Enn Tabernak pou Ador Zeova

Kan Moiz ti lor Montagn Sinai, Zeova ti dir li ranz enn latant spesial kot bann Izraelit ti pou kapav ador Li. Ti apel sa latant-la tabernak. Bann Izraelit ti pou kapav amenn tabernak partou kot zot ti pou ale.

Zeova ti dir: ‘Demann lepep pou donn seki zot kapav pou konstriksion tabernak.’ Bann Izraelit ti donn lor, larzan, kwiv, bann bizou, ek bann pier ki ena boukou valer. Zot ti donn osi lalenn, lin, bann lapo zanimo, ek boukou lezot kitsoz. Zot ti telman zenere ki Moiz ti bizin dir zot: ‘Nou’nn gagn ase! Pa bizin amenn ankor.’

Bann zom ek bann fam, ki ti konn travay, ti donn koudme pou ranz tabernak, ek Zeova ti donn zot pli boukou kapasite ankor. Sertin ti fer bann difil, bann latwal, ouswa brode. Lezot ti travay ar ros, ar lor, ouswa zot ti skilpte dibwa.

Lepep ti ranz tabernak parey kouma Zeova ti demann zot. Zot ti fer enn zoli rido ki ti separ tabernak an de. Enn kote ti apel Parti ki Sin ek lot kote ti apel Parti ki Pli Sin. Dan Parti ki Pli Sin, ti ena lars lalians, ki ti fer ar dibwa lakasia ek lor. Ek dan Parti ki Sin, ti ena enn lalanp an-or, enn latab, ek enn lotel pou bril lansan. Dan lakour, ti ena enn basin an kwiv ek enn gran lotel. Lars lalians ti rapel bann Izraelit ki zot ti promet pou obeir Zeova. Eski to kone ki ete enn lalians? Se enn promes spesial.

Zeova ti swazir Aaron ek so bann garson pou travay dan tabernak kouma bann pret. Zot ti bizin okip tabernak ek fer bann ofrand pou Zeova. Zis Aaron, ki ti gran pret, ki ti gagn drwa rant dan Parti ki Pli Sin. Li ti rant ladan enn sel zour dan enn lane, pou amenn enn sakrifis pou so pese, pou pese so fami, ek pou pese nasion Izrael.

Bann Izraelit ti fini ranz tabernak enn an apre ki zot ti kit Lezip. Aster-la, zot ti ena enn plas pou ador Zeova.

Zeova ti montre ki Li ti bien kontan tabernak-la ek Li ti fer enn niaz aparet lao li. Tanki sa niaz-la ti res lao tabernak, bann Izraelit ti res lamem. Me kan sa niaz-la ti bouze, zot ti konpran ki zot ti bizin ale. Lerla, zot ti demont tabernak-la ek zot ti swiv niaz-la.