SECTION 8
Peuple Israël rente dan Canaan
Josué dirige bann Israélite pou zot al prend pays Canaan. Jéhovah etabli bann juge pou delivré so peuple ar bann ki pé faire dominere ar zot
PLUSIEURS siecle avant ki Israël rente dan Canaan, Jéhovah ti promette pou donne sa pays-la bann descendant Abraham. Asterla ki Josué pé dirige zot, bann Israélite ti pré pou prend la Terre promise.
Bondié ti’nn trouvé ki bann Cananéen ti merite destruction. Zot ti’nn rempli sa pays-la avek bann pratik sexuel bien-bien degradant, ek aussi zot ti verse di-sang, sans okenn pitié. A cause sa, bann Israélite ti bizin detruire net bann la ville cananéen ki zot ti reussi gagné.
Mais avant ki zot rente dan pays, Josué ti envoye deux espion, ki ti reste dan la ville Jéricho kot enn madame ki ti appel Rahab. Sa madame-la ti faire sa bann espion-la reste dan so lakaz ek li ti protege zot, mem si li ti koné ki zot ti bann Israélite. Rahab ti tann bann kitsoz ki Jéhovah ti faire pou sap so peuple, a cause sa li ti ena la foi dan Bondié bann Israélite. Li ti faire bann espion promette li, ki li ek so famille ti pou sapé.
Plitar, kan bann Israélite ti rente dan Canaan pou vinn attak Jéricho, Jéhovah ti faire enn mirak ek ti faire bann muraille Jéricho tombé. L’armée Josué ti rente dan la ville ek ti detruire li net, mais zot ti laisse Rahab ek so famille. Zis apré, Josué ti gagne bann grand partie la Terre promise enn derriere lot, dan bann laguerre ki ti dure six an. Apré sa, ti divise la Terre promise ek chaque tribu Israël ti gagne so part.
Vers la fin so longue carriere dan service Bondié, Josué ti rassemblé le peuple. Li ti faire enn resumé lor tou seki Jéhovah ti faire pou zot bann ancetre ek li ti encourage zot pou servi Jéhovah. Mais, apré la mort Josué ek bann zom ki ti travail ensam avek li, bann Israélite ti quitte Jéhovah ek zot ti commence servi bann fausse bondié. Pendant apepré 300 an, nation Israël pa ti touletan obeir la loi Jéhovah. Dan sa periode le temps-la, Jéhovah ti permette bann l’ennemi Israël, couma par exemple bann Philistin, pou faire dominere ar zot. Mais kan bann Israélite ti criyé Jéhovah pou aide zot, Li ti etabli bann juge—12 en tou—pou sap zot.
Periode bann juge, ki nou trouvé dan livre Juges, commence avek Othniel ek fini avek Samson, zom pli fort ki finn existé. Enn verité bien important ki nou retrouvé a chaque fois dan sa recit interessant ki trouve dan livre Juges-la c’est: L’obeissance envers souveraineté Jéhovah amenn bann benediction, desobeissance amenn malheur.
—Basé lor Josué; Juges; Lévitique 18:24, 25.