Bondié faire enn l’alliance avek Abraham

PRESKÉ 350 an inn passé depuis ki ti ena deluge dan lepok Noé. Abraham ti pé vive dan enn la ville ki ti pé prosperé, la ville Our, dan region ki appel Iraq zordi. Abraham ti enn zom ki ti ena enn grand la foi. Mais Bondié ti testé so la foi.

Jéhovah ti dire Abraham quitte pays kot li ti né ek al dan enn pays etranger, ki apré ti appel Canaan. Abraham ti obeir sans hesité. Li ti prend Sara, so femme, so neveu Lot, ek so bann serviteur, ek apré enn longue voyage, zot ti arrive Canaan ek zot ti reste la, dan bann la tente. Jéhovah ti faire enn l’alliance avek Abraham ek Li ti promette ki Li pou faire li vinn enn grand nation, ki tou bann famille lor la terre ti pou beni grace a li, ek ki so descendance ti pou gagne pays Canaan.

Abraham ek Lot ti prosperé, zot ti gagne enn quantité troupeau mouton ek boeuf. Sans ki li guette so prop l’avantage, Abraham ti laisse Lot choisir territoire ki li ti envie. Lot ti choisir district Jourdain ki ti bien fertile ek li ti al reste pré ar la ville Sodome. Mais bann zom dan Sodome ti bien immoral, zot ti faire bann grand peché kont Jéhovah.

Jéhovah plitar ti donne Abraham l’assurance ki so descendance ti pou vinn beaucoup pareil couma bann zetoile dan le ciel. Abraham ti ena la foi dan sa promesse-la. Mais Sara, femme Abraham, ti sterile. Kan Abraham ti ena 99 an ek Sara, preské 90 an, Bondié ti dire Abraham ki zot ti pou gagne enn garson. Bondié ti tini so promesse ek Sara ti donne naissance Isaac. Abraham ti gagne lezot zenfant, mais c’est dan descendance Isaac ki sa Sauveur ki Bondié ti promette dan jardin Éden-la, ti pou apparette.

Pendant sa le temps-la, Lot ek so famille ti pé reste dan Sodome. Mais Lot, ki ti enn dimoune droite, pa ti faire pareil couma sa bann habitant immoral ki ti reste dan sa la ville-la. Kan Jéhovah ti decidé pou envoye so jugement lor Sodome, Li ti envoye bann ange pou al averti Lot lor sa destruction ki ti pou vini-la. Bann ange ti dire Lot ek so famille sauvé, quitte Sodome allé ek pa guette derriere. Lerla Bondié ti faire enn la pluie difé ek souffre tombe lor Sodome ek Gomorrhe, enn lot la ville ki ti bien pré, ek Li ti detruire tou zot bann habitant. Lot ek so deux tifi ti sapé. Mais femme Lot ti guette derriere, kitfois parski li ti chagrin bann kitsoz ki li ti quitté. A cause so desobeissance, li ti perdi la vie.

—Basé lor Genèse 11:10–19:38.