lopinyon la. Akoz sa mem, zordi buku pena konfyans dan seki Labib dir.

Me purtan, seki Zezi ti dir Bondye dan enn lapriyer fer nu gayn konfyans. Li ti dir: “To parol li laverite.” Ek Labib li mem dir avek buku lasirans ki li finn ekrir par direksyon Bondye.—Zan 17:17; 2 Timote 3:16.

Ki u panse lor la? Eski nu ena bann bon rezon pu fer Labib konfyans? Uswa, eski vremem ena bann prev pu montre ki nu pa kapav kont lor Labib? Uswa ankor, eski ena bann prev pu dir ki li mank larmoni ek ki li ena bann kontradiksyon?

Eski Ena Kontradiksyon Dan Labib?

Buku dir ki swadizan ena kontradiksyon dan Labib. Me, eski ena enn parmi zot ki kapav donn enn bon legzanp pu montre sa? Ziska ler, personn pa finn kapav fer sa! Li vre ki dan detrwa plas dan Labib, li kapav paret ki ena bann kontradiksyon. Me byin suvan, sa arive parski nu pa konn tu bann detay ek nu pa kone ki fason vremem bann kitsoz finn pase dan sa bann lepok la.

Par egzanp, ena poz sa kestyon la: ‘Kot Kain finn gayn so fam?’ Pu zot, sa li enn kitsoz ki pa kler dan Labib. Zot sipoze ki Adan ek Ev ti ena zis de zanfan, Kain ek Abel. Me sa sipozisyon la pa tini parski Labib li mem dir ki Adan “ti papa plizir garson ek tifi.” (Zenez 5:4) Alor, Kain finn marye avek enn so bann ser uswa kitfwa avek enn so bann nyes.

Suvan, bann ki kritik Labib rod par expre zis bann kontradiksyon. Par egzanp, zot kapav dir ki: ‘Matye, enn ekrivin Labib, dir ki enn ofisye larme ti vinn demann Zezi enn faver, tandiki Lik li, enn lot ekrivin Labib, li dir ki ofisye la ti avoy bann mesaze pu demann sa. Kisannla ki ena rezon la?’ (Matye 8:5, 6; Lik 7:2, 3) Me eski sa li vremem enn kontradiksyon sa?

Kan plizir dimunn fer enn travay, byin suvan dimunn ki responsab sa travay la ki gayn tu loner; donk, pu enn dimunn ki reflesi sa li pa enn kontradiksyon! Par egzanp, fer kuma dir enn rapor dir ki lemer enn lavil finn ranz enn simin, alor ki an realite so bann inzenyer ek so bann travayer ki finn fer sa, eski u pu dir ki sa rapor la pe fer erer? Non! Kumsa mem, pena okenn kontradiksyon kan Matye dir ki enn ofisye larme finn demann Zezi faver, ek Lik li, li dir ki li finn demann sa atraver so bann mesaze.

Nu remarke ki plis nu gayn detay, plis sa bann swadizan kontradiksyon dan Labib la disparet.

Listwar ek Syans

Enn tan, buku ti ena bann dut lor bann zistwar rakonte dan Labib. Par egzanp, ena finn demande si bann dimunn ki mansyone dan Labib, ti vremem egziste, parey kuma: Sargon, Lerwa Lasiri; Belsatsar, Lerwa Babilonn; Pons Pilat, guverner Romin. Me bann resan dekuvert finn montre ki tu bann zistwar Labib, zot vre. Akoz sa mem, enn istoryin, Moshe Pearlman finn ekrir: “Enn ku, tu bann ki ti dut listwar ki rakonte dan Ansyin Testaman finn kumans sanz zot lopinyon.”

Pu ki nu kapav fer Labib konfyans, fode ki li egzak avek syans usi. Eski li egzak? Pa tro lontan, bann syantis ki an kontradiksyon avek Labib ti pe dir avek buku lasirans ki liniver pa finn ena enn kumansman. Me purtan fek la, Robert Jastrow, enn dimunn ki etidye liniver, finn donn bann ranseynman pli resan ki pruve ki seki sa bann syantis la ti pe dir li fos. Li finn dir: “Asterla, nu truve ki tu bann dekuvert ki finn fer grasa letid liniver, zot an akor avek seki Labib dir lor kumansman lemond. Mem ki bann detay la pa parey, an gro sa bann letid liniver la zot an akor avek seki Zenez dir.”—Zenez 1:1.

Bann zom finn sanz usi zot lopinyon lor form later. Ansiklopedi The World Book Encyclopedia explike ki “bann dekuvert ki finn fer pandan bann vwayaz [an deor later] finn montre ki later ron; li pa plat kuma laplipar dimunn ti panse.” Me Labib ti ena tuletan rezon lor sa size la! Plis ki 2000 banane avan sa bann vwayaz la, Labib ti dir dan Izai 40:22: “Ena enn Kikenn ki res lao serk later,” uswa dapre lezot tradiksyon, “glob later” (Crampon 1905) “later ron.” (Moffatt)

Alor, plis dimunn aprann, plis zot gayn bann prev ki zot kapav fer Labib konfyans. Sir Frederic Kenyon, enn ansyin direkter British Museum finn ekrir: “Bann rezilta ki finn fini gayne konfirm seki lafwa [enn kikenn] ti pu sipoze, ki Labib gayn tuzur rezon amezir ki gayn plis konesans.”

Anons Lavenir

Me eski nu kapav vremem krwar seki Labib anonse konsernan lavenir, kan li promet nu ki pu ena ‘bann nuvo lesyel ek enn nuvo later kot pu ena lazistis’? (2 Pyer 3:13; Revelasyon 21: 3, 4) Kuma eski dan lepok lontan, Labib ti montre ki nu kapav kont lor li? Enn kantite fwa, bann profesi ki ti anonse bann santenn banane avan finn realize dan tu zot detay!

Par egzanp, preske 200 banane an avans, Labib ti anonse ki Babilonn, sa larme byin for la ti pu tonbe. Avredir, larme Med ek Pers, ki ti form enn sel lafors ti pu kraz Babilonn. Ek mem si Siris, Lerwa Pers, pa ti ankor ne, Labib ti fini anonse ki li ti pu zwe enn gran rol dan sa viktwar la. Labib ti anons usi ki bann gro delo larivyer Lefrat ki ti pe protez Babilonn “pu bizin sek” ek ki “bann laport lantre [Babilonn] pa pu ferme.”—Zeremi 50:38; Izai 13:17-19; 44:27–45:1.

Sa bann detay presi la finn realize parey kuma istoryin Hérodote finn rakonte apre. Pa fini, Labib ti anonse ki Babilonn ti pu vinn enn ta rwinn kot personn pa pu reste. Ek sa mem ki finn arive! Azordi, Babilonn li enn later abandone. (Izai 13:20-22; Zeremi 51:37, 41-43) Kumsa, ena enn kantite lezot profesi dan Labib ki finn realize dan enn fason byin tris.

Me, ki Labib pe anonse pu sityasyon sa lemond zordi la? Li dir: “Rapel sa byin: dan bann dernye zur pu ena letan difisil. Parski bann zom pu vinn egois, kontan larzan, vantar, arogan, zot pu koz kont Bondye, dezobeisan anver zot paran, ingra, mank respe pu kitsoz sin, zot pu ena leker dir, san pitye, kalomni zot prosin, vyolan, kryel, lennmi sa ki fer dibyin . . . Zot pu kontan plezir plis ki Bondye, zot pu montre enn laparans lapyete, me rezet so vre pwisans.”—2 Timote 3:1-5, Nouvo Testaman an Kreol Seselwa.

Pena okenn dut, zordi nu pe truv tusala realize! Me konsernan “bann dernye zur sa lemond la,” Labib finn usi anonse: “Nasyon pu lev kont nasyon ek rwayom kont rwayom ek pu mank manze.” Pa fini, pu ena “bann gran-gran tranbleman deter, ek pu ena bann maladi dan enn plas apre lot.”—Matye 24:7; Lik 21:11.

Wi, vremem, bann profesi Labib pe realize zordi! Me ki nu kapav dir lor bann promes ki pre pu realize, kuma par egzanp sa promes la: “Bann dimunn drwat pu gayn later, ek zot pu res pu tuletan lor la?” Uswa sa lot promes ki dir: “Zot pu bizin forz zot lepe an lam ki tras siyon, [ek] zot pa pu aprann lager ankor.”—Psom 37:29; Izai 2:4.

Ena kapav dir: “Sa paret tro zoli pu li vre.” Me an realite, nu pena okenn rezon pu dut bann promes Bondye. Nu kapav fer so Parol konfyans! (Tit 1:2) Si u egzaminn ankor plis bann prev ki ena, u konfyans pu pli ogmante.

Amwin deza indike, tu bann tex Labib ki site finn tradir depi New World Translation of the Holy Scriptures.

[Blurb on page 4]

“Bann rezilta ki finn fini gayne konfirm seki lafwa [enn kikenn] ti pu sipoze, ki Labib gayn tuzur rezon amezir ki gayn plis konesans”