Zeova Fer So Pep Vinn Zoli Avek Lalimyer

“Leve fam, fann lalimyer, parski to lalimyer finn arive ek laglwar Zeova finn ekler lor twa.”—IZAI 60:1.

1, 2. (a) Dan ki kondisyon bann dimunn ete? (b) Kisannla ki deryer nwarte limanite?

“A SI selman nu ti ena enn Izai uswa enn Sin Pol!” Se sa regre la ki Harry Truman, Prezidan États-Unis, ti exprime dan bann lane 1940. Kifer eski li ti dir sa? Parski li ti konsyan ki ti bizin bann ekselan lider moral dan lemond sa lepok la. Limanite ti’nn fek pas dan peryod pli nwar 20em syek, setadir dezyem lager mondyal. Mem si lager ti’nn fini, lemond pa ti anpe. Nwarte ti kontiyne. Wi, 57 an apre lafin sa lager la, lemond ti ankor dan nwarte. Si Prezidan Truman ti ankor vivan zordi, sirman li ti pu ankor truve ki bizin bann ekselan gid moral dan kalib Izai ek lapot Pol.

² Nu pa kone si Prezidan Truman ti konn sa, me Pol ti koz lor nwarte ki afekte limanite, ek dan bann liv ki li ti’nn ekrir li ti met bann dimunn an gard kont sa. Par egzanp li ti donn sa lavertisman la bann krwayan dan so lepok: “Nu bizin lite pa kont disan ek laser, me kont bann guvernman, kont bann lotorite, kont bann dirizan lemond ki dan sa nwarte la, kont bann move lespri ki truv dan lesyel.” (Efezyin 6:12) Par sa bann parol la, Pol ti montre ki li pa ti zis konsyan ki nwarte spirityel ti pe anvlop lemond, me ki li ti konn usi so vre lasurs—bann lafors demonyak pwisan ki dekrir kuma “bann dirizan lemond.” Parski bann lespri pwisan deryer nwarte sa lemond la, ki bann sinp imin kapav fer pu repus sa?

3. Malgre ki limanite dan enn kondisyon byin som, ki Izai ti anonse konsernan bann fidel?

³ Pareyman, Izai usi ti koz lor nwarte ki pe turmant bann dimunn. (Izai 8:22; 59:9) Me selman, kan li ti pe get ver nu lepok, li ti anonse grasa lespri Bondye, ki mem dan sa bann lepok nwar la, Zeova pu ekler vizyon bann ki kontan lalimyer. Wi, mem si nu pena ni Pol ni Izai an personn avek nu, nu ena zot bann liv inspire pu gid nu. Pu truve kuma sa li enn benediksyon pu bann ki kontan Zeova, anu egzaminn bann parol profetik Izai ki truv dan 60em sapit so liv.

Enn Fam Profetik Fann Lalimyer

4, 5. (a) Ki lord Zeova donn enn fam, ek ki promes Li fer? (b) Ki ranseynman kaptivan, ena dan Izai sapit 60?

⁴ Bann premye parol Izai sapit 60 adrese ar enn fam ki dan enn leta byin tris—li’nn larg so lekor an long lor later dan gro marenwar. Enn kut, lalimyer pers sa nwarte la, ek Zeova lans sa lapel la: “Leve fam, fann lalimyer, parski to lalimyer finn arive, ek laglwar Zeova finn ekler lor twa.” (Izai 60:1) Ler finn arive pu sa fam la debute ek reflekte lalimyer Bondye, setadir so laglwar. Kifer? Nu truv so repons dan prosin verse: “Gete! nwarte limem pu kuver later, ek enn gro nwarte pu kuver bann nasyon; me lor twa Zeova pu eklere, ek lor twa pu truv so prop laglwar.” (Izai 60:2) Kan sa fam la obeir lord Zeova, li ena lasirans ki rezilta la pu extraordiner. Zeova dir: “Wi, bann nasyon pu al ver to lalimyer, ek bann lerwa pu al ver klarte to lekleraz.”—Izai 60:3.

⁵ Sa bann parol kaptivan dan sa trwa verse la, zot an mem tan enn introdiksyon ek enn rezime seki ena dan leres parti Izai sapit 60. Li anons bann lexperyans enn fam profetik ek li explike kuma nu kapav res dan lalimyer Zeova malgre nwarte ki finn pran plas lor limanite. Me alor, ki sa bann sinbol ki nu truve dan sa trwa premye verse la reprezante?

6. Kisannla sa fam ki mansyone dan Izai sapit 60 la, ek kisannla ki reprezant li lor later?

⁶ Sa fam ki mansyone dan Izai 60:1-3 la li Syon, lorganizasyon bann kreatir spirityel Zeova ki dan lesyel. Zordi, se leres “Izrael Bondye,” kongregasyon internasyonal bann Kretyin win ki ena lesperans pu dirize ansam avek Kris dan lesyel, ki reprezant Syon lor later. (Galat 6:16) Anfindekont, sa nasyon spirityel la kont enn total 144,000 manb, ek realizasyon modern Izai sapit 60 konsern sirtu bann ki ankor vivan lor later pandan sa “bann dernye zur” la. (2 Timote 3:1; Revelasyon 14:1) Sa profesi la ena usi buku pu dir konsernan bann konpaynon sa bann Kretyin win la, setadir “gran laful” bann “lezot muton.”—Revelasyon 7:9; Zan 10:16.

7. Dan ki kondisyon Syon ti ete an 1918, ek kuma eski sa ti’nn profetize?

⁷ Eski ti ena enn lepok kot “Izrael Bondye” ti larg lekor anba dan nwarte, parey kuma seki sa fam profetik la ti reprezante? Wi, sa ti arive plis ki 80 an avan. Pandan premye lager mondyal, bann Kretyin win ti fer tu seki zot ti kapav pu ki travay predikasyon kontiyne. Me an 1918, pandan dernye lane lager, laktivite predikasyon ki ti’nn organize ti preske aret net. Joseph F. Rutherford, ki ti pe siperviz laktivite predikasyon dan lemond antye, ek bann lezot Kretyin ki ti alatet, ti gayn bann long santans prizon akoz bann fos sarz ki ti mete lor zot. Dan liv Revelasyon, sa bann Kretyin win ki ti lor later la ti dekrir, dan enn fason profetik, kuma bann lekor anba lor later “lor gran lari dan gran lavil ki, dan enn sans spirityel, apel Sodom ek Lezip.” (Revelasyon 11:8) Wi, sa ti vremem enn lepok byin som pu Syon, ki reprezante par so bann zanfan win lor later!

8. Ki sanzman inpresyonan finn arive an 1919, ek avek ki rezilta?

⁸ Me selman, an 1919, finn ena enn sanzman inpresyonan. Zeova ti fann lalimyer lor Syon! Bann manb Izrael Bondye ki ti vivan ti pran bann dispozisyon pu reflekte lalimyer Bondye, ek avek kuraz zot ti repran ankor enn fwa avek zel proklamasyon labonn nuvel. (Matye 5:14-16) Grasa zel renuvle ki sa bann Kretyin la ti montre, lezot Kretyin win ek manb gran laful finn atire ver lalimyer Zeova. Pu kumanse, sa bann nuvo la finn swazire par lespri ek zot finn vinn bann lezot manb Izrael Bondye. Dan Izai 60:3, apel zot bann lerwa parski zot pu bann eritye ansam avek Kris dan Rwayom Bondye ki dan lesyel. (Revelasyon 20:6) Plitar, enn gran laful bann lezot muton ti kumans atire ver lalimyer Zeova. Sa gran laful la mem ki reprezant “bann nasyon” ki mansyone dan sa profesi la.

Bann Zanfan Fam La Vinn Lakaz!

9, 10. (a) Ki spektak remarkab ti devan sa fam la, ek ki sa ti reprezante? (b) Ki rezon Syon ti ena pu li dan lazwa?

⁹ Asterla, Zeova kumans donn ankor plis detay lor ranseynman ki nu truve dan Izai 60:1-3. Li donn fam la enn lot lord. Ekute seki Li dir: “Lev to lizye tutotur ek gete!” Fam la obeir ek li truv enn spektak tusan devan li! So bann zanfan pe vinn lakaz. Pasaz la kontiyn dir: “Zot tu finn rasanble ansam; zot finn vinn ver twa. To bann prop garson ki sorti lwin pe kontiyn vini, ek to bann tifi usi, pu pran zot lor lerin, pu donn zot swin.” (Izai 60:4) Predikasyon Rwayom dan lemond antye ki ti kumanse an 1919, ti atir plizir milyon nuvo ver servis Zeova. Sa bann dimunn la usi ti vinn “bann garson” ek “bann tifi” Syon, bann manb ki’nn swazire pu vinn bann manb Izrael Bondye. Donk, Zeova ti fer Syon vinn zoli kan Li ti amenn bann dernye manb 144,000 ver lalimyer.

¹⁰ Eski u kapav mazine ki kantite lazwa Syon ena parski so bann zanfan ansam avek li? Me, Zeova donn Syon ankor plis rezon pu li zwaye. Nu lir: “Sa lepok la to pu gete ek vremem to pu briye ar lazwa, ek to leker pu tranble ek li pu dilate, parski rises lamer pu vinn ver twa; rises bann nasyon pu vinn ver twa.” (Izai 60:5) An armoni avek sa bann parol profetik la, depi bann lane 1930, enn kantite Kretyin ki ena lespwar pu viv pu tuletan lor later finn mont ver Syon. Zot finn sorti dan “lamer” limanite ki lwin ar Bondye ek zot reprezant rises bann nasyon. Zot “bann kitsoz dezirab ki sorti dan tu bann nasyon.” (Agai 2:7; Izai 57:20) Remarke usi, ki sa bann “kitsoz dezirab la” pa deside pu servi Zeova sakenn dan so manyer. Non, zot fer Syon vinn ankor pli zoli kan zot zwenn ansam avek zot bann frer win, pu adore, kumsa zot vinn “enn sel trupo” anba direksyon “enn sel berze.”—Zan 10:16.

Bann Marsan, Bann Berze ek Bann Komersan Vinn ver Syon

11, 12. (a)Dekrir bann laful ki nu truv pe al ver Syon.

¹¹ Rezilta sa rasanbleman ki ti anonse la se enn ogmantasyon extraordiner dan kantite dimunn ki donn Zeova loner. Sa ti anonse dan bann parol sa profesi la. Mazine ki u pe debute avek sa fam profetik la lor Montayn Syon. U get kote les, ek ki u truve? “Bann gran trupo samo pu kuver twa, bann zenn samo Madyann ek Efa. Tu bann ki sorti Seba—zot pu vini. Zot pu sarye lor ek loliban. Ek zot pu anons bann luanz Zeova.” (Izai 60:6) Bann laful marsan pe diriz zot karavann samo lor bann gran larut ki al ver Zerizalem. Wi, bann samo la parey kuma enn inondasyon ki kuver peyi la! Bann komersan amenn bann kado ki ena enn gran valer, “lor ek loliban.” Ek sa bann marsan la vinn ver lalimyer Bondye pu ki zot kapav donn Li loner an piblik, ‘pu anons bann luanz Zeova.’

¹² Pa zis bann marsan ki pe fer sa vwayaz la. Bann berze usi pe mont ver Syon. Sa profesi la kontiyn dir: “Tu bann trupo Kedar—zot pu rasanble kot twa. Bann buk Nebayot—zot pu servi twa.” (Izai 60:7a) Bann tribi berze pe vinn ver lavil sin pu ofer zot meyer zanimo dan zot trupo pu Zeova. Zot al ziska ofer zotmem pu servi Syon! Kuma eski Zeova resevwar sa bann etranze la? Bondye Limem reponn: “Zot pu mont lor mo lotel avek mo lakor, ek mo pu ranpli mo zoli lakaz ar bote.” (Izai 60:7b) Avek bonte, Zeova aksepte ofrand ek servis sa bann etranze la. Zot prezans fer so tanp vinn zoli.

13, 14. Ki nu truv pe vini dan lwes?

¹³ Asterla, turn u latet ek egzaminn kote lwes. Ki u truve? Byin lwin, ena enn kitsoz ki kuma enn nyaz blan ki fane lor lamer. Zeova poz sa kestyon ki u pe panse la: “Kisannla sa bann ki pe anvole ek ki pe vini parey kuma enn nyaz, ek parey kuma bann pizon ki pe anvol ver zot lakaz?” (Izai 60:8) Zeova reponn so prop kestyon: “Bann zil pu kontiyn ena lespwar an mwa, bann gro bato Tarsis usi parey kuma okumansman, pu amenn to bann garson depi lwin, zot larzan ek zot lor avek zot, ver non Zeova to Bondye ek ver Sin Izrael, parski Li pu’nn fer twa vinn zoli.”—Izai 60:9.

¹⁴ Eski u kapav mazinn sa senn la? Sa nyaz blan la finn vinn pli pre ek asterla la li parey kuma enn kantite tipwin-tipwin byin lwin dan lwes. Li parey kuma enn grup zwazo ki pe anvole zis ora bann vag. Me amezir zot koste, u truve ki se bann bato avek zot lavwal ki’nn large pu ki divan diriz zot. Ena telman enn kantite bato ki pe navige ver Zerizalem, ki zot resanble enn grup pizon. Sa grup bato la sorti dan bann lepor ki byin-byin lwin, ek zot pe vwayaze enn vites maximem, ek zot pe amenn bann krwayan dan Zerizalem pu ador Zeova.

Lorganizasyon Zeova Grandi

15. (a) Ki lakrwasman bann parol Izai 60:4-9 anonse? (b) Ki lespri bann vre Kretyin manifeste?

¹⁵ Bann verse 4 ziska 9 dekrir enn zimaz profetik byin vivan lor lakrwasman mondyal ki finn ena depi 1919. Kifer eski Zeova ti beni Syon avek sa kantite lakrwasman la? Parski depi 1919, avek lobeisans Izrael Bondye finn fann lalimyer Zeova dan enn fason regilye. Me eski u ti remarke ki, dapre verse 7, sa bann nuvo veni la “mont lor lotel [Bondye]”? Enn lotel, se enn plas kot fer bann sakrifis, ek sa laspe sa profesi la rapel nu ki servis Zeova inplik bann sakrifis. Lapot Pol ti ekrir: “Mo sipliy zot . . . pu prezant zot lekor [kuma] enn sakrifis vivan, sin, akseptab pu Bondye, enn servis sakre baze lor zot rezon.” (Romin 12:1) An akor avek bann parol Pol, bann vre Kretyin pa kontant zot zis ar asiste bann servis relizye enn fwa par semenn. Zot donn zot letan, zot lenerzi ek zot resurs materyel pu favoriz vre ladorasyon. Eski prezans sa bann kalite adorater ki byin devwe la pa fer lakaz Zeova vinn zoli? Profesi Izai dir ki vremem li pu fer li vinn zoli. Ek nu kapav sir ki sa bann kalite adorater zele la, zot usi zot zoli devan lizye Zeova.

16. Kisannla ti ofer led pu travay rekonstriksyon dan lepok lontan, ek kisannla ki finn fer sa dan lepok modern?

¹⁶ Bann nuvo la anvi travay. Profesi la kontiyn dir: “Bann etranze pu ranz to bann miray ek zot bann prop lerwa pu servi twa.” (Izai 60:10) Dan premye lakonplisman sa bann parol la, kan bann Izraelit ti sorti dan Babilonn kot zot ti prizonye, bann lerwa ek bann lezot dimunn dan sa bann nasyon la ti vremem ede pu reranz tanp ek lavil Zerizalem. (Ezra 3:7; Neemya 3:26) Dan lakonplisman modern sa profesi la, gran laful finn sutenir bann leres manb win pu fortifye vre ladorasyon. Zot finn donn kudmin pu batir bann kongregasyon Kretyin ek pu ranfors bann “miray” lorganizasyon Zeova ki kuma enn lavil. Zot partisip usi dan travay konstriksyon literal—konstriksyon bann Lasal DiRwayom, bann Lasal Lasanble, ek bann Betel. Dan tu sa bann fason la, zot sutenir zot bann frer win ki ena responsabilite pu pran swin lorganizasyon Zeova ki pe grandi!

17. Sit enn fason Zeova fer so pep vinn zoli.

¹⁷ Bann dernye parol Izai 60:10 zot byin ankurazan! Zeova dir: “Dan mo koler mo ti pu bat twa, me dan mo bonte mo pu vremem ena pitye pu twa.” Wi, an 1918/1919, Zeova ti koriz so pep. Me sa seki finn arive lepase. Asterla, finn ariv ler pu ki Zeova exprim so mizerikord anver so bann serviter win ek zot bann konpaynon, bann lezot muton. Prev ki Zeova pe fer sa, se sa lakrwasman extraordiner ki Li pe donn zot kuma enn benediksyon, kumadir ‘pe fer zot vinn zoli.’

18, 19. (a) Ki promes Zeova ti fer an seki konsern bann nuvo ki pe vinn dan so lorganizasyon? (b) Ki bann leres verse Izai sapit 60 dir nu?

¹⁸ Sak lane, par santenn milye lezot “etranze” pe asosye zot ar lorganizasyon Zeova, ek laport sa lorganizasyon la pu res uver pu ki enn kantite lezot dimunn ankor swiv zot. Zeova dir Syon: “Wi, pu gard to bann laport tuletan uver; zot pa pu ferme ni pandan lazurne ni pandan lanwit, pu ki kapav amenn rises bann nasyon ver twa, ek zot bann lerwa pu pran latet.” (Izai 60:11) Sertin dimunn ki opoze sey ferm sa “bann laport” la, me nu kone ki zot pa pu reysi. Zeova Limem finn dir ki dan enn fason uswa enn lot, bann laport la pu res uver. Lakrwasman pu kontiyne.

¹⁹ Ena ankor lezot manyer ki Zeova finn beni so pep, ek finn fer zot vinn zoli dan sa bann dernye zur la. Bann leres verse Izai sapit 60 fer nu dekuver sa bann lezot manyer la dan enn fason profetik.

Eski U Kapav Explike?

• Kisannla “fam” sinbolik Bondye, ek kisannla ki reprezant li lor later?

• Kan eski bann zanfan Syon ti larg lekor an long lor later, ek kan ek kuma eski zot finn “leve”?

• Kuma eski, par diferan sinbol, Zeova ti anons lakrwasman bann predikater Rwayom ki ena zordi?

• Dan ki bann manyer Zeova finn fer so lalimyer briye lor so pep?

[Zimaz lor paz 20]

“Fam” sinbolik Zeova gayn lord pu leve

[Zimaz lor paz 22]

Grup bann bato resanble bann pizon lor lorizon