Konsolasyon dan Lepok Difisil

ZORDI bann nuvel ki nu tande dan lemond pa konsol nu ditu. Get par egzanp seki enn misye ti ekrir: “Bann kitsoz ki arive tulezur, telman bulvers nu ki defwa nu pa tro kone si nu pu ena ase kuraz pu get linformasyon, sizer.” Wi, lemond ranpli ar bann maler kuma lager, teroris, sufrans, ek krim ki kitfwa finn deza afekte nu, u sinon, pe get nu deryer laport.

Labib ti anons egzak pu egzak sityasyon ki ena dan lemond zordi. Zezi ti dir ki ti pu ena bann gran lager, bann maladi, bann tranbleman deter, ek lafaminn. (Lik 21:10, 11) Lapot Pol usi ti koz lor enn lepok ki apel “bann dernye zur.” Li ti ekrir ki “dan bann letan kritik ek difisil pu siporte,” bann dimunn pu vyolan, pu kontan larzan, ek pa pu kontan seki bon.—2 Timote 3:1-5.

Donk, ena enn resanblans dan seki nu tande tulezur ek seki Labib ti anonse. Me selman Labib li diferan, li explik usi kifer ena sa kantite move kondisyon la ek li donn nu enn lespwar pu lavenir.

Ki Bondye Panse lor Mesanste

Labib fer nu kone ki Bondye panse lor bann kondisyon difisil ki ena zordi. Dapre lapot Zan, “Bondye, Li lamur.” (1 Zan 4:8) Mem si Li’nn anons sa bann move kondisyon la dan so Parol, Li pa dakor ar sa bann kitsoz la ek Li pa pu toler sa pu tuletan. Li ayir mesanste. Bondye Li bon, Li interese ar nu ek Li konn met Li dan nu plas. Li ena kapasite pu tir mesanste ki ena lor later, ek se seki Li pu fer. Ala kifer, nu kapav gayn konsolasyon ar Li. Enn ekrivin Psom finn ekrir: “[Lerwa ki Bondye finn swazir dan lesyel] pu sap sa pov ki kriy osekur la, sa kikenn ki sagrin la, ek bann ki pena personn pu ed zot. Li pu sagrin bann ti dimunn ek li pu sap bann dimunn mizer. Li pu sov zot, ek zot pu ena valer devan so lizye.”—Psom 72:12-14.

Kan nu truv lezot sufer, nu’si nu sufer, pa vre? Kifer? Parski Bondye finn met sa santiman la dan nu. Pwiski Bondye finn kre nu dan so resanblans, nu kapav sir ki Li resanti kitsoz kan bann dimunn sufer. (Zenez 1:26, 27) Dayer, Zezi ki konn Zeova plis ki ninport kisannla, finn anseyne ki Bondye byin interese ar nu ek Li sufer kan nu sufer.—Matye 10:29, 31.

Bann kitsoz ki Bondye finn kre, montre ki Li pran bann dimunn kont. Par egzanp, Zezi ti dir ki Li “fer soley leve ek lapli tonbe lor bann bon ek move dimunn tulede.” (Matye 5:45) Pol dan so kote, ti dir bann dimunn dan lavil Lis: “[Bondye] fer kone ki Li ete kan Li fer seki bon, kan Li fer lapli tonbe ek kan Li donn bann bon sezon, pu donn nu labondans manze ek Li ranpli nu leker ar lazwa.”—Akt 14:17.

Kisannla Ki Responsab?

Pa Bondye ki responsab mesanste ki ena zordi. Me, se bann dimunn mem ki ena enn gran par responsabilite pu bann maler ki ariv zot. Se seki Pol ti dir bann dimunn dan lavil Lis: “Dan lepase [Bondye] ti permet bann nasyon fer seki zot anvi.”—Akt 14:16.

Kifer eski Zeova toler mesanste? Eski Li pu fer kitsoz? Zis Labib ki reponn sa bann kestyon la. Repons pu sa bann kestyon la ena enn rapor avek enn lespri invizib ek enn kestyon ki li ti suleve dan lesyel.

[Zimaz lor paz 4]

Si bann dimunn sufer kan lezot sufer, eski Bondye Li, Li pa resanti nanyin kan Li truv bann dimunn sufer?

[Bann foto lor paz 2]

KUVERTIR: Tink: UN PHOTO/J. Isaac; tranbleman deter: San Hong R-C Picture Company

[Bann foto lor paz 3]

Lao agos, Croatie: UN PHOTO 159208/S. Whitehouse; zanfan mal nuri: UN PHOTO 146150 BY O. MONSEN