Leson 7
Vinn proche avek Bondié par la priere
Kifer li important prié souvent? (1)
Kisannla nou bizin prié, ek couma eski nou bizin faire sa? (2, 3)
Pou ki kitsoz li bon nou prié? (4)
Kan eski ou bizin prié? (5, 6)
Eski Bondié ecoute tou bann la-priere? (7)
1. Prié Bondié vedir koz ar Li avek humilité. Ou bizin prié Bondié souvent. Lerla, ou pou vinn proche avek Li, pareil couma avek enn bon camarade. Mem ki Jéhovah bien grand ek bien fort, Li ecoute nou bann la-priere! Eski ou prié Bondié souvent?—Psaume 65:2; 1 Thessaloniciens 5:17.
2. La priere faire partie dan nou l’adoration pou Bondié. Alors, nou bizin prié zis Bondié, Jéhovah. Kan Jésus ti lor la terre, li pa ti prié n’importe kisannla. Li ti prié zis so Papa. Nou aussi nou bizin faire pareil. (Matthieu 4:10; 6:9) Mais seulement, nou bizin passe par nom Jésus kan nou prié. Sa montré ki nou respecté position ki Jésus occupé ek ki nou ena la foi dan sacrifice ki li finn payé pou sauve nou.—Jean 14:6; 1 Jean 2:1, 2.
3. Kan nou prié, nou bizin koz ar Bondié avek tou nou leker. Nou bizin pa recite nou bann la-priere par coeur, ou-soit nek lire dan enn livre la priere. (Matthieu 6:7, 8) N’importe ki coté nou été, n’importe ki l’heure ek dan n’importe ki position, nou kapav prié, mais pourvu ki nou position montré respé. Bondié kapav mem tann bann la-priere trankil ki nou faire dan nou leker. (1 Samuel 1:12, 13) Pou faire nou bann la-priere personnel, li bon ki nou trouve enn place trankil kot nou tousel.—Marc 1:35.
4. Pou ki kitsoz ou kapav prié? Pou tou kitsoz ki concerne ou l’amitié avek Jéhovah. (Philippiens 4:6, 7) Model la priere ki Jésus finn laissé, montré ki nou bizin prié pou nom ek volonté Jéhovah. Nou kapav aussi demann Li bann kitsoz ki necessaire pou nou vive, pardon pou nou bann peché, ek l’aide pou tini ferme kont bann tentation. (Matthieu 6:9-13) Fodé pa ki nou pense zis nou-mem dan nou bann la-priere. Nou bizin prié zis pou bann kitsoz ki en accord avek volonté Bondié.—1 Jean 5:14.
5. Ou kapav prié chaque fois ki ou leker pousse ou pou dire Bondié merci, ou-soit pou donne Li l’honneur. (1 Chroniques 29:10-13) Ou bizin prié kan ou dan problem ek kan ou la-foi pé passe par bann l’epreuve. (Psaume 55:22; 120:1) Li bon aussi ki ou prié avant ki ou mangé. (Matthieu 14:19) Jéhovah invite nou pou prié “dan tou l’occasion.”—Éphésiens 6:18.
6. Nou bizin prié surtout kan nou finn faire enn peché grave. Dan sa situation-la, nou bizin supplié Jéhovah pou ki Li gagne pitié pou nou ek Li pardonne nou. Bondié “pré pou pardonné” si nou confesse nou bann peché avek Li ek si nou faire tou seki nou kapav pou pa refaire sa mem erreur-la.—Psaume 86:5; Proverbes 28:13.
7. Jéhovah ecoute zis la priere bann dimoune ki droite. Pou ki Bondié tann ou bann la-priere, ou bizin pé faire tou seki ou kapav pou vive dapré so bann la-loi. (Proverbes 15:29; 28:9) Kan ou prié, ou bizin montré l’humilité. (Luc 18:9-14) Ou bizin vive dapré seki ou dire dan ou la-priere. Coumsa, ou pou montré ki vrai-mem ou ena la foi ek ou croire dan seki ou pé dire. Zis lerla ki Jéhovah pou reponn ou bann la-priere.—Hébreux 11:6.