Bann dimoune reussi sapé dan deluge

A MESURE ki ena plus dimoune lor la terre, peché ek mechanceté augmenté bien-bien vite. Hénok, ki kitfois ti sel serviteur Jéhovah dan so lepok, ti averti bann dimoune ki enn jour Bondié pou detruire bann mauvais dimoune. Malgré sa, sa mauvais situation-la ti contigné, ek ti mem deterioré. Certain ange ti rebellé kont Jéhovah kan zot ti quitte place kot Bondié ti mette zot dan le ciel, zot ti prend forme lekor bann dimoune, ek avek enn desir exageré, zot ti marié avek bann tifi lor la terre. Bann zenfant ki ti né apré sa bann mariage kont nature-la ti vinn bann geant bien-bien fort ek ti appel zot bann Nephilim. Zot ti bann brite, ek a cause zot, violence ti augmenté lor la terre, ek beaucoup dimoune ti trouve la mort. Bondié ti bien chagrin kan Li ti trouvé dan ki mauvais l’etat la terre ti’nn vini.

Apré la mort Hénok, enn zom ti montré ki li bien different dan sa le monde mauvais ki ti existé sa lepok-la. Li ti appel Noé. Li ek so famille ti essaye faire seki droite devant lizié Bondié. Kan Bondié ti decidé pou detruire bann mauvais dimoune sa lepok-la, Li ti envie protege Noé ek bann zanimo. Alors Bondié ti demann Noé pou range enn l’arche, setadir enn extra grand bateau ki ti dan forme enn rectangle. Noé ek so famille ek enn quantité zanimo different l’espece, ti pou kapav rente dan sa bateau-la pou zot kapav sapé kan enn deluge ki ti pou ena lor la terre entier, ti pou vini. Noé ti obeir Bondié. Pendant 40 ou-soit 50 an Noé ti range sa l’arche-la, ek pendant sa le temps-la li ti aussi “enn predicateur la justice.” (2 Pierre 2:5) Li ti averti bann dimoune concernant sa deluge ki ti pou vini-la, mais zot pa ti prend compte seki li ti pé dire. Ler ti’nn vini pou Noé ek so famille rente dan l’arche ensam avek bann zanimo, ek lerla Bondié ti ferme la porte l’arche. La pluie ti commence tombé.

Enn gros la pluie ti tombé la-nuit li-jour pendant 40 jour, ziska ki la terre entier ti couvert avek de l’eau. Bann mauvais dimoune ti disparette. Plusieurs mois plitar, a mesure ki de l’eau ti commence baissé, l’arche ti pose lor enn montagne. Noé ek so famille ek bann zanimo ti’nn passe enn l’année entier dan l’arche avant ki zot ti kapav sorti dehors. Pou remercié Jéhovah, Noé ti offert Li enn sacrifice. En retour, Bondié ti donne Noé ek so famille l’assurance ki jamais encore Li pa pou reamenn enn deluge pou tire tou la vie lor la terre. Jéhovah ti donne zot l’arc en ciel couma enn garantie bien visible, ki ti pou rappel zot sa promesse bien reconfortant ki Li ti faire-la.

Apré deluge, Bondié ti aussi donne bann dimoune certain nouveau commandement. Li ti donne zot permission pou mange la chair bann zanimo. Mais Li ti interdit zot pou mange di-sang. Li ti aussi donne bann descendant Noé l’ordre pou al partout lor la terre, mais certain ti desobeir. Nimrod, enn chef, ti rassemblé tou dimoune ensam ek zot ti commence range enn grand la tour dan la ville Babel, ki plitar ti appel Babylone. Zot ti envie defié l’ordre ki Bondié ti donné pou al partout lor la terre. Mais Bondié ti empeche sa rebelle-la realise zot plan kan Li ti mette enn confusion dan zot langage ek ti faire zot koz different langue. Zot ti nepli kapav comprend zot camarade, a cause sa zot ti abandonne seki zot ti pé faire ek zot ti al reste inpé partout lor la terre.

—Basé lor Genèse chapitre 6 ziska 11; Jude 14, 15.