LESON 48
Swazir Bien Ou Bann Kamarad
Bann bon kamarad zot la dan bann bon moman, me osi kan nou dan problem. Me Labib averti nou ki pa tou dimounn ki enn bon kamarad. Alor, kouma ou kapav swazir bien ou bann kamarad? Anou get sa ansam.
1. Kifer ou bizin swazir bien ou bann kamarad?
Nou ena tandans pou vinn parey kouma bann dimounn ki nou frekante. Ek sa li vre, mem pou bann dimounn ki nou frekante lor bann rezo sosial. Zot kapav ena enn bon linflians lor nou ouswa enn move linflians lor nou. Labib dir: “Enn kikenn ki mars avek bann dimounn ki ena lasazes pou gagn lasazes, me enn kikenn ki gagn zafer avek bann dimounn bet [bann ki pa kontan Zeova], sa pou mal fini pou li.” (Proverb 13:20) Bann kamarad ki kontan Zeova ek ki ador Li, kapav ed ou pou res pros ar Zeova ek pou pran bann bon desizion. Me si nou bann bon kamarad pa kontan Zeova, zot kapav elwagn nou ar Zeova. Se akoz sa ki Labib ankouraz nou pou swazir bien nou bann kamarad! Kan nou bann kamarad kontan Zeova, zot pou ena enn bon linflians lor nou ek nou osi nou pou ena enn bon linflians lor zot. Lerla, nou pou kapav kontign ‘ankouraz sakenn nou kamarad ek fortifie sakenn nou kamarad.’—1 Tesalonisien 5:11.
2. Kifer pou Zeova li inportan ki ou swazir bien ou bann kamarad?
Zeova swazir bien so bann kamarad. “Li vinn enn kamarad bien pros avek bann dimounn ki drwat.” (Proverb 3:32) Ki Zeova pou resanti si nou swazir bann kamarad ki pa kontan Li? Sa pou fer so leker bien fermal! (Lir Zak 4:4.) Parkont, si nou rezet bann move frekantasion, ek ki nou vinn pros ar Zeova ek bann ki kontan Zeova, Li pou bien kontan. Ek lerla, Li pou swazir nou kouma so bann kamarad.—Psom 15:1-4.
ANOU GET INPE PLIS
Nou pou gete kifer li bien inportan ki nou swazir bien nou bann kamarad, ek kouma nou kapav ena bann zoli lamitie.
3. Fer atansion ar bann move frekantasion
Bann dimounn ki pa kontan Bondie ek so bann prinsip, zot bann move frekantasion. Zwe VIDEO-la, ek apre sa, get sa kestion-la ansam:
Kouma nou kapav ena bann move frekantasion san ki nou rann nou kont?
Lir 1 Korintien 15:33, ek apre sa, get sa kestion-la ansam:
Ki kalite dimounn kapav enn move frekantasion pou ou? Kifer ou pans sa?
Lir Psom 119:63, ek apre sa, get sa kestion-la ansam:
Ki kitsoz pou montre si enn kikenn pou enn bon kamarad?
Enn pom gate kapav gat lezot pom. Ki linflians enn move kamarad kapav ena lor ou?
4. Nou kapav fer kamarad ar bann dimounn ki diferan ar nou
Labib koz lor zoli lamitie ki ti ena ant David ek Zonatan. Pourtan, ti ena enn gran diferans laz ant zot ek zot lavi ti bien diferan. Lir 1 Samiel 18:1, ek apre sa, get sa kestion-la ansam:
Kifer li pa neseser ki nou bann kamarad ena mem laz ki nou ouswa mem ran sosial ki nou?
Lir Romin 1:11, 12, ek apre sa, get sa kestion-la ansam:
Kouma bann kamarad ki kontan Zeova kapav ankouraz zot kamarad?
Zwe VIDEO-la pou trouve kouma enn zenn frer inn fer kamarad avek enn kikenn ki zame li ti pou panse. Apre sa, get sa bann kestion-la ansam:
Dan sa video-la, kifer bann paran Akil ti pe gagn traka akoz bann kamarad lekol ki li ti ena?
Kifer o-koumansman Akil ti kontan sa bann kamarad-la?
Ki Akil ti fer pou ki li nepli santi li tousel?
5. Kouma ou kapav ena bann bon kamarad?
Zwe VIDEO-la pou trouve kouma ou kapav gagn bann vre kamarad ek kouma ou osi ou kapav vinn enn bon kamarad.
Lir Proverb 18:24 ek 27:17, ek apre sa, get sa bann kestion-la ansam:
Kouma bann vre kamarad ed sakenn zot kamarad?
Eski ou ena bann bon kamarad koumsa? Si ou pena, kouma ou kapav ena bann bon kamarad?
Lir Filipien 2:4, ek apre sa, get sa kestion-la ansam:
Pou ki ou kapav ena bann bon kamarad, oumem ou bizin enn bon kamarad. Ki ou kapav fer pou vinn enn bon kamarad?
Pou ki ou ena bann bon kamarad, oumem ou bizin enn bon kamarad
SERTIN DIMOUNN DIR: “Li pa inportan ki krwayans mo bann kamarad ena, tanki zot tret mwa bien.”
Ou ki ou panse?
SEKI NOU’NN APRANN
Kan nou swazir bien nou bann kamarad, nou fer Zeova kontan ek noumem nou gagn bann bienfe.
Eski Ou Rapel?
Kifer pou Zeova li inportan ki ou swazir bien ou bann kamarad?
Ki kalite kamarad nou pou evite?
Kouma ou kapav ena enn bon lamitie avek bann ki kontan Zeova?
DEKOUVER
Gete kouma bann bon kamarad kapav ed nou kan nou dan problem.
“Fer To Lamitie Avek Lezot Vinn Pli For Avan ki Lafin Vini” (Latour Degard, Novam 2019)
Get bann konsey ki kapav ed ou pou fer bann bon kamarad.
« Comment choisir mes amis ? » (Les jeunes s’interrogent. Réponses pratiques, Volim 1, sapit 8)
Ki ou bizin kone konsernan bann kamarad ki ou kapav gagne lor Internet?
Dan lartik « J’avais tant besoin d’un père ! » gete seki finn ed enn misie pou swazir bann pli bon kamarad.
“Labib Sanz Bann Dimounn” (Latour Degard, 1e Avril 2012, an Franse)