Kisann-la Lennmi Vre Lafwa?

DEPI bien lontan avan ki Zeova ti kree later, li ti kree bann anz dan lesiel. Me selman, avek letan, enn anz ti anvi ki lezot ador li, alor ki zis Bondie tousel ki gagn drwa gagn sa. Sa anz-la inn azir dapre seki li ti anvi, ek akoz sa li’nn fer limem vinn Satan, ki vedir “Opozan,” setadir sa kikenn ki opoz kont Bondie la. Kouma Satan inn azir kont Bondie?

Satan inn anbet Ev pou ki li dezobeir Bondie. Dan enn fason sournwa, li’nn fer Ev krwar ki Zeova inn anpes li profit enn bon kitsoz kan li’nn anpes li pou manz frwi enn pie. San okenn laont, Satan inn dir ki Bondie enn manter ek li’nn fer Ev krwar ki li bizin rezet direksion Bondie. Li ti dir: “Bondie kone ki zour ki zot manz sa, zot lizie pou ouver ek zot pou vinn kouma Bondie, zot pou konn seki bon ek seki move.” (Zenez 3:5) Ev ti bien bet pou krwar bann mansonz Satan. Li ti dezobeir lalwa Bondie ek li ti inflians Adan osi pou fer parey. Depi sa lepok-la, Satan inn vinn lennmi tou bann ki ena vre lafwa dan Bondie. Ek ziska azordi li pe kontign anbet bann dimounn. Kouma li pe fer sa?

Fos Lafwa Koumans Fane

Satan ti servi ladorasion bann zidol ek bann tradision imin pou anbet bann zanfan Izrael. Zezi ki Lemesi, ti dir sef relizie bann zanfan Izrael ki zot ladorasion ti dan vid parski “se komannman bann zom” ki zot ti pe ansegne. (Matie 15:9) Kan sa pep-la ti rezet Lemesi, Bondie ti rezet zot. Zezi ti dir zot: “Pou pran Rwayom Bondie ar zot ek pou donn sa enn pep ki raport bann frwi ki bizin.” (Matie 21:43) Lerla, bann disip Zezi ti vinn sa pep ki Bondie ti aksepte la.

Akoz sa ki Satan inn koumans anbet bann disip Zezi pou ki zot nepli ena vre lafwa. Eski li’nn reisi? Dan enn profesi, Zezi ti servi enn lexanp pou dir seki ti pou arive. Dan sa lexanp-la, li ti dir ki ena enn zom ki pou sem bon dible dan karo. Plitar, enn lennmi ti pou vini pou sem bann move-zerb parmi sa dible-la. Lerla, ti les toule-de pous ansam ziska ki lepok rekolt arive. Apre sa, ti separ bann move-zerb ar dible, ek ti detrir zot. Me ti gard dible dan stor sa proprieter-la.

Plitar, Zezi ti explik so bann disip seki sa lexanp-la vedir. Li ti dir ki limem sa Kikenn Ki Sem Lagrin la. Konsernan “bann bon lagrin se bann ki pou rant dan Rwayom ki dan lesiel, me bann move-zerb se bann garson sa kikenn ki move la, ek lennmi ki ti sem sa bann move-zerb-la se Lediab. Rekolt se peryod lafin sa lemond-la, ek bann ki fer rekolt se bann anz.” (Matie 13:38, 39) Zezi ti konpar so bann vre disip ar dible. Me Satan ti sem bann move-zerb, setadir bann fos disip parmi bann disip Zezi. Lerla, kouma Zezi ti predir, ti koumans ena bann fos disip plizir santenn lane apre ki Zezi ti mor. Zot ti ansegn bann kitsoz kouma Trinite, setadir ki Bondie Li an-trwa. Bann fos disip ti osi koumans ador bann zidol ek rant dan bann zafer politik. Zis enn tigit dimounn mem ki’nn kontign swiv bann lansegnman Zezi.

Vre Lafwa Pa Pou Disparet

Me selman, parey kouma Zezi ti explike, pou ena enn sanzman. Bann anz Bondie pou tir tou bann ki pena vre lafwa ek pou detrir zot. Lerla, li pou pli fasil pou kone kisann-la ki ena vre lafwa. An dernie, Satan Lediab, sa kikenn ki lennmi vre lafwa la, li osi li pou detrir. Ek lerla, vre lafwa pou gagne!

Me kouma ou kapav rekonet bann dimounn ki ena vre lafwa azordi? Nou pou reponn sa kestion-la dan prosin leson.