Messie vini

ESKI Jéhovah ti pou aide bann dimoune identifié Messie ki Li ti promette? Oui. Anou guetté ki Bondié ti faire. Sa ti passé preské quatre siecle apré ki bann l’Écritures hébraïques ti’nn terminé. Enn jeune femme ki ti appel Marie, ki ti reste dan enn la ville ki ti appel Nazareth, dan le nord Galilée, ti gagne enn visite extraordinaire. Enn ange ki appel Gabriel ti apparette avek li ek ti dire li ki Bondié ti pou servi so la force actif, setadir so l’esprit saint, pou faire li tombe enceinte ek donne naissance enn garson, mem si li ti enn vierge. Sa garson-la ti pou vinn le Roi, ki ti’nn promette depuis longtemps, sa kikenn ki ti pou regne pou touletan-la! Sa zenfant-la ti pou prop Garson Bondié. Bondié ti pou transfere so la vie depuis dan le ciel dan ventre Marie.

Avek humilité, Marie ti accepté sa privilege extraordinaire-la. So fiancé, enn charpentier ki ti appel Joseph, ti marié avek li apré ki Bondié ti envoye enn ange pou donne li l’assurance ki c’est Bondié ki ti faire Marie tombe enceinte. Mais ki nou kapav dire concernant sa prophetie ki ti annoncé ki Messie ti pou né dan Bethléhem? (Mika 5:2) Sa ti la ville-la ti trouve 140 km pli loin!

Enn gouverneur romain ti donne l’ordre pou faire enn recensement. Bann dimoune ti bizin al enregistré-zot dan la ville kot zot finn né. Li parette ki Joseph ek Marie toulé-deux ti sorti dan Bethléhem. Alors Joseph ti prend so madame enceinte ek zot ti al Bethléhem. (Luc 2:3) Marie ti donne naissance dan enn simple l’etable, ek li ti mette so tibaba dan enn mangeoire. Lerla, Bondié ti envoye enn quantité ange pou dire enn groupe berger ki ti lor enn colline, ki sa tibaba ki’nn fek né-la li-mem Messie ou-soit Christ ki Bondié ti promette.

Plitar, lezot aussi ti pou donne temoignage ki Jésus li-mem Messie ki ti’nn promette. Prophete Isaïe ti annoncé ki enn missié ti pou vini ek ti pou prepare chemin pou ki Messie faire enn travail ki bien important. (Isaïe 40:3) Sa kikenn-la ti Jean le Baptiste. Kan li ti trouve Jésus, li ti criyé: “Guetté, l’Agneau Bondié ki tire peché le monde!” Certain parmi bann disciple Jean desuite ti commence suive Jésus. Enn parmi zot ti dire: “Nou finn trouve le Messie.”—Jean 1:29, 36, 41.

Ti ena lezot temoignage encore. Kan Jean ti baptise Jésus, Jéhovah Li-mem ti kozé depuis le ciel. Par moyen l’esprit saint, li ti oint Jésus couma le Messie ek Li ti dire: “Li-mem mo Garson ki mo bien content ek ki mo finn approuvé.” (Matthieu 3:16, 17) Messie ki ti promette depuis longtemps, ti’nn vini!

Kan sa ti arrivé? En l’an 29 n.l., exactement kan sa 483 an ki Daniel ti annoncé-la ti fini. Oui, sa li forme partie dan preuve ki pa kapav contesté ki Jésus li-mem le Messie ou-soit Christ. Mais ki message Jésus ti pou annoncé kan li ti pou lor la terre?

—Basé lor Matthieu chapitre 1 ziska 3; Marc chapitre 1; Luc chapitre 2; Jean chapitre 1.