Bann zapotre preché sans okenn la crainte

DIX jour apré ki Jésus ti monte dan le ciel, enn l’an 33 n.l., environ 120 disciple ti rassemblé dan enn lakaz dan Jérusalem pendant lepok la Pentecôte, enn fête juif. Enn coup, enn tapaz couma enn di-vent bien fort, rempli sa lakaz-la. Par mirak, bann disciple commence koz different langue ki jamais zot ti koné. Couma kapav explik sa bann evenement bizarre-la? Bondié finn donne bann disciple l’esprit saint.

Dehors, ti ena enn quantité dimoune parski ti ena bann visiteur ki sorti lezot pays ki ti vini pou sa fête-la. Zot ti etonné pou tann bann disciple Jésus koz bien zot prop langue. Pou explik seki finn arrivé, Pierre ti koz lor prophetie Yoël ki ti dire ki Bondié ti pou “envoye” so l’esprit, ki pou donne certain bann don, par mirak. (Yoël 2:28, 29) Sa preuve puissant ki zot finn gagne l’esprit saint-la, montré bien ki finn ena enn grand changement: Bondié ti tire so faveur lor Israël ek ti donne sa, sa nouveau congregation chretien-la. Asterla, bann ki ti envie servi Bondié couma bizin ti bizin suive Christ.

Pendant sa le temps-la, l’opposition ti augmenté, ek bann l’ennemi ti jette bann disciple dan prison. Mais pendant la nuit, ange Jéhovah ti ouvert la porte prison ek ti dire bann disciple contigne preché. Avant ki soleil levé zot ti contigne preché. Zot ti rente dan temple ek zot ti commence enseigne bon nouvelle concernant Jésus. Bann opposant religieux ti bien en colere ek ti donne zot l’ordre pou arrete preché. Avek courage, bann zapotre ti reponn: “Nou bizin obeir Bondié couma enn chef plutot ki bann zom.”—Actes 5:28, 29.

Persecution ti augmenté. Certain Juif ti accuse Étienne ki li ti blasphemé ek ti batte li coute roche li ziska li mort. Enn jeune homme—Saul de Tarse—ti temoin so la mort ek ti approuve sa crime-la. Li ti al Damas pou arrete n’importe kisannla ki ti suive Christ. Pendant ki li ti lor la route, enn la lumiere depuis le ciel ti brille bien fort autour li ek enn la voix ti dire: “Saul, Saul, kifer to pé persecute moi?” Sa la lumiere-la ti faire li vinn aveugle. Lerla Saul ti demandé: “Kisannla to été?” Enn la voix reponn: “Moi mo Jésus.”—Actes 9:3-5.

Trois jour apré, Jésus ti envoye enn disciple ki ti appel Ananias pou faire Saul retrouve clair. Saul ti baptisé ek ti commence preché avek zele concernant Jésus. Avek le temps, Saul finn vinn l’apotre Paul, ek Paul ti vinn enn membre bien zelé dan congregation chretien.

Bann disciple Jésus ti’nn annonce la bonne nouvelle lor Royaume Bondié zis avek bann Juif ek bann Samaritain. Asterla, enn ange ti apparette ar Corneille, enn officier dan l’armé romain. Ange-la ti dire li faire al cherche l’apotre Pierre. Ensam avek lezot chretien, Pierre ti preche ar Corneille ek so famille. Alors ki Pierre ti pé kozé, l’esprit saint ti vinn lor sa bann non-juif ki ti croyant-la, ek bann zapotre ti dire zot ki zot bizin baptisé au nom Jésus. Asterla, bann dimoune dan tou nation zot aussi zot ti gagne possibilité pou gagne la vie eternel. Congregation ti’nn paré pou preche la bonne nouvelle partout.

—Basé lor Actes 1:1–11:21.