Sapit 12
Reziste Kont Bann Move Lespri
1. Kuma eski Zezi ti reazir kan li ti fer fas ar bann move lespri?
TUTSWIT apre so batem, Zezi ti al priye ek medite dan dezer Zide. Laba, Satan Dyab finn rod fer li dezobeir lalwa Bondye. Me Zezi pa finn tranp dan so lasos ek li pa finn tom dan so pyez. Pandan so minister lor later, Zezi finn fer fas ar bann lezot move lespri. Selman, sak fwa li finn repran zot ek li finn reziste kont zot.—Lik 4:1-13; 8:26-34; 9:37-43.
2. Ki bann kestyon nu pu al egzamine?
2 Bann resi Labib ki rakont sa bann levennman la, bizin konvink nu ki bann move lespri egziste. Zot rod anbet bann dimunn. Me, nu kapav reziste kont zot. Kot bann move lespri sorti? Kifer eski zot rod anbet bann dimunn? Ek ki bann metod zot servi pu ki zot kapav reysi fer seki zot anvi? Si nu reysi truv repons sa bann kestyon la, sa pu ed nu pu reziste kont bann move lespri.
BANN MOVE LESPRI—KOT ZOT SORTI EK KI ZOT LINTANSYON
3. Kuma eski Satan Dyab finn paret?
3 Avan ki Li kre dimunn, Bondye Zeova finn kre buku anz. (Zob 38:4, 7) Kuma Sapit 6 finn explike, enn parmi sa bann anz la finn anvi ki tu bann dimunn ador li olye ki zot ador Zeova. Pu reysi so lintansyon, li finn reziste kont Kreater ek li finn koz an mal lor Li, ek li finn mem rod fer premye fam krwar ki Bondye enn manter. Akoz sa, sa anz rebel la finn gayn non Satan (lennmi) ek Dyab (kikenn ki koz an mal lor lezot).—Zenez 3:1-5; Zob 1:6.
4. Ki pese eski sertin anz finn fer dan lepok Noe?
4 Plitar, lezot anz finn swiv Satan Dyab. Dan lepok Noe, ki ti enn zom drwat, sertin sa bann anz la ti kit zot servis dan lesyel ek finn pran bann lekor dimunn pu satisfer zot dezir pu gayn relasyon sexyel avek bann fam lor later. Pena dut, Satan mem ki finn inflyans zot dan sa move simin la. Lerla, sa bann anz la finn vinn papa bann zanfan ki ti finn erit bann tre anz ek bann tre dimunn; ti apel zot bann Nefilim parski zot ti brit ek zot ti pe fer dominer. Kan Zeova finn amenn enn gran Deliz, tu bann dimunn move ek tu bann desandan sa bann anz rebel la, finn detrir. Me, bann anz la finn reysi sape parski zot finn repran zot lekor spirityel pu return dan lesyel. Me selman, Bondye finn met zot deor dan marenwar spirityel. (Zenez 6:1-7, 17; Zid 6) Pa pu sa ki Satan, “sef bann demon,” ek so bann move anz finn aret rebele kont Bondye, okontrer zot pe kontinye. (Lik 11:15) Ki zot lintansyon?
5. Ki lintansyon Satan ek so bann demon, ek ki zot servi pu pyez bann dimunn?
5 Satan ek so bann demon ena enn move lintansyon, zot anvi deturn bann dimunn kont Bondye Zeova. Donk, tutlong listwar imin, zot finn anbet bann dimunn, fer zot gayn per, ek mem atak zot. (Revelasyon 12:9) Bann legzanp modern montre ki bann latak demon buku pli sovaz ki avan. Pu pyez bann dimunn, bann demon suvan servi tu sort kalite form spiritis. Kuma eski bann demon servi sa labwet la, ek kuma eski u kapav protez u kont sa?
KUMA BANN MOVE LESPRI SEY ANBET U
6. Ki ete spiritis, ek ki bann form spiritis ki ena?
6 Ki ete spiritis? Spiritis vedir gayn kontak avek bann demon uswa bann move lespri dan enn fason direk uswa atraver enn dimunn ki pratik sa. Parey kuma enn peser servi labwet pu atir bann pwason, bann demon servi spiritis kuma enn labwet pu atir bann dimunn. Ek parey kuma enn peser servi tu sort kalite labwet pu may bann pwason, bann move lespri usi servi plizir form spiritis pu amenn bann dimunn anba zot linflyans. (Konpar avek Psom 119:110) Ala detrwa form spiritis: Servi bann mwayin pu konn lavenir, mazik, predir lavenir, sorselri, zet sor mazik, get treter, ek koz avek bann mor.
7. Ki kantite spiritis li popiler, ek kifer eski li byin renome dan bann peyi swadizan Kretyin?
7 Spiritis li enn labwet ki byin marse, parski dan lemond antye li atir enn kantite dimunn. Alor ki bann abitan vilaz al get treter, bann travayer biro dan lavil al get astrolog. Spiritis byin popiler mem dan bann peyi ki swadizan Kretyin. Bann resers indike ki zis dan Lamerik, anviron 30 magazinn—antu 10,000,000 kopi—koz zis lor bann diferan form spiritis. Tulelane, bann Brezilyin depans plis ki 500 milyar dolar lor bann obze spiritis. Purtan, 80 pursan parmi bann ki frekant bann sant spiritis dan sa peyi la, zot bann Katolik batize ki al Lames. Pa fini, pwiski mem bann pret pratik spiritis, buku dimunn relizye krwar ki Bondye aksepte sa pratik la. Me eski vremem Li aksepte sa?
KIFER ESKI LABIB KONDANN BANN PRATIK SPIRITIS
8. Ki Labib dir lor spiritis?
8 Si u finn aprann ki sertin form spiritis permet u rant an kontak avek bann bon lespri, kitfwa u pu etone kan u pu aprann seki Labib dir lor spiritis. Zeova ti averti so pep: “Pa bizin turn zot ver bann treter, ek pa al get bann ki konn predir bann levennman, pu ki bannla pa sali zot.” (Levitik 19:31; 20:6, 27) Liv Labib Revelasyon donn nu warning ki “bann ki pratik spiritis” pu al fini dan “lak dife ek suf. Sa vedir dezyem lamor [lamor pu tuletan].” (Revelasyon 21:8; 22:15) Bondye Zeova pa aksepte okenn form spiritis. (Deteronom 18:10-12) Kifer sa?
9. Kifer eski nu kapav dir ki zordi pa Zeova ki avoy bann mesaz ki sorti dan landrwa kot bann lespri ete?
9 Kan Labib pa ti ankor konplete, Zeova ti avoy bann bon lespri, bann anz drwat pu koz avek bann dimunn. Me, depi ki Parol Bondye finn konplete, li finn vinn enn gid ki bann dimunn bizin pu servi Zeova fason ki fer Li plezir. (2 Timote 3:16, 17; Ebre 1:1, 2) Bondye pa pu met so Parol sakre dan enn kwin, pu donn bann mesaz atraver bann treter. Zordi zur, bann move lespri ki avoy tu sa bann mesaz la. Enn dimunn ki pratik spiritis kapav atake par bann demon, uswa posede par bann move lespri. Akoz sa, avek lamur Bondye met nu an gard pu nu pa gayn zafer avek okenn bann pratik spiritis. (Deteronom 18:14; Galat 5:19-21) Me, si nu kontiyn pratik spiritis malgre ki nu kone seki Zeova panse lor la, nu pu montre ki nu sutenir bann move lespri rebel ek nu pu vinn lennmi Bondye.—1 Samyel 15:23; 1 Kronik 10:13, 14; Psom 5:4.
10. Ki bann mwayin pu konn lavenir, ek kifer eski nu bizin rezet sa?
10 Servi bann mwayin pu sey konn lavenir, sa li enn form spiritis byin popiler. Sa mwayin la swadizan permet u konn lavenir, uswa bann kitsoz ki u pa kapav kone san led bann lespri. Ena plizir fason pu fer sa: astrolozi, get dan bul kristal, interpret bann rev, lir dan lamin, bat kart pu get destin. Buku konsider sa form spiritis la kuma enn distraksyon san danze; me Labib montre ki bann ki pratik sa bann kitsoz la, pe mars lamin dan lamin avek bann demon. Par egzanp, Akt 16:16-19 mansyonn “enn demon ki predir lavenir” ki ti donn enn zennfi “puvwar pu anons lavenir.” Me kan finn pus demon la, tifi la finn perdi so puvwar. Donk, li kler ki bann demon servi bann mwayin pu konn lavenir kuma enn labwet pu pyez bann dimunn.
11. Kifer eski koz ar dimunn mor, li enn pyez sa?
11 Si u pe sufer akoz lamor enn manb u fami, uswa enn kamarad pros, u kapav tante fasilman par enn lot kalite labwet. Enn treter kapav donn u bann ranseynman egzak lor sa dimunn mor la, uswa li kapav mem koz avek enn lavwa ki parey kuma lavwa sa dimunn ki finn mor la. Fer byin atansyon! Si u rod koz avek bann dimunn mor, u pu tom dan pyez. Kifer? Parski bann dimunn mor pa kapav koze. Kuma kitfwa u ankor rapel, Parol Bondye dir klerman ki kan enn dimunn mor, li “return dan so later; sa zur la mem so bann panse fini net.” Bann mor “pa konn nanyin ditu.” (Psom 146:4; Eklezyast 9:5, 10) Me kan nu get byin, bann demon ki renome pu sa; zot koz avek lavwa ki parey kuma lavwa sa dimunn mor la, ek zot donn enn treter bann ranseyman lor sa dimunn mor la. (1 Samyel 28:3-19) Alor, enn “kikenn ki kestyonn bann mor” pe les bann move lespri pyez li, ek li pe azir kont volonte Bondye Zeova.—Deteronom 18:11, 12; Izai 8:19.
ATIRE, APRE ATAKE
12, 13. Ki prev ena ki bann demon kontiyn tant bann dimunn ek atak zot?
12 Si u swiv konsey Parol Bondye lor spiritis, u pa pu manz labwet bann demon. (Konpar avek Psom 141:9, 10; Romin 12:9.) Eski sa vedir ki bann demon pu aret sey pyez u? Non! Apre ki Satan finn tant Zezi trwa fwa, li “finn ale ziska ki li truv enn lot lokazyon.” (Lik 4:13) Pareyman, bann lespri teti pa selman atir bann dimunn, me usi atak zot.
13 U rapel, nu ti egzamine kuma Satan ti atak serviter Bondye, Zob. Dyab finn fer li perdi tu so bann zanimo, ek li finn tuy laplipar so bann serviter. Satan finn mem tuy bann zanfan Zob. Apre sa, li finn donn li enn maladi ki finn fer li sufer buku. Me Zob finn gard enn latasman fidel ar Bondye, ek Bondye finn byin beni li pu sa. (Zob 1:7-19; 2:7, 8; 42:12) Depi sa, bann demon finn fer sertin dimunn aret koze, uswa vinn aveg, ek zot finn kontiyn pran plezir pu fer bann dimunn sufer. (Matye 9:32, 33; 12:22; Mark 5:2-5) Zordi, bann rapor montre ki bann demon kontiyn turmant bann dimunn lor plan sexyel, ek zot fer sertin perdi latet. Zot pus lezot pu fer krim ek pu swisid zot, bann kitsoz ki Bondye konsider kuma pese. (Deteronom 5:17; 1 Zan 3:15) Kan mem sa, buku dimunn ki ti pe domine par bann move lespri, finn kapav libere. Kuma eski zot finn kapav libere? Zot finn reysi parski zot finn fer bann pa ki byin-byin inportan.
KUMA REZISTE KONT BANN MOVE LESPRI
14. Dapre legzanp bann Kretyin Efez premye syek, kuma eski u kapav reziste kont bann move lespri?
14 Ki sa enn fason ki ed u pu reziste kont bann move lespri pu protez u mem ek u fami kont zot bann pyez? Bann Kretyin Efez premye syek, ki ti pe pratik spiritis, finn fer bann pa byin-byin inportan kan zot finn gayn laverite. Nu lir ki “buku bann ki ti pe pratik mazik finn met tu zot bann liv ansam, ek finn bril zot devan tu dimunn.” (Akt 19:19) Mem si zame u pa finn pratik spiritis, u bizin zet tu bann kitsoz ki kapav ankuraz spiritis, kuma par egzanp bann liv, bann magazinn, bann kaset video, bann poster, bann latres lamizik, ek bann lezot kitsoz ki kapav servi pu spiritis. Ena usi bann idol, bann portboner, bann lezot kitsoz ki dimunn mete swadizan pu gayn proteksyon, ek mem bann kado ki bann ki pratik spiritis finn ofer. (Deteronom 7:25, 26; 1 Korintyin 10:21) Anu pran enn legzanp: Pandan lontan, demon ti pe fatig enn kup ki viv dan Tayland. Zot finn zet tu bann kitsoz ki ena enn rapor avek spiritis. Lerla, ki finn arive? Ebyin demon finn aret atak zot net, ek apre sa, zot finn kapav fer bann vre progre spirityel.
15. Pu reziste kont bann move lespri, ki pa byin inportan u bizin fer ankor?
15 Pu kapav reziste kont bann move lespri, u bizin fer enn lot pa byin inportan: Met lor u tu bann ekipman lager spirityel Bondye, parey kuma lapot Pol ti konseye. (Efezyin 6:11-17) Bann Kretyin bizin fortifye zot defans kont bann move lespri. Ki sa vedir? Lapot Pol finn dir, “Anplis tusala, pran sirtu gran bukliye lafwa, avek ki zot pu kapav teyn bann misil dife ki sa kikenn move la pu avoy lor zot.” Wi, plis u lafwa for, plis u pu kapav reziste kont bann move lespri.—Matye 17:14-20.
16. Kuma eski u kapav fortifye u lafwa?
16 Kuma eski u kapav fortifye u lafwa? Kan u kontiyn etidye Labib ek aplik so bann konsey dan u lavi. Pu ki lafwa enn kikenn res for, fode ki so baz—konesans Bondye, li solid. Eski u pa dakor ki u lafwa finn fortifye grasa konesans egzak ki u finn gayne ek ki u finn pran serye-serye grasa u letid Labib? (Romin 10:10, 17) Donk, pena dut ki amezir u kontiyn etidye ek pran labitid asiste bann reynion Temwin Zeova, u lafwa pu vinn ankor pli for. (Romin 1:11, 12; Kolosyin 2:6, 7) Li pu kuma enn ranpar solid kont bann latak demon.—1 Zan 5:5.
17. Ki bann lezot pa byin-byin inportan u bizin fer pu reziste kont bann move lespri?
17 Si enn kikenn finn byin deside pu reziste kont bann move lespri, ki bann lezot pa li bizin fer? Bann Kretyin Efezyin ti bizin proteksyon parski zot ti pe viv dan enn lavil ranpli ar demon. Akoz sa, Pol finn dir zot: “Kontinye priye dan tu lokazyon, dan lespri.” (Efezyin 6:18) Pwiski nu pe viv dan enn lemond ranpli ar demon, nu bizin fer bann lapriyer profon ar Bondye pu nu kapav gayn so proteksyon ek reziste kont bann move lespri. (Matye 6:13) Nu kapav profit usi led spirityel ek lapriyer bann ansyin dan kongregasyon Kretyin.—Zak 5:13-15.
KONTIYN LAGER KONT BANN MOVE LESPRI
18, 19. Ki kapav fer si bann demon fatig enn dimunn ankor?
18 Mem apre ki sertin finn fer bann pa neseser, bann demon finn kontiyn fatig zot. Zisteman, enn zom dan Côte d’Ivoire (Kotdivwar) finn etidye Labib avek bann Temwin Zeova, ek li finn detrir tu so bann portboner. Apre, li finn fer bann bon progre, li finn angaz so lavi ar Zeova, ek li finn batize. Me, enn semenn apre so batem, bann demon finn kumans fatig li ankor, ek li finn tann bann lavwa ki ti pe dir li kit laverite. Si sa finn ariv u, eski sa vedir ki u finn perdi proteksyon Zeova? Pa neseserman.
19 Mem ki Zezi, enn zom parfe, ti ena proteksyon Bondye, li finn tann lavwa move kreatir spirityel, Satan Dyab. Zezi finn montre ki bizin fer dan enn sityasyon kumsa. Li ti dir Dyab: “Sorti la, ale, Satan!” (Matye 4:3-10) Kumsa mem, u’si, u bizin refiz ekut bann lavwa ki sorti dan landrwa kot bann lespri ete. Kriye Zeova pu u gayn led pu reziste kont bann move lespri. Wi, priye for, servi non Bondye. Proverb 18:10 dir: “Non Zeova li enn latur for. Enn kikenn drwat ki galup ver sa latur la, gayn proteksyon.” Sa mem seki sa Kretyin Kotdivwar la finn fer, ek lerla bann move lespri finn aret fatig li.—Psom 124:8; 145:18.
20. An rezime, ki u kapav fer pu reziste kont bann move lespri?
20 Zeova finn permet bann move lespri kontiyn egziste, me Li montre so pwisans, sirtu an faver so pep, ek so non pe anonse partu lor later. (Egzod 9:16) Si u res pros ar Bondye, u pa pu bizin per bann move lespri. (Nonm 23:21, 23; Zak 4:7, 8; 2 Pyer 2:9) Zot puvwar ena enn limit. Dan zur Noe, Bondye ti pini zot; ek dan nu lepok zot finn gayn puse depi dan lesyel, ek asterla zizman final pe atann zot. (Zid 6; Revelasyon 12:9; 20:1-3, 7-10, 14) Avredir, zot byin per destriksyon ki pe vini. (Zak 2:19) Alor, mem si bann move lespri atir u par ninport ki kalite labwet, uswa atak u par ninport ki fason, u kapav reziste kont zot. (2 Korintyin 2:11) Rezet tu bann form spiritis, aplik bann konsey Parol Bondye, ek rod faver Zeova. Fer sa san tarde, parski si u reziste kont bann move lespri, u pu gayn lavi!
TESTE U KONESANS
Kuma eski bann move lespri sey anbet bann dimunn?
Kifer eski Labib kondann spiritis?
Kuma eski enn dimunn kapav libere net ar bann move lespri?
Kifer eski u bizin kontiyn reziste kont bann move lespri?
[Zimaz paz 110]
Kuma eski u konsider bann diferan form spiritis?