LESON 26
Kifer Bann Move Kitsoz Arive, ek Kifer Bann Dimounn Soufer?
Kan enn maler arive, li normal ki nou poz noumem sa kestion-la: “Kifer sa bann kitsoz-la arive?” Nou kontan ki Labib ed nou pou gagn repons sa kestion-la!
1. Kouma bann move kitsoz finn koumanse?
Satan ti rebel kont Bondie. Satan ti anvi diriz lezot, alor li ti inflians bann premie imin, Adan ek Ev, pou rebele zot osi. Satan ti fer sa kan li ti koz manti ar Ev. (Zenez 3:1-5) Li ti fer Ev krwar ki Zeova ti pe priv li enn bon kitsoz. Li ti pe rod dir ki bann dimounn ti pou pli ere si zot pa obeir Bondie. Satan ti koz premie manti kan li ti dir Ev ki li pa ti pou mor. Akoz sa, Labib dir ki Satan “li enn manter e limem papa bann manter.”—Zan 8:44.
2. Ki Adan ek Ev ti swazir pou fer?
Zeova ti donn Adan ek Ev tou seki zot ti bizin. Li ti dir zot ki zot kapav manz frwi ninport ki pie ki ena dan zardin Edenn, apart frwi enn sel pie. (Zenez 2:15-17) Me kanmem sa, zot ti desid pou manz frwi sa pie-la. Ev “inn kas frwi-la ek li’nn manze.” Ek plitar, Adan “li osi li’nn manze.” (Zenez 3:6) Zot toulede ti dezobeir Bondie. Parski Adan ek Ev ti parfe, li ti normal ki zot fer seki bon. Me kan zot ti dezobeir Zeova volonterman, zot ti fer pese ek zot ti rezet drwa ki Bondie ena pou diriz zot. Akoz sa, zot ti bien soufer.—Zenez 3:16-19.
3. Kouma desizion ki Adan ek Ev ti pran ena enn lefe lor nou?
Kan Adan ek Ev ti fer pese, zot ti vinn inparfe. Akoz sa, tou zot bann desandan osi inparfe. Konsernan Adan, Labib dir: “Par enn zom pese finn vinn dan lemonn, e lamor finn rantre par pese, e lamor finn tous tou dimoun.”—Romin 5:12.
Nou soufer pou diferan rezon. Parfwa, nou soufer akoz bann move desizion ki nou pran. Kitfwa nou soufer osi akoz bann move desizion ki lezot dimounn pran. Nou kapav soufer osi parski nou dan move plas dan move moman.—Lir Ekleziast 9:11.
ANOU GET INPE PLIS
Nou pou gete ki se pa akoz Bondie ki ena bann move kitsoz ek soufrans dan lemond. Nou pou get osi seki Li resanti kan nou soufer.
4. Akoz kisannla nou soufer?
Boukou dimounn panse ki se Bondie ki pe kontrol lemond. Me eski sa li vre? Zwe VIDEO-la.
Lir Zak 1:13 ek 1 Zan 5:19, ek apre sa, get sa kestion-la ansam:
Eski se akoz Bondie ki nou soufer ek ki ena bann move kitsoz?
5. Ki finn arive depi ki Satan pe kontrol lemond?
Lir Zenez 3:1-6, ek apre sa, get sa bann kestion-la ansam:
Ki manti Satan ti koze?—Get verse 4 ek 5.
Kouma Satan ti fer krwar ki Zeova ti pe anpes bann imin profit enn bon kitsoz?
Dapre Satan, eski bann imin bizin ki Zeova diriz zot pou ki zot ere?
Lir Ekleziast 8:9, ek apre sa, get sa kestion-la ansam:
Ki finn arive depi ki Zeova finn aret diriz lemond?
Adan ek Ev ti parfe ek zot ti pe viv dan Paradi. Me zot ti ekout Satan ek zot ti rebel kont Zeova
Apre ki zot ti rebele, lemond ti ranpli ar pese, soufrans ek lamor
Zeova pou tir pese, soufrans, ek lamor. Bann dimounn pou kapav revinn parfe ek reviv dan Paradi
6. Ki Zeova resanti kan nou soufer?
Eski Zeova gagn nou traka kan nou soufer? Get seki Lerwa David ek lapot Pier ti ekrir. Lir Psom 31:7 ek 1 Pier 5:7, ek apre sa, get sa kestion-la ansam:
Kan ou kone ki Zeova trouve kan nou soufer ek ki Li gagn nou traka, ki ou resanti?
7. Bondie pou tir tou bann soufrans
Lir Izai 65:17 ek Revelasion 21:3, 4, ek apre sa, get sa kestion-la ansam:
Biento Zeova pou tir tou seki fer bann dimounn soufer. Kifer sa rekonfort ou?
Eski ou ti kone?
Kan Satan ti koz premie manti, li ti gat repitasion Zeova. Satan ti dir ki Zeova Li enn Dirizan ki pena lamour ek ki inzis. Biento kan Zeova pou tir tou bann soufrans, Li pou tir tou tas ki’nn zete lor so nom. Ek Li pou montre ki Limem meyer Dirizan ki ena. Pena nanye ki pli inportan ki defann nom Zeova ek so repitasion.—Matie 6:9, 10.
SERTIN DIMOUNN DIR: “Soufrans form parti dan lavi.”
Ki ou ti pou dir?
SEKI NOU’NN APRANN
Se sirtou akoz Satan ek de premie imin ki ena sa kantite soufrans-la dan lemond. Zeova vremem gagn nou traka kan Li trouv nou soufer, ek biento Li pou tir tou bann soufrans.
Eski Ou Rapel
Ki manti Satan ti koze ar Ev?
Kan Adan ek Ev finn rebel kont Zeova, ki lefe sa finn ena lor nou?
Kouma nou kone ki Zeova gagn nou traka kan nou soufer?
DEKOUVER
Gete seki Labib aprann nou lor pese.
Aprann plis lor seki ti arive dan zardin Edenn.
“Kifer Bondie Permet Soufrans?” (Latour Degard, Mars-Avril 2014)
Gete kouma bann repons konsernan enn kestion bien difisil kapav rekonfort nou.
“Kifer Bondie Finn Permet ki Bann Milyon Zwif Mor Pandan Deziem Lager Mondial?” (Lartik lor jw.org)
Gete seki enn misie inn aprann konsernan bann soufrans ki ti ena otour li.