Sapit 10

Rwayom Bondye Pe Dirize

1, 2. Kuma eski bann guvernman finn montre ki zot pa diriz byin?

FER kuma dir u finn aste enn laparey ek apre u remarke ki li pa pe marse. U fer enn kikenn repar li. Me tutswit apre li retom anpann. Sirman sa desevwar u!

² Bann guvernman imin usi parey. Limanite finn tuletan swete gayn enn guvernman ki kapav donn lape ek boner. Me, tu bann gro zefor ki finn fer pu repar bann domaz dan sosyete finn tom dan delo. Finn fer buku lakor pu lape—me apre, sa bann lakor la finn kase. Anplis, ki guvernman ki finn kapav tir lamizer net, anpes bann dimunn ena move panse lor lezot, tir krim, maladi, ek bann domaz lanatir? Bann guvernman zot ka dezespere. Mem Salomon, enn Lerwa saz an Izrael ti demande: “An seki konsern zom ki lor later, kuma eski li kapav konpran so simin?”—Proverb 20:24.

3. (a) Ki ti tem predikasyon Zezi? (b) Kuma eski sertin dimunn explike seki vedir Rwayom Bondye?

³ Pa perdi lespwar! Enn guvernman stab, li pa zis enn rev. Sa mem ki ti tem predikasyon Zezi. Li ti apel sa guvernman la “rwayom Bondye,” ek li ti anseyn so bann disip pu priye pu sa. (Lik 11:2; 21:31) Byinsir, parfwa dan bann rasanbleman relizye zot koz lor Rwayom Bondye. Avredir, tulezur buku priy pu sa rwayom la kan zot resit Lapriyer Senyer (ki apel usi Notre Père, uswa lapriyer model). Purtan, kan demann bann dimunn, “Ki ete Rwayom Bondye?” zot donn tu sort kalite repons. Ena dir, “Li dan u leker.” Lezot apel li lesyel. Me, Labib reponn klerman sa kestyon la, anu gete.

ENN RWAYOM AVEK ENN PROZE

4, 5. Kifer eski Zeova finn desid fer enn nuvo demonstrasyon so grander siprem, ek ki sa pu realize?

⁴ Bondye Zeova Li Lerwa pu tuletan, uswa Li Dirizan Siprem liniver. Li okip sa pozisyon la parski Li mem ki finn kre tu kitsoz. (1 Kronik 29:11; Psom 103:19; Akt 4:24) Me Rwayom ki Zezi ti pe prese li segonder, uswa li inferyer ar reyn siprem Bondye dan liniver. Rwayom Mesi ena enn proze presi, me ki proze sa?

⁵ Kuma sapit 6 finn explike, premye zom ek premye fam finn rebel kont lotorite Bondye. Akoz bann kestyon ki finn suleve, Zeova finn desid fer enn nuvo demonstrasyon so grander siprem. Bondye finn anons so proze pu fer enn “semans” paret; li pu kraz latet Serpan Satan, ek tir tu bann konsekans pese ki bann dimunn finn erite. Reprezantan prinsipal sa “semans” la li Zezi Kris, ek “rwayom Bondye” reprezant mwayin ki Bondye pu servi pu detrir Satan net. Par mwayin sa Rwayom la, Zezi Kris pu reyn lor later onon Zeova, ek li pu rann Bondye so drwa siprem pu tuletan.—Zenez 3:15; Psom 2:2-9.

6, 7. (a) Kot Rwayom la ete, ek kisannla Lerwa ek bann dirizan asosye dan sa Rwayom la? (b) Lor kisannla sa Rwayom la dirize?

⁶ Enn versyon Labib finn tradir bann parol ki Zezi ti dir bann Farizyin kumsa: “Rwayom Bondye andan zot.” (Lik 17:21, Segond) Eski Zezi ti rod dir ki Rwayom li dan move leker sa bann dimunn malonet la? Non. Get seki enn tradiksyon Grek orizinal ki pli egzak dir: “Rwayom Bondye parmi zot.” (Traduction du monde nouveau) Zezi ki ti parmi zot ti prezant li mem kuma fitir Lerwa. Rwayom Bondye pa enn kitsoz ki dan leker enn dimunn, me li enn vre guvernman, enn guvernman ki fonksyone, avek enn dirizan ek enn lepep ki sumet ar Li. Li enn guvernman dan lesyel, parski Labib apel li “rwayom lesyel” ek “rwayom Bondye.” (Matye 13:11; Lik 8:10) Dan enn vizyon, profet Danyel finn truv Dirizan sa rwayom la resanble “enn kikenn ki kuma garson zom” ek li finn vinn devan Bondye Tu-Pwisan. Li finn gayn “dominasyon, dinite, ek rwayom, pu ki bann pep, nasyon ek bann lang, zot tu servi li.” (Danyel 7:13, 14) Kisannla sa Lerwa la? Ebyin, Labib apel Zezi Kris “Garson enn zom.” (Matye 12:40; Lik 17:26) Wi, Zeova finn swazir so Garson, Zezi Kris, pu vinn Lerwa.

⁷ Zezi pa diriz tusel. Avek li ena 144,000 ki “finn aste lor later” pu vinn so bann lerwa ek so bann pret asosye. (Revelasyon 5:9, 10; 14:1, 3; Lik 22:28-30) Bann ki pu viv dan reyn Rwayom Bondye pu sumet ar direksyon Kris kuma enn sel fami. (Psom 72:7, 8) Me kuma eski nu sir ki sa Rwayom la pu vremem rann Bondye so drwa siprem ek reamenn enn paradi lor later?

RWAYOM BONDYE REEL

8, 9. (a) Ki legzanp nu kapav servi pu montre ki nu kapav ena konfyans dan bann promes Rwayom Bondye? (b) Kifer eski nu kapav sir ki Rwayom li reel?

⁸ Fer kuma dir u lakaz finn brile. Asterla, enn kamarad ki ena bann mwayin, promet u ki li pu reranz u lakaz ek li pu donn u fami manze. Si sa kamarad la finn tuletan koz laverite ar u, eski u pa pu krwar seki li pe dir u? Sipoze ki landemin kan u sorti travay, u truve ki bann travayer finn fini kumans netway bann dezord, ek u fami finn gayn manze. San okenn dut u pu ena ful konfyans ki amezir letan pase, u sityasyon pa pu zis retabli, me li pu vinn pli bon ki avan.

⁹ Pareyman Bondye donn nu lasirans ki Rwayom la li reel. Kuma liv Labib Ebre montre, buku parti dan Lalwa ti pe reprezant laranzman ki Bondye ti fer pu sa Rwayom la. (Ebre 10:1) Rwayom Izrael lor later ti pe donn enn avangu kuma Rwayom Bondye ti pu ete. Rwayom Izrael pa ti enn guvernman ordiner, parski bann lerwa ti pe asiz lor “tronn Zeova.” (1 Kronik 29:23) Anplis, ti anonse: “Baton rwayal pa pu kit Zida, ni baton komandan pu sorti ant so lipye, ziska ki Silo vini; ek tu bann pep pu bizin obeir li.” (Zenez 49:10)a Wi, dan desandans sa bann lerwa la setadir desandans Zida, ki Zezi, Lerwa permanan guvernman Bondye, ti pu bizin ne.—Lik 1:32, 33.

10. (a) Kan eski Rwayom Mesi Bondye finn etabli? (b) Dan ki travay inportan bann fitir dirizan asosye Zezi ti pu pran latet lor later?

¹⁰ Kan Zezi ti swazir so bann zapot, li ti poz fondasyon pu sa Rwayom Mesi ki Bondye finn etabli la. (Efezyin 2:19, 20; Revelasyon 21:14) Bann zapot ti bann premye manb 144,000 ki ti pu al dirize dan lesyel kuma bann lerwa ki asosye ar Zezi Kris. Pandan ki zot ti pu ankor lor later, sa bann fitir dirizan la ti pu pran latet dan enn kanpayn temwaynaz, dapre komannman Zezi: “Ale . . . ek fer bann dimunn dan tu bann nasyon vinn bann disip, batiz zot onon Papa, onon Garson ek onon lespri sin.”—Matye 28:19.

11. Kuma eski travay predikasyon Rwayom pe fer zordi, ek ki sa pe realize?

¹¹ Zordi, bann Temwin Zeova pe obeir komannman fer bann disip avek enn pli gran lelan. Zot pe anons bon nuvel lor Rwayom partu atraver later, parey kuma Zezi ti anonse: “Sa bon nuvel lor rwayom la pu prese partu kot dimunn reste lor later kuma enn temwaynaz pu bann nasyon; ek lerla lafin pu vini.” (Matye 24:14) Enn gran program lanseynman pe fer dan lemond antye parski sa usi fer parti dan travay predikasyon sa Rwayom la. Bann ki respekte bann lalwa ek bann prinsip Rwayom Bondye pe konn depi asterla mem lape ek linite ki bann guvernman lor later pa kapav done. Tusala montre klerman ki Rwayom Bondye reel!

12. (a) Kifer eski li normal apel bann proklamater Rwayom bann Temwin Zeova? (b) Ki diferans ena ant Rwayom Bondye ek bann guvernman lor later?

¹² Zeova ti dir bann Izraelit: “Zot mo bann temwin, . . . mo serviter ki mo finn swazire.” (Izai 43:10-12) Zezi, “Temwin Fidel,” finn anons avek zel bon nuvel lor Rwayom. (Revelasyon 1:5; Matye 4:17) Donk, li normal ki bann proklamater Rwayom zordi zur apel Temwin Zeova. Me kifer eski bann Temwin depans buku letan ek zefor pu koz lor Rwayom Bondye ar lezot? Zot fer sa parski Rwayom, sa mem sel lespwar pu bann dimunn. Demin, apredemin, bann guvernman imin zot pu kase, me zame sa pa pu arive ar Rwayom Bondye. Izai 9:6, 7 apel Zezi, Dirizan sa Rwayom la, “Prins Lape” ek li azute: “Labondans so dominasyon kuma prins ek lape zame pa pu fini.” Rwayom Bondye pa kuma bann guvernman lor later—zordi zot la, demin zot nepli la. Zisteman, Danyel 2:44 dir: “Bondye lesyel pu etabli enn rwayom ki zame pa pu rwine. Ek pa pu donn enn lot lepep sa rwayom la. . . . Li mem pu res la pu tuletan.”

13. (a) Ki bann problem Rwayom Bondye pu reysi regle? (b) Kifer nu kapav sir ki bann promes Bondye pu realize?

¹³ Ki lerwa lor later pu kapav tir net lager, krim, maladi, lafaminn ek problem lozman? Anplis, ki dirizan lor later kapav resisit bann mor? Rwayom Bondye ek so lerwa pu dres sa bann kitsoz la. Rwayom pa pu enn guvernman bankal, parey kuma sa laparey ki anpann sak fwa ek ki bizin tuletan reparasyon. Okontrer, Rwayom Bondye pu reysi, parski Zeova fer sa promes la: “Parol ki sorti dan mo labus . . . pa pu return ar mwa san rezilta, me li pu vremem realiz kitsoz ki mo finn kontan, ek vremem li pu reysi dan sa kitsoz ki mo finn avoy li la.” (Izai 55:11) Proze Bondye pa pu tom dan delo, me kan eski reyn Rwayom ti bizin kumanse?

REYN RWAYOM—KAN?

14. Ki kitsoz bann disip Zezi ti mal konpran konsernan Rwayom, me ki Zezi ti kone konsernan so reyn?

¹⁴ “Senyer, eski asterla mem ki to pu retabli rwayom Izrael?” Par sa kestyon la, bann disip Zezi ti montre ki ziska ler zot pa ti ankor konn proze Rwayom Bondye, ni lepok fixe kan so reyn ti pu kumanse. Me, Zezi finn met zot an gard ki zot bizin pa kas zot latet ar sa bann kitsoz la; li finn dir zot: “Zot pa gayn drwa konn bann letan ek lepok ki [zot] Papa finn plase dan so prop puvwar.” Zezi ti kone ki so reyn lor later ti pu dan lavenir, byin apre so rezireksyon ek apre ki li ti pu mont dan lesyel. (Akt 1:6-11; Lik 19:11, 12, 15) Bann Lekritir ti anons sa. Kuma?

15. Ki manyer Psom 110:1 donn nu plis eklersisman lor lepok ki Zezi ti pu dirize?

¹⁵ Dan enn profesi, Lerwa David ti apel Zezi “Senyer,” kan li ti dir: “Sa mem ki Zeova finn dir mo Senyer: ‘Asiz dan mo drwat ziska ki mo plas to bann lennmi kuma enn stul pu to lipye.’” (Psom 110:1; konpar ar Akt 2:34-36) Sa profesi la indike ki Zezi pa ti pu kumans reyne deswit apre ki li finn mont dan lesyel. Me plito ki li ti pu atann dan drwat Bondye. (Ebre 10:12, 13) Pu komye letan eski li ti pu bizin atann? Kan eski sa reyn la ti pu kumanse? Labib ed nu pu truv repons sa bann kestyon la.

16. Ki finn arive an 607 A.N.L., ek ki rapor sa ena avek Rwayom Bondye?

¹⁶ Zerizalem ti sel lavil lor later kot Zeova ti plas so non. (1 Lerwa 11:36) Li ti usi kapital rwayom ki Bondye ti aksepte lor later ek ki ti reprezant Rwayom Bondye dan lesyel. Donk, destriksyon Zerizalem par bann Babilonyin an 607 A.N.L. ti enn levennman inportan. Avek sa levennman la, enn long peryod letan finn kumanse kot Bondye ti pu nepli reyn direk lor bann dimunn lor later. Apepre sis syek plitar, Zezi ti indike ki sa long peryod letan la ti pe ankor kontinye, parski li ti dir: “Bann nasyon pu kraz Zerizalem anba zot lipye, ziska ki letan fixe bann nasyon konplete.”—Lik 21:24.

17. (a) Ki ete “letan fixe bann nasyon,” ek komye letan sa ti pu bizin dire? (b) Kan “letan fixe bann nasyon” finn kumanse ek kan li finn fini?

¹⁷ Pandan “letan fixe bann nasyon,” bann guvernman lemond ti pu ranplas reyn ki Bondye ti aksepte. Sa peryod letan la finn kumanse avek destriksyon Zerizalem an 607 A.N.L., ek Danyel finn indike ki sa peryod la ti pu dir “set letan.” (Danyel 4:23-25) Komye letan sa fer? Labib montre ki trwa “tan” edmi egal 1,260 zur. (Revelasyon 12:6, 14) De fwa sa peryod la, uswa set letan egal 2,520 zur. Me okenn levennman remarkab pa finn arive kan 2,520 zur finn fini. Me, si nu aplik prinsip “enn zur pu enn lane” dan profesi Danyel, ek nu kont 2,520 lane apartir 607 A.N.L., nu pu tom lane 1914 N.L.—Nonm 14:34; Ezekyel 4:6.

18. Ki Zezi finn fer deswit apre ki li finn gayn puvwar dan Rwayom, ek ki lefe sa finn ena lor later?

¹⁸ Eski Zezi ti kumans dirize dan lesyel sa lane la? Dan prosin sapit, nu pu egzaminn bann rezon dan Labib kifer nu dir ki li finn kumans dirize sa dat la. Byinsir, kan Zezi ti pu kumans dirize pa ti pu ena lape tutswit lor later. Revelasyon 12:7-12 montre ki zis apre ki Zezi ti pu gayn Rwayom, li ti pu pus Satan ek so bann anz demon andeor lesyel. Sa ti pu vedir maler pu later, me li ankurazan pu lir ki Dyab res zis “enn tigit letan.” Byinto, nu pu kapav konn lazwa pa zis parski Rwayom Bondye pe dirize me usi parski li pu amenn bann benediksyon lor later ek lor bann dimunn ki obeir Bondye. (Psom 72:7, 8) Kuma eski nu kone ki sa pu arive byinto?

[Not]

TESTE U KONESANS

Ki ete Rwayom Bondye, ek depi ki kote li pe reyne?

Kisannla ki dirize dan Rwayom la, ek lor kisannla sa Rwayom la pu guverne?

Kuma Zeova donn nu lasirans ki Rwayom la li reel?

Kan eski “letan fixe bann nasyon” finn kumanse ek kan eski sa finn fini?

[Lankadre paz 94]

DETRWA LEVENNMAN INPORTAN KI KONSERN RWAYOM BONDYE

• Zeova anons so lintansyon pu fer enn “semans” paret, li pu kraz latet Serpan, Satan Dyab..—Zenez 3:15.

• An 1943 A.N.L., Zeova indike ki “semans” la ti pu enn desandan Abraam.—Zenez 12:1-3, 7; 22:18.

• Lalyans Lalwa ki Bondye ti donn Izrael an 1513 A.N.L., ti “enn lonbraz bann kitsoz ki ti pu vini.”—Egzod 24:6-8; Ebre 10:1.

• Rwayom Izrael lor later kumans an 1117 A.N.L., ek li kontinye apre dan desandans David.—1 Samyel 11:15; 2 Samyel 7:8, 16.

• Zerizalem finn detrir an 607 A.N.L., ek “letan fixe bann nasyon” kumanse.—2 Lerwa 25:8-10, 25, 26; Lik 21:24.

• Dan lane 29 N.L., Zezi finn swazire kuma Lerwa-Nome ek li finn kumans so minister lor later.—Matye 3:16, 17; 4:17; 21:9-11.

• Dan lane 33 N.L., Zezi finn mont dan lesyel pu al atann dan kote drwat Bondye ziska ki so reyn kumanse.—Akt 5:30, 31; Ebre 10:12, 13.

• Zezi finn mont lor tronn Rwayom dan lesyel an 1914 N.L. kan “letan fixe bann nasyon” finn fini.—Revelasyon 11:15.

• Finn pus Satan ek so bann demon dan vwazinaz later ek sa finn ogmant maler bann dimunn.—Revelasyon 12:9-12.

• Zezi pe diriz travay predikasyon Rwayom Bondye ki pe fer dan lemond antye.—Matye 24:14; 28:19, 20.