Salomon, enn le roi ki ti ena beaucoup sagesse

COUMA la vie ti pou été si enn nation en entier ek so dirigeant ti considere Jéhovah couma zot Souverain ek ti obeir So bann la loi? Nou kapav gagne reponse pou sa question-la kan nou examine seki ti passé pendant regne le roi Salomon ki ti dure 40 an.

Avant ki David mort, li ti faire Salomon, so garson vinn le roi. Dan enn rêve, Bondié ti invite Salomon pou demann enn kitsoz. Salomon ti demann Bondié sagesse ek connaissance pou li kapav juge bann dimoune dan enn fason juste ek sage. Jéhovah ti bien content ek Li ti donne Salomon sagesse ek connaissance. Jéhovah ti aussi promette pou donne li la richesse, la gloire ek enn longue la vie, a condition li reste obeissant.

Salomon ti vinn enn kikenn bien renommé pou so bann jugement rempli ar sagesse. Dan enn cas, deux madame ti pé laguerre pou enn tibaba. Toulé-deux ti pretann ki zot mama sa tibaba-la. Salomon ti donne l’ordre pou coupe tibaba-la en deux, ek donne chaque madame la moitié. Premier madame-la ti d’accord, mais vrai mama-la desuite ti suppliye le roi ek ti demann li donne zenfant-la lot madame-la. Salomon ti comprend ki sa madame ki ti ena enn grand pitié-la ti mama sa garson-la, ek li ti donne li so garson. Bien vite zot tou en Israël ti tann sa jugement-la, ek le peuple ti reconette ki Salomon ti ena sagesse Bondié.

Enn parmi bann pli grand kitsoz ki Salomon ti faire c’est construction temple Jéhovah, enn grand batiment bien joli ki ti pou vinn centre vrai l’adoration en Israël. Pendant inauguration temple, Salomon ti faire sa la priere-la: “Guetté! Le ciel li-mem, oui pli grand le ciel ki kapav ena, pa assez grand pou toi, alors couma to pou kapav reste dan sa lakaz ki mo’nn rangé-la!”—1 Rois 8:27.

Bann dimoune dan lezot pays ti tann koz lor Salomon, mem ziska Sheba, dan l’Arabie. La reine Sheba, ti faire enn voyage pou vinn guette la gloire ek richesse Salomon, ek pou testé so sagesse. Sa la reine-la ti tellement impressionné par sagesse Salomon ek prosperité ki ti ena en Israël, ki li ti loué Jéhovah ki ti’nn etabli enn le roi sage coumsa. Oui, avek benediction Jéhovah, pendant regne Salomon ti ena la paix ek prosperité couma jamais pa finn ena dan l’histoire ancien Israël.

Malheureusement, Salomon pa ti contigne agir en accord avek sagesse Jéhovah. Li pa ti obeir commandement Bondié ek li ti marié avek beaucoup femme, parmi ti ena beaucoup ki ti adore bann fausse bondié. Tigit par tigit so bann femme-la ti detourne so leker ar Jéhovah ek ti pousse li pou adore bann zidole. Jéhovah ti dire Salomon ki Li pou rasse enn partie so royaume ar li. Zis enn partie ki ti pou reste pou so famille, a cause promesse ki Bondié ti faire avek David, so papa. Mem si Salomon ti arrete obeir Jéhovah, Jéhovah Li, Li ti reste fidele envers l’alliance pou enn Royaume ki Li ti faire avek David.

—Basé lor 1 Rois chapitre 1 ziska 11; 2 Chroniques chapitre 1 ziska 9; Deutéronome 17:17.