Enn Gardien Prizon Gagn Laverite

Dan lavil Filip, ti ena enn zenn tifi ki ti enn esklav ek ki ti posede par enn demon. Sa demon-la ti fer tifi-la predir lavenir, ek bann met sa tifi-la ti fer boukou kas ar li. Kan Pol ek Silas ti ariv dan lavil Filip, sa tifi-la ti swiv zot pandan plizir zour. Demon-la ti fer tifi-la kriye: “Sa bann zom-la zot bann esklav Bondie Pli Lao.” Alafin, Pol ti dir demon-la: ‘Lor nom Zezi, sorti dan sa tifi-la!’ Lerla, demon-la ti kit tifi-la.

Kan bann met sa tifi-la ti realize ki zot nepli ti pou kapav fer kas ar tifi-la, zot ti bien ankoler. Zot ti amenn Pol ek Silas devan bann mazistra lavil, ek zot ti dir: ‘Sa bann zom-la pa pe respekte lalwa ek zot pe met dezord dan lavil!’ Bann mazistra ti donn lord pou bat Pol ek Silas, ek zet zot dan prizon. Enn gardien prizon ti ferm zot dan kaso ki ti pli dan fon dan prizon ek kot ti fer bien nwar. Li ti osi met zot lipie dan bann blok dibwa.

Pol ek Silas ti sant bann kantik pou loue Zeova ek bann lezot prizonie ti pe ekoute. Enn kout, omilie lanwit, enn gran tranbleman-de-ter ti sakouy prizon-la. Bann laport prizon ek bann blok dibwa ti ouver, ek lasenn bann prizonie ti large. Gardien prizon la ti galoupe pou al dan fon prizon ek li ti trouve ki bann laport kaso ti ouver. Li ti sir ki tou bann prizonie ti sove. Alor, li ti pran enn lepe pou touy limem.

Lerla, Pol ti kriye: ‘Pa fer sa! Nou tou lamem!’ Gardien prizon la ti rant andan ek li ti tom azenou devan Pol ek Silas. Li ti demann zot: “Ki mo bizin fer pou mo kapav sape?” Zot ti dir li: ‘Twa ek to fami, zot bizin krwar dan Zezi.’ Pol ek Silas ti ansegn zot parol Zeova. Lerla, gardien prizon la ek tou so fami ti batize.