Kifer Nu Bizin Priye Sanses?
“Priye sanses. Remersye Bondye pu tu kitsoz.”—1 TESALONISYIN 5:17, 18.
1, 2. Kuma Danyel ti montre ki li ti byin apresye privilez lapriyer, ek ki lefe sa ti ena lor so relasyon avek Bondye?
PROFET Danyel ti ena labitid priye Bondye trwa fwa par zur. Lao, dan so lasam, li ti met li azenu pre kot lafnet, ki ti pwint dan direksyon lavil Zerizalem. Ek la, li ti priye Zeova. (1 Lerwa 8:46-49; Danyel 6:10) Enn zur, Darius, lerwa Med ti apruv enn lalwa: okenn dimunn pa gayn drwa priye enn bondye uswa enn lot dimunn, apart Darius limem. Me malgre sa, Danyel pa finn ezite enn minit si li pu priye Zeova uswa non. Li ti enn zom ki ti kontan priye Bondye. Wi, ki so lavi ti an danze uswa non, Danyel ti priye Zeova sanses.
2 Kuma Zeova ti konsider Danyel? Letan anz Gabryel ti vinn reponn enn lapriyer Danyel, li ti dekrir Danyel kuma enn “kikenn ki byin dezirab” uswa “enn zom ki [Bondye] byin kontan.” (Danyel 9:20-23; The New English Bible) Dan profesi Ezekyel, Zeova ti koz Danyel kuma enn zom drwat. (Ezekyel 14:14, 20) Tutlong so lavi, Danyel finn priye Zeova, ek sa finn fer li devlop enn relasyon byin for avek Bondye. Dayer, mem Darius ti rekonet sa.—Danyel 6:16.
3. Kuma lapriyer kapav ed nu gard nu fidelite, parey kuma dan ka sa misyoner-la?
3 Kan nu priye Bondye regilyerman, sa kapav ed nu pu siport bann gran leprev. Get legzanp Harold King, ki ti misyoner an Chine. Li ti kondane sinkan prizon ek ti ferm li dan enn kaso izole. Frer King rakont so lexperyans: “Zot finn kapav elwayn mwa ar dimunn, me personn pa finn kapav elwayn mwa ar Bondye. . . . [Parey kuma] profet Danyel, trwa fwa par zur, mo met mwa azenu ek mo priye for-for. Ninport kisannla ki ti pas pre kot mo selil, ti kapav truve seki mo fer. . . . Li paret ki dan sa bann moman-la, lespri Bondye ti diriz mo panse lor bann kitsoz ki pli profitab pu mwa ek Li’nn fer mwa resanti enn kalm andan momem. Wi, lapriyer finn byin fortifye mwa ek konsol mwa lor plan spirityel.”
4. Ki bann kestyon lor lapriyer nu pu egzamine dan sa lartik-la?
4 Labib dir: “Priye sanses. Remersye Bondye pu tu kitsoz.” (1 Tesalonisyin 5:17, 18) Alor, li bon ki asterla nu egzaminn sa bann kestyon-la: Kifer nu bizin vey byin kalite ek regilarite nu bann lapriyer? Ki bann rezon nu ena pu kontiyn apros Zeova tuletan? Ek ki nu bizin fer si nu santi nu indiyn pu priye Bondye akoz nu bann defo?
Devlop Lamitye Avek Bondye Atraver Lapriyer
5. Ki lamitye byin spesyal lapriyer permet nu ena?
5 Eski u ti pu kontan ki Bondye konsider u kuma so kamarad? Ebyin se seki Abraam ti ete pu Li! (Izai 41:8; Zak 2:23) Zeova anvi ki nu devlop sa kalite lamitye-la avek Li. Avredir, Li invit nu pu vinn pros avek Li. (Zak 4:8) Sa invitasyon-la bizin fer nu pran konsyans ki lapriyer li vremem enn dispozisyon byin spesyal. Zordi, u bizin fer latet-lipye pu gayn randevu avek enn minis. Asterla, eski u krwar ki enn dimunn kumsa pu dispoze fer kamarad avek u? Purtan, Kreater liniver Li, Li ankuraz nu pu apros Li dan lapriyer ninport kan nu anvi, uswa ninport kan nu santi ki nu bizin priye. (Psom 37:5) Kan nu priye Zeova sanses, sa ed nu pu devlop enn bon lamitye avek Li.
6. Kuma atraver so legzanp, Zezi finn anseyn nu linportans pu “kontiyn priye”?
6 Me, li byin fasil pu negliz sa privilez lapriyer-la. Nu lespri telman okipe par bann presyon ki nu gayne tulezur, ki nu pa fer enn zefor pu koz ar Bondye. Zezi ti ankuraz so bann disip pu “kontiyn priye,” ek limem li ti fer sa. (Matye 26:41) Preske tuletan, Zezi ti okipe depi gramatin ziska aswar. Me malgre sa, li ti rezerv enn letan pu koz avek so Papa. Parfwa, li ti lev ‘boner gramatin, kan ankor fer nwar’ pu li al priye. (Mark 1:35) Lezot fwa, li ti al dan enn landrwa retire, tar dan lapremidi, pu koz avek Zeova. (Matye 14:23) Tuletan Zezi ti organiz so letan pu li priye; nu’si nu bizin fer parey.—1 Pyer 2:21.
7. Ki bann sityasyon ki bizin pus nu pu koz avek Zeova tulezur?
7 Tulezur, ena bann moman apropriye kot nu kapav priye Zeova personelman. Nu kapav fer sa kan nu dan problem, kan nu fer fas ar enn tantasyon, uswa kan nu devan enn desizyon. (Efezyin 6:18) Kan nu rod direksyon Bondye dan tu bann laspe nu lavi, nu sir ki nu lamitye avek Li pu grandi. Si de kamarad siport bann difikilte ansam, eski sa pa pu ranforsi zot lamitye? (Proverb 17:17) Pareyman, nu lamitye avek Zeova pu vinn pli solid, kan nu kont lor Li ek nu resanti so led.—2 Kronik 14:11.
8. Par legzanp Neemya, Zezi ek Ana, ki nu aprann lor longer nu lapriyer?
8 Nu bizin kontan ki nu kapav priye Zeova komye fwa nu anvi ek kantite nu anvi. Zeova pa fixe okenn limit. Neemya ti fer enn ti lapriyer vit-vit dan so leker avan ki li demann lerwa Pers enn faver. (Neemya 2:4, 5) Zezi usi ti fer enn ti lapriyer pu demann Zeova puvwar pu resisit Lazar. (Zan 11:41, 42) Parkont, kan Ana ti uver so leker ar Zeova, li “ti fer enn long lapriyer.” (1 Samyel 1:12, 15, 16) Donk, nu lapriyer kapav long uswa kurt, tu depan dan ki sityasyon nu ete.
9. Kifer dan nu lapriyer, nu bizin usi donn Zeova luanz ek remersye Li pu seki Li fer pu nu?
9 Dan Labib, ena buku lapriyer ki exprim profon rekonesans pu pozisyon siprem Zeova ek pu so bann travay extraordiner. (Egzod 15:1-19; 1 Kronik 16:7-36; Psom 145) Dan enn vizyon ki Zan ti gayne lor bann 24 ansyin—sif konple bann manb 144,000 dan lesyel—li ti truv zot pe donn Zeova luanz. Zot ti pe dir: “To merite, Zeova, wi nu Bondye, pu gayn laglwar, loner ek puvwar, parski to finn kre tu kitsoz, ek se parski twa to finn anvi, ki sa bann kitsoz-la egziste ek zot finn kre.” (Revelasyon 4:10, 11) Nu’si, nu ena bann rezon pu donn nu Kreater luanz regilyerman. Nu kone ki kantite bann paran kontan, kan zot zanfan remersye zot sinserman pu enn kitsoz ki zot inn fer pu li! Ebyin, avek bonte, Zeova finn fer buku kitsoz pu nu. Kan nu reflesi lor la ek nu exprim nu rekonesans pu sa, se enn bon fason pu amelyor kalite nu lapriyer.
Kifer Nu Bizin “Priye Sanses”?
10. Kuma lapriyer fortifye nu lafwa?
10 Priye regilyerman, sa li neseser pu nu lafwa. Enn fwa, Zezi ti montre, atraver enn legzanp, kifer li inportan ki nu ‘persiste priye san ki nu dekuraze.’ Apre sa, li ti demande: “Kan fils de l’homme vini, eski li pu truv vremem lafwa lor later?” (Lik 18:1-8) Bann lapriyer sinser fortifye lafwa. Kan Abraam ti’nn rant dan laz ek li pa ti ankor gayn okenn desandan, li ti koz sa ar Zeova. Dabor, Zeova ti dir li get lesyel ek sey kont bann zetwal, si li kapav. Apre sa, Bondye finn rasir li par sa bann parol-la: “Ala kuma to semans pu ete.” Ki lefe sa finn ena lor Abraam? Li finn “met lafwa an Zeova; ek [par so lafwa, Bondye] inn estim li kuma enn dimunn drwat.” (Zenez 15:5, 6) Si nu uver nu leker ar Zeova dan lapriyer, si nu aksepte lasirans ki Li donn nu dan Labib, ek si nu obeir Li, Li pu fortifye nu lafwa.
11. Kuma lapriyer kapav ed nu pu fer fas ar bann problem ki nu zwenn?
11 Lapriyer kapav usi ed nu pu fer fas ar bann problem. Eski nu santi nu lavi kuma enn fardo? Eski nu pe siport bann sityasyon byin difisil? Labib dir nu: “Zet to fardo lor Zeova, ek Li pu sutenir twa. Zame, Li pa pu les enn kikenn ki drwat, tonbe.” (Psom 55:22) Kan nu devan bann desizyon difisil, nu kapav imit legzanp Zezi. Li ti priye tusel tutlanwit, avan ki li swazir so 12 zapot. (Lik 6:12-16) Lanwit avan li mor usi, li ti priye Bondye. Ek so lapriyer ti telman intans ki “so laswer ti vinn kumadir bann gut disan ki pe kul anba.” (Lik 22:44) Ki rezilta? “Bondye finn aksepte lapriyer [Zezi], parski li ti ena lakrint pu Li.” (Ebre 5:7) Si nu priye sinserman Zeova ek nu fer sa sanses, sa pu ed nu pu fer fas ar bann sityasyon difisil ki nu zwenn.
12. Etandone ki nu kapav apros Zeova dan lapriyer, kuma sa montre ki Li interes personelman ar nu?
12 Enn lot rezon pu vinn pli pros ar Zeova dan lapriyer, seki Li usi, an retur, Li pu vinn pli pros ar nu. (Zak 4:8) Kan nu uver nu leker ar Zeova dan lapriyer, eski nu pa santi ki Li interese ar nu bann bezwin ek ki Li pran nu byin swin? Nu kapav fer lexperyans personelman ki Bondye kontan nu. Pans sa enn ku: Bondye dispoze personelman pu ekut sak lapriyer ki so bann serviter fer; Li pa finn larg sa responsabilite-la ar personn! (Psom 66:19, 20; Lik 11:2) Ek Li invit nu pu ‘zet tu nu traka lor Li, parski Li pran nu swin.’—1 Pyer 5:6, 7.
13, 14. Ki bann rezon nu ena pu priye sanses?
13 Lapriyer kapav pus nu pu ena enn pli gran zel pu la predikasyon. Li kapav usi fortifye nu kan lindiferans ek lopozisyon fer nu anvi aret prese. (Akt 4:23-31) Lapriyer kapav usi protez nu kont “bann manigans Dyab.” (Efezyin 6:11, 17, 18) Amezir ki nu pe lite pu fer fas ar nu bann leprev, nu kapav kontiyn dir Zeova fortifye nu. Dan lapriyer model ki Zezi ti done, li ti dir ki nu kapav demann Zeova “sov nu ar sa kikenn ki move-la,” Satan le Dyab.—Matye 6:13.
14 Nu bizin kontiyn demann Zeova so led pu kontrol nu bann tandans inparfe. Lerla, nu pu resanti led Zeova. Nu ena sa lasirans-la: “Bondye Li fidel, ek Li pa pu les zot gayn enn tantasyon ki zot pa pu kapav siporte, me ansam avek sa tantasyon-la, Li pu usi uver enn semin pu ki zot kapav siport li.” (1 Korintyin 10:13) Lapot Pol, limem, ti santi ki Zeova ti donn li lafors dan plizir sityasyon. Li ti dir: “Pu tu kitsoz mo ena kuraz grasa sa Kikenn ki donn mwa lafors-la.”—Filipyin 4:13; 2 Korintyin 11:23-29.
Persevere dan Lapriyer Malgre Nu Bann Defo
15. Ki kapav ariv nu, si nu pa’nn reysi respekte kod kondwit Bondye?
15 Pu ki Bondye aksepte nu lapriyer, fode pa nu rezet konsey so Parol. Lapot Zan ti ekrir: “Ninport ki nu demande, Li donn nu, parski nu pe swiv so komannman ek nu pe fer seki bon devan so lizye.” (1 Zan 3:22) Me, ki kapav ariv nu, si nu pa’nn reysi respekte kod kondwit Bondye? Apre zot pese dan zardin Edenn, Adan ek Ev ti al kasyet. Pareyman, kitfwa, nu’si nu pu anvi kasyet nu lwin “ar figir Zeova” ek aret priye Li. (Zenez 3:8) Get seki enn sirveyan itineran ki ena buku lexperyans, finn dir: “Mo’nn remarke ki lapliparditan, premye erer ki enn kikenn fer kan li pe elwayn li ar Zeova ek so lorganizasyon, se aret priye.” (Ebre 2:1) Se seki ti ariv José Ángel. Li dir: “Pandan preske 8 an, mo finn priye Zeova rarman. Mo ti santi mwa indiyn pu koz ar Li, mem si mo ti ankor tuzur konsider Li kuma mo Papa dan lesyel.”
16, 17. Donn bann legzanp ki montre kan nu priye regilyerman, sa kapav ed nu pu sirmont bann febles spirityel.
16 Sertin parmi nu kapav santi zot indiyn pu priye, parski zot ena enn febles spirityel, uswa parski zot finn tom dan enn move kondwit. Me purtan, se sirtu dan sa sityasyon-la, ki nu bizin plis profit dispozisyon ki Zeova inn pran pu nu priye Li. Kan Bondye ti donn Yona enn misyon pu fer, li ti sove, li ti ale. Me, ‘dan so detres, li finn kriye Zeova, ek Zeova finn reponn li. Depi dan vant Seol, Yona finn kriye pu gayn led, ek Zeova finn tann so lavwa.’ (Yona 2:2) Wi, Yona ti priye, Zeova ti reponn so lapriyer, ek Yona ti retruv so lasante spirityel.
17 José Ángel usi finn priye Bondye sinserman pu gayn led. Li rakonte: “Mo finn uver mo leker ek mo finn sipliy Bondye pu pardonn mwa. Ek vremem, Li finn pardonn mwa. Mo pa krwar ki mo ti pu return dan laverite san led lapriyer. Asterla, mo priye tulezur, ek mo atann sa bann moman-la avek inpasyans.” Nu bizin tuletan santi nu lib pu koz uvertman ar Bondye lor nu bann erer ek demann Li pardon avek limilite. Kan Lerwa David ti konfes so bann pese, Zeova ti pardonn li. (Psom 32:3-5) Zeova anvi ed nu, pa pu kondann nu. (1 Zan 3:19, 20) Lapriyer bann ansyin dan kongregasyon kapav ed nu lor plan spirityel, parski zot lapriyer ena “buku lafors.”—Zak 5:13-16.
18. Ki lasirans bann serviter Bondye kapav ena, mem ki kantite zot finn tom dan pese?
18 Ki papa pu rezet so garson ki, avek limilite, pe demann li led ek konsey, apre ki li’nn komet enn fot? Parabol “fis prodig” montre ki, mem ki kantite enn dimunn kapav tom dan pese, nu Papa dan lesyel byin kontan kan sa dimunn-la return ver Li. (Lik 15:21, 22, 32) Zeova ankuraz tu bann ki’nn fer pese pu apel Li, “parski Li pu pardonn [zot] avek bonker.” (Izai 55:6, 7) Malgre ki David ti komet plizir pese grav, li ti turn li ver Zeova. Li ti dir Li: “A Bondye, ekut mo lapriyer. Pa inyor demann ki mo pe fer pu gayn to faver.” Li finn dir usi: “Gramatin, tanto, midi, mo pa kapav aret pran traka ek pleyne, ek [Zeova] tann mo lavwa.” (Psom 55:1, 17) Eski sa pa rasir nu?
19. Kifer fode pa ki, sak fwa ki nu pa gayn repons nu lapriyer, deswit nu panse ki Bondye pa’nn aksepte li?
19 Me ki pu fer si Zeova pa reponn nu lapriyer tutswit? Nu bizin fer ansort ki nu lapriyer an armoni avek volonte Zeova ek ki nu adres sa lor non Zezi. (Zan 16:23; 1 Zan 5:14) Disip Zak ti fer referans ar sertin Kretyin ki ti priye, me Zeova pa ti reponn zot lapriyer. Kifer? Parski zot ti priye “avek bann move lintansyon.” (Zak 4:3) Asterla, defwa nu kapav gayn linpresyon ki Bondye pa’nn reponn nu lapriyer. Me, fode pa ki deswit nu panse ki Bondye pa’nn aksepte sa. Parfwa, Zeova les so bann fidel serviter priye konsernan enn kitsoz pandan enn sertenn letan. Lerla, Li fer zot konn so repons. Zezi ti dir: “Kontiyn demande, ek zot pu gayne.” (Matye 7:7) Donk, nu bizin “persevere dan lapriyer.”—Romin 12:12.
Priye Regilyerman
20, 21. (a) Kifer nu bizin priye sanses dan sa bann ‘dernyer zur-la’? (b) Ki nu pu gayne, si tulezur nu apros tronn Zeova?
20 Nu pe konn deplizanpli presyon ek problem dan sa ‘dernye zur-la,’ kot ‘letan byin kritik pu siporte.’ (2 Timote 3:1) Bann leprev kapav fasilman tuf nu lespri. Me, si nu kontiyn priye Bondye sanses, sa pu ed nu santre nu lavi lor bann kitsoz spirityel, malgre bann problem ki pa’le fini, tantasyon ek dekurazman. Kan nu priye Zeova tulezur, nu kapav gayn sutyin neseser ki nu bizin.
21 Zeova ‘tann nu lapriyer’; zame, Li pa tro okipe pu ekut nu. (Psom 65:2) Alor, fode pa ki nu, nu tro okipe pu koz ar Li. Nu lamitye avek Bondye, sa mem pli gran dibyin ki nu kapav ena. Fode ki zame nu suzestim so valer. “Alor, avek fransiz, anu apros tronn [Bondye] pu nu gayn so mizerikord ek so faver ki nu pa merite, pu ki kumsa, nu gayn led dan ler ki bizin.”—Ebre 4:16.
Kuma U Pu Reponn?
• Ki nu aprann ar profet Danyel konsernan valer lapriyer?
• Kuma nu kapav ranforsi nu lamitye avek Zeova?
• Kifer nu bizin priye sanses?
• Kifer fode pa nu aret priye Zeova, mem si nu santi nu indiyn?
[Zimage page 16]
Neemya ti fer enn ti lapriyer vit-vit, dan so leker avan li koz ar lerwa
[Zimage page 17]
Ana “ti fer enn long lapriyer devan Zeova”
[Zimage page 18]
Zezi ti priye tusel tutlanwit, avan li swazir so 12 zapot
[Zimage page 20]
Tutlazurne, nu ena bann lokazyon pu priye Bondye