Eski U Ti Pu Kontan Konn Plis Lor Labib?

Kifer Bizin Lir Labib?

LABIB pa parey kuma lezot liv. Ladan, nu truv bann linstriksyon ki Bondye donn nu dan so lamur. (1 Tesalonisyin 2:13) Si u met an pratik seki Labib anseyne, u pu tir buku profi. U pu ogmant u lamur pu Bondye ek u pu vinn pli pros ar sa Kikenn ki donn “tu don ki bon ek tu don ki parfe” la. (Zak 1:17) U pu kone kuma pu apros ar Li par lapriyer. Dan bann moman difisil, u pu santi ki Bondye pe ed u. Si u viv an akor avek bann prinsip ki finn ekrir dan Labib, Bondye pu donn u lavi pu tuletan.—Romin 6:23.

Laverite ki ena dan Labib ekler bann dimunn. Bann ki gayn konesans Labib libere ar tu bann krwayans fos ki dominn lavi plizir milyon dimunn. Par egzanp, kan nu konn laverite lor seki ariv bann dimunn mor, nu libere ar lakrint pangar zot fer nu ditor uswa pangar nu bann fami ek nu bann kamarad ki finn mor pe sufer. (Ezekyel 18:4) Lanseynman Labib lor rezireksyon rekonfort bann ki finn perdi zot pros dan lamor. (Zan 11:25) Laverite ki nu finn aprann lor bann move anz fer nu pran konsyans danze spiritis ek sa ed nu pu konpran kifer ena enn kantite difikilte lor later.

Bann prinsip ki Bondye finn done dan Labib montre nu kuma nu kapav viv enn lavi ki permet nu res byin lor plan fizik. Par egzanp, kan nu “ekilibre dan nu bann labitid”, sa favoriz enn bon lasante. (1 Timote 3:2) Kan nu ‘netway nu ek nu tir tu kitsoz ki sali nu laser ek nu lespri,’ nu evit fer nu lasante ditor. (2 Korintyin 7:1) Kan nu met an pratik bann konsey ki truv dan Labib, sa fer nu truv boner dan maryaz ek pu ogmant respe ki nu ena pu nu mem.—1 Korintyin 6:18.

Si u met Parol Bondye an pratik, u pu vinn enn dimunn pli ere. Konesans Labib fer nu truv lape ek kontantman dan nu leker, ek li donn nu enn lesperans. Li ed nu pu devlop bann kalite atiran kuma konpasyon, lamur, lazwa, lape, labonte ek lafwa. (Galat 5:22, 23; Efezyin 4:24, 32) Sa bann kalite la fer nu vinn enn meyer mari uswa enn meyer fam, enn meyer papa uswa enn meyer mama, enn meyer garson uswa enn meyer tifi.

Eski u finn deza reflesi lor lavenir? Bann profesi Labib indik nu ki nu pe viv enn lepok byin-byin inportan dan listwar bann dimunn. Sa bann profesi la pa zis dekrir kondisyon lemond ki egziste zordi, me zot usi montre ki Bondye pu fer later vinn enn paradi.—Revelasyon 21:3, 4.

Led pu Konpran Labib

Kitfwa u finn sey lir Labib, me u finn truv li difisil pu konpran. Kitfwa u pa kone kot u pu rod repons u bann kestyon dan Labib. Me, u pa tusel. Nu tu nu bizin led pu konpran Parol Bondye. Dan anviron 235 peyi, bann Temwin Zeova pe donn bann milyon dimunn enn linstriksyon gratis lor Labib. Zot pu byin kontan ed u’si.

Normalman li preferab etidye Labib tigit par tigit; u kapav kumans par bann lanseynman prinsipal. (Ebre 6:1) Amezir u kontiyn u letid, u pu kapav kumans pran “manze solid”—setadir, laverite ki pli profon. (Ebre 5:14) Labib li mem nu lotorite. Bann piblikasyon ki baze lor Labib, parey kuma brosir Ki Bondye Pe Demann Nu?, pu ed u pu konpran bann referans Labib lor diferan size.

Eski U Dispoze pu Pas Letan Sak Semenn pu Konpran Labib?

Kapav fixe enn ler ek enn plas ki aranz u pu u etidye Labib. Buku etidye kot zot mem. Ena mem ki etidye par telefonn. Sa program letid la, li pa enn klas avek buku dimunn, me li enn laranzman personel ki adapte avek u sityasyon, ek u nivo ledikasyon. U pa pu ena okenn legzamin pu pase, ek u pa pu santi u anbarase. U pu kapav gayn repons u bann kestyon lor Labib, ek u pu aprann kuma vinn pros avek Bondye.

U pena pu pey nanyin pu sa letid Labib la. (Matye 10:8) Li enn letid gratis pu tu dimunn dan ninport ki relizyon zot ete, ek usi pu bann ki pa pratik okenn relizyon me ki interese sinserman pu ogmant zot konesans Parol Bondye.

Kisannla kapav partisip dan sa letid la? Tu u fami. Ninport ki kamarad ki u anvi invite kapav usi partisipe. Uswa si u prefere, kapav fer letid ar u tusel.

Buku rezerv enertan sak semenn pu etidye Labib. Si u kapav pas plis letan uswa u pena ase letan tulesemenn, bann Temwin pu dispoze pu ed u.

Enn Linvitasyon pu Aprann

Nu invit u kontakte bann Temwin Zeova. Pu kontakte zot, u kapav ekrir lor enn sa bann ladres anba la. Lerla, zot pu fer bann laranzman pu ki enn kikenn fer enn letid Labib gratis avek u.

□ Fer mwa gayn enn kopi brosir Ki Bondye Pe Demann Nu?

□ Silvuple, kontakte mwa pu mo gayn enn letid Labib.

Amwin ki finn indike, tu bann tex Labib finn tradir depi New World Translation of the Holy Scriptures.