Leson 2

Kisannla Bondié?

Kisannla vrai Bondié ek couma Li appelé? (1, 2)

Ki qualité lekor Li ena? (3)

Ki bann qualité extraordinaire Li ena? (4)

Eski nou bizin servi bann zimage ek bann statue pou prié Li? (5)

Cite deux fason ki permette nou konn Bondié pli bien. (6)

1. Dimoune prié beaucoup kitsoz. Mais la Bible dire nou ki ena enn sel VRAI Bondié. Li-mem ki finn crée tou kitsoz dan le ciel ek lor la terre. Nou bizin prié zis Li tousel parski Li-mem ki finn donne nou la vie.—1 Corinthiens 8:5, 6; Révélation 4:11.

2. Bondié ena beaucoup titre mais Li ena enn sel nom. Li appel JÉHOVAH. Dan beaucoup la-Bible, nom Bondié finn remplacé par bann titre couma SEIGNEUR ou-soit BONDIÉ. Pourtant, kan ti ecrire la Bible, nom Jéhovah ti parette apepré 7,000 fois!—Exode 3:15; Psaume 83:18.

3. Jéhovah ena enn lekor, mais seulement so lekor pa pareil couma pou nou. La Bible dire: “Bondié Li enn l’Esprit.” (Jean 4:24) Enn l’esprit li enn qualité la-vie ki beaucoup pli superieur ki nou. Jamais personne pa finn trouve Bondié. Jéhovah reste dan le ciel, mais Li kapav trouve tou kitsoz. (Psaume 11:4, 5; Jean 1:18) Mais alors, ki été l’esprit saint? Li pa enn kikenn, couma Bondié. Li plutot la force ki Bondié servi pou faire kitsoz.—Psaume 104:30.

4. La Bible faire nou decouvert personnalité Jéhovah. Li montré nou ki Li ena bann qualité extraordinaire couma l’amour, la justice, la sagesse ek enn grand la-force. (Deutéronome 32:4; Job 12:13; Isaïe 40:26; 1 Jean 4:8) La Bible dire nou aussi ki Li enn Bondié ki ena pitié, ki bon, ki pardonné, ki bon-coeur ek ki ena patience. Pareil couma bann zenfant obeissant, nou bizin essaye faire pareil couma Li.—Éphésiens 5:1, 2.

5. Eski nou bizin mette-nou a genoux devant bann zimage, bann photo, ou-soit bann statue kan nou prié? Non! (Exode 20:4, 5) Jéhovah dire ki nou bizin prié Li tousel. Li pa pou partage so la-gloire avek personne, ni avek enn lot kitsoz. Bann zimage pa kapav aide nou.—Psaume 115:4-8; Isaïe 42:8.

6. Couma nou kapav konn Bondié pli bien? Guette bien bann kitsoz ki Li finn crée, ek apré reflechi lor seki sa bann kitsoz-la montré nou lor Bondié, sa li enn fason pou bien konn Bondié. Bann kitsoz ki Bondié finn crée montré nou ki Li ena enn grand la-force ek enn grand sagesse. Nou trouve so l’amour dan tou seki Li finn faire. (Psaume 19:1-6; Romains 1:20) Etudié la Bible, li enn lot fason encore pou bien konn Bondié, parski ladan nou aprann encore plus couma Bondié été. Li aussi faire nou konn seki Li pou faire ek seki Li oulé nou faire.—Amos 3:7; 2 Timothée 3:16, 17.

[Zimage, page 5]

Nou aprann konn Bondié a travers la creation ek la Bible