Job garde so fidelité

SI ENN dimoune gagne bann l’epreuve ki testé li ziska dernier limite ek si li parette ki so l’obeissance pa pou faire li gagne okenn l’avantage materiel, eski li pou reste fidele envers Bondié? C’est sa question-la ki ti soulevé ek ki ti gagne enn reponse en rapport avek enn zom ki ti appel Job.

Alors ki bann Israélite ti encore dan l’Égypte, Job, enn famille ar Abraham, ti pé reste dan l’endroit ki zordi appel l’Arabie. Entre-temps, bann ange dan le ciel ti rassemblé devant Bondié, ek Satan, sa ange rebelle-la ti parmi zot. Devant sa grand l’assemblée-la, Jéhovah ti dire ki quantité confiance li ena ar so fidele serviteur Job. En realité, Jéhovah ti dire ki pena personne ki ena enn l’integrité pareil couma Job. Mais Satan ti pretann ki Job ti servi Bondié zis parski Bondié ti beni li ek ti protege li. Li ti pretann aussi ki si Bondié prend tou bann di-bien ki Job ti ena, li ti pou maudit Bondié.

Bondié ti permette Satan pou fini d’abord tou bann di-bien Job, touye tou so zenfant ek apré faire li perdi so la santé. Job pa ti konn role ki Satan ti joué dan sa zaffaire-la. Alors li pa ti kapav comprend kifer Bondié ti permette li gagne sa bann difficulté-la. Malgré sa, Job jamais pa ti tourne lé-dos avek Bondié.

Trois fausse camarade ti vinn guette Job. Dan enn serie discours ki’nn ecrire dan plusieurs page dan livre Job, sa bann zom-la ti essaye convaink Job ki Bondié ti pé puni li pou bann peché ki li ti faire en cachiette. Mais tousala ti fausse. Zot ti mem pretann ki Bondié pa content so bann serviteur ek ki Li pa faire zot confiance. Job ti rejette zot fausse raisonnement. Avek confiance Job ti dire ki li pou garde so l’integrité ziska li mort!

Mais Job ti faire enn erreur. Li ti trop tracasse-li pou justifié li-mem. Enn jeune homme ki ti appel Élihou, ki depuis commencement ti’nn ecoute debat ki ti ena entre sa trois zom-la ek Job, ti decidé pou kozé. Li ti corrige Job parski li pa ti comprend ki justification souveraineté Jéhovah ti beaucoup pli important ki justification n’importe ki dimoune. Élihou ti aussi corrige bann pensée sa bann fausse camarade Job-la dan enn fason severe.

Lerla, Jéhovah ti koz avek Job pou corrige so fason pensé. Li ti attire l’attention Job lor bann kitsoz extraordinaire ki ena dan la creation ek Li ti faire Job reflechi lor ki quantité tipti bann dimoune zot tipti comparé ar grandeur Bondié. Job ti accepté correction Bondié avek humilité. Jéhovah Li enn Bondié ki “rempli ar l’affection ek misericorde.” Lerla, Li ti faire Job regagne so la santé, Li ti donne li double tou seki li ti ena, ek Li ti donne li dix zenfant. (Jacques 5:11) Job ti garde so fidelité envers Jéhovah malgré bann l’epreuve bien-bien difficile. Kan li’nn faire sa, li’nn reussi donne enn reponse kont l’accusation ki Satan ti faire, setadir ki bann dimoune pa pou reste fidele envers Bondié si zot passe par bann difficulté.

—Basé lor livre Job.