La terre revinn enn paradis!

DERNIER livre la Bible, Révélation ou-soit Apocalypse, donne tou bann dimoune enn l’espoir. C’est l’apotre Jean ki’nn ecrire sa livre-la. Dan sa livre-la ena bann vision ek en dernier Jean trouvé couma Jéhovah realise so projet.

Dan premier vision, Jésus ressuscité, felicite ek corrige plusieurs congregation. Prochain vision montré nou trone Bondié dan le ciel, kot bann creature spirituel pé donne Li la gloire.

A mesure ki projet Bondié avancé, l’Agneau, Jésus Christ gagne enn rouleau avek sept scellé. Kan ouvert quatre premier scellé, bann cavalier symbolik apparette. Premier cavalier c’est Jésus lor enn cheval blanc, ek en tant ki le Roi, li ena enn couronne. Apré sa ena bann lezot cavalier lor different couleur cheval. Dan enn sens prophetik zot represente la guerre, la famine, ek bann l’epidemie. Tousala pé arrivé pendant bann dernier jour sa systeme-la. Kan ouvert septieme scellé, ena sonnerie sept trompette symbolik ki commencé, ek sa bann sonnerie-la represente declaration bann jugement Bondié. Sa amenn aussi sept plaie symbolik, ou-soit sept fason ki Bondié montré so colere.

Royaume Bondié, representé par enn zenfant male ki’nn fek né, li etabli dan le ciel. La guerre eclaté, ek le Roi sa royaume-la jette Satan ek so bann mauvais ange lor la terre. Enn la voix bien fort dire: “Malheur pou la terre.” Satan le Diable ena enn grand colere, parski li koné ki li ena zis enn tigit le temps-mem.—Révélation 12:12.

Jean trouve Jésus dan le ciel, representé par enn agneau, ek ensam avek li ena 144,000 ki finn choisir parmi bann dimoune lor la terre. Sa bannla zot “pou regne couma bann le roi avek” Jésus. Alors, Révélation faire nou koné ki bann membre secondaire sa descendance-la pou 144,000 en tou.—Révélation 14:1; 20:6.

Bann dirigeant lor la terre rassemblé pou Har-Maguédôn “la guerre grand jour Bondié, sa Kikenn ki Tout-Puissant-la.” Zot laguerre avek sa kikenn ki lor enn cheval blanc-la, setadir Jésus, ki dirige bann l’armée ki dan le ciel. Jésus detruire tou bann dirigeant sa le monde-la. Li enferme Satan. Lerla li, ek bann 144,00 regne lor la terre pendant “mille an.” A la fin sa mille an-la, Bondié pou detruire Satan.—Révélation 16:14; 20:4.

Ki pou arrive bann dimoune obeissant kan pou ena regne mille an Christ ek bann ki pou dirigé avek li? Jean ecrire: “[Jéhovah] pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur. Bann kitsoz avant finn disparette.” (Révélation 21:4) La terre vinn enn paradis!

Sa vedir ki livre Révélation complete message ki ena dan la Bible. Par moyen Royaume messianik, nom Jéhovah sanctifié, ek so souveraineté justifié dan enn fason complete pou touletan!

—Basé lor livre Révélation.