Parole Jéhovah Vivant

APRÈS ki bann Israélites inn quitte l’Égypte, Jéhovah ti organise zot en enn nation. Enn tipé après sa, zot ti éna possibilité pou rentre dans la Terre Promise, mais zot pa’nn rentré. Au lieu sa, zot inn bizin tourne en rond pendant apépré 40 ans dans “enn grand désert ki faire peur”. (Deutéronome 8:15) Kifer? Bann récits historique ki trouve dans livre Nombres raconte nous séki’nn arrivé. Sa faire nous bien comprend la nécessité pou obéir Jéhovah ek pou respecté so bann représentants.

C’est Moïse ki ti écrire Livre Nombres dans désert ek dans Plaines Moab. Sa livre-la couvert enn période 38 ans ek 9 mois—à partir 1512 A.N.L. ziska 1473 A.N.L. (Nombres 1:1; Deutéronome 1:3) Livre-la appelle Nombres à cause deux recensements ki ti faire parmi bann Israélites dans enn l’intervalle 38 ans. (Chapitres 1-4, 26) Sa récit-la divisé en trois parties. Premier partie raconte séki’nn passé kot Montagne Sinaï. Deuxième partie couvert séki’nn arrivé pendant ki Israël ti tourne en rond dans désert. Et dernier partie raconte bann l’évènements ki’nn arrivé dans Plaines Moab. À mesure ki ou lire sa récit-la, peut-être ou pou envie réfléchi lor sa bann questions-la: ‘Ki sa bann kitsoz ki’nn arrivé-la montré moi? Eski dans sa livre-la éna bann principes ki kapav utile pou moi zordi?’

KOT MONTAGNE SINAÏ

(Nombres 1:1–10:10)

Premier parmi sa deux recensements-la faire pendant ki bann Israélites encore kot Montagne Sinaï. À part bann Lévites, éna en tout 603,550 mâles ki éna 20 ans ou-soit plis. Apparemment, sa recensement-la faire pou bann raisons militaire. Li possible ki éna enn total apépré trois millions dimoune dans camp, si compte bann madames, bann zenfants, ek bann Lévites, aussi.

Après sa recensement-la, bann Israélites recevoir bann instructions lor couma zot pou organise zot pou zot marche en ordre. Zot gagne aussi bann détails concernant fonctions bann Lévites et service dans tabernacle, bann commandements lor quarantaine, et bann la-lois concernant bann cas jalousie, et aussi bann la-lois concernant promesses bann Naziréens. Dans chapitre 7, éna bann renseignements lor bann offrandes ki bann chefs tribu ti faire pou inauguration l’autel, et chapitre 9 koz lor célébration la-Pâque. Bann Israélites aussi gagne bann instructions lor façon pou organise zot pou dresse zot camp kan zot arrive dans enn l’endroit et aussi kan zot quitte camp-la.

Réponses pou Bann Questions Biblique:

2:1, 2—Dans désert, bann tribus ti bizin campe par groupe trois autour “bann signes.” Ki ‘sa bann signes-la’ sa? La Bible pa donne enn description couma sa bann signes-la ti été. Mais, personne pa ti considère zot couma bann symboles sacré ek zot pa ti éna okenn signification religieux. Le peuple ti servi sa bann signes-la pou enn raison pratique—pou aide zot trouve zot place dans camp.

5:27—Sa verset-la dire ki kan enn femme inn commette l’adultère, so ‘la-cuisse pou dépéri.’ Ki sa veut dire? Mot “la cuisse” désigne bann organes reproduction. (Genèse 46:26) Le fait ki so ‘la-cuisse pou dépéri’ laisse croire ki so l’organes reproduction pou dépéri et ki li pa pou kapav tombe enceinte.

Leçons pou Nous:

6:1-7. Bann Naziréens ti bizin pa consomme okenn produit pié raisin ni okenn la-boisson alcoolique et zot ti bizin éna l’esprit sacrifice. Zot ti bizin laisse zot cheveux vinn longue—enn signe ki zot soumette avec Jéhovah, pareil couma bann femmes bizin soumette avec zot mari ou-soit zot papa. Pou ki zot reste pur, bann Naziréens ti bizin reste loin ar n’importe ki cadavre, mem cadavre enn parent proche. Zordi bann serviteurs à plein temps montré enn l’esprit sacrifice kan zot renonce à zot l’intérêt ek désirs personnel, ek soumette avec Jéhovah ek bann dispositions ki Li prend. Peut-être certains bizin al servi dans enn l’autre pays ki loin, et li peut-être difficile ou-soit mem impossible pou zot retourne kot zot pou l’enterrement enn membre zot famille proche.

8:25, 26. Pou ki ti ena toulétan bann zom capable ki servi couma Lévites, et par considération pou zot l’âge, ti ordonne bann Lévites plus âgés pou prend zot retraite dans service obligatoire. Mais zot ti kapav offer zot service pou aide bann lézot Lévites. Zordi nous pa prend retraite dans travail prédication. Mais principe ki nous tiré dans sa la-loi-la enseigne nous enn leçon ki éna enn grand valeur. Si enn Chrétien népli kapav acquitte certaines obligations à cause li’nn rentre dans l’âge, li kapav servi dans enn l’autre forme service d’après so possibilité.

DÉPLACEMENT DANS DÉSERT

(Nombres 10:11–21:35)

Kan nuage ki trouve lor tabernacle finalement avancé, bann Israélites commence enn la-marche ki pou dure enn tipé plus ki 38 ans ek ki pou amène zot dans Plaines Moab, ki ti désert. Ou kapav trouve sa utile pou suive chemin ki zot inn faire lor map ki éna lor page 9 dans brochure “ Voyez le bon pays,” ki publié par bann Témoins de Jéhovah.

Dans le désert de Paran, alors ki zot pé dirige zot vers Qadesh, bann Israélites plaigné au moins en trois l’occasions. Jéhovah arrête premier plainte kan li envoye enn difé ki dévore certains parmi zot. Après sa, bann Israélites réclame la viande, et Jéhovah envoye bann cailles. Ensuite Miriam ek Aaron murmure kont Moïse ek à cause sa, Miriam attrape la lèpre pou inpé létemps.

Alors ki zot pé campé à Qadesh, Moïse envoye 12 zom pou espionne la Terre Promise. Zot retourné 40 jours après. Dix parmi bann espions faire enn rapport défavorable ek le peuple croire zot. À cause sa, zot envie lapide Moïse, Aaron ek bann espions fidèle, Josué ek Caleb. Jéhovah dire ki li pou frappe zot avec la peste, mais Moïse intervenir en faveur le peuple ek demann pardon pou zot. Bondié dire ki zot pou tourne en rond dans désert pendant 40 ans—ziska ki bann ki ti’nn compté dans recensement, zot mort.

Jéhovah donn encore lézot la-lois. Qorah ek lézot rébellé kont Moïse ek Aaron, mais soit zot détruire par enn difé, soit la terre englouti zot. Lendemain, la nation en entier murmure kont Moïse ek Aaron. À cause sa, Jéhovah envoye enn plaie ki touye 14,700 Israélites. Pou faire koné kisannla Li’nn choisir couma grand prêtre, Jéhovah faire bâton Aaron bourgeonné. Après sa, Jéhovah donne lézot la-lois concernant l’obligations bann Lévites ek purification le peuple. L’utilisation la-cendre enn vache rouge représente purification par moyen sacrifice Jésus.—Hébreux 9:13, 14.

Bann Israélites retourne Qadesh, ek là, Miriam mort. Encore enn fois, zot murmuré kont Moïse ek Aaron. Zot raison? Péna de l’eau. Parski Moïse ek Aaron pa sanctifié nom Jéhovah kan zot faire miracle pou gagne de l’eau, zot perdi privilège pou rentre dans la Terre Promise. Israël quitte Qadesh, et Aaron mort kan zot arrive Montagne Hor. Alors ki zot pé contourne pays Edom, bann Israélites commence fatigué ek zot koz kont Bondié ek Moïse. Jéhovah envoye bann serpents qui éna poison pou puni zot. Encore enn fois, Moïse intervenir pou demann Jéhovah pardon, ek Bondié donne li l’ordre pou faire enn serpent en cuivre ek place li lor enn poteau pou ki bann ki gagne mordé, kapav guette sa pou zot guéri. Serpent-la représente Jésus ki’nn attaché lor enn poteau pou nou bonheur éternel. (Jean 3:14, 15) Israël remporte la victoire lor bann le-rois Amorites, Sihon ek Og, ek prend zot bann la-terre.

Réponses pou Bann Questions Biblique:

12:1—Kifer Miriam ek Aaron ti murmure kont Moïse? Zot ti murmuré parski apparemment Miriam ti envie éna enn plis pouvoir. Kan Tsippora, femme Moïse, ti vinn joinde zot dans désert, li possible ki Miriam ti peur ki bann Israélites ti népli pou considère li couma la première dame.—Exode 18:1-5.

12:9-11—Kifer seulement Miriam ti gagne la lèpre? Sûrement, c’est li ki ti commence murmuré en premier ek li ti persuade Aaron pou faire pareil couma li. Aaron ti manifesté enn bon l’attitude kan li ti confesse so erreur.

21:14, 15—Ki livre ki mentionné ici? La Bible mentionne plusieurs livres ki bann écrivains la-Bible ti servi couma bann sources références. (Josué 10:12, 13; 1 Rois 11:41; 14:19, 29) “Le livre des Guerres de Jéhovah” ti enn parmi sa bann livres-la. La-dan ti éna enn récit historique bann la-guerres ki le peuple Jéhovah finn livré.

Leçons pou Nous:

11:27-29. Moïse donne enn l’exemple remarquable lor façon ki nous bizin réagir kan lézot gagne bann privilèges dans service Jéhovah. Au lieu ki li ti jaloux ek rode la gloire pou li, Moïse ti content kan Eldad ek Médad ti commence comporte zot en prophètes.

12:2, 9, 10; 16:1-3, 12-14, 31-35, 41, 46-50. Jéhovah atann ki so bann adorateurs montré respect pou l’autorité ki Li’nn établi.

14:24. Le monde faire pressions lor nous pou nous faire le mal. Pou nous kapav résisté kont sa nous bizin développe “enn l’autre l’esprit,” ou-soit enn l’autre l’attitude mental.” Fodé pa ki li pareil avec l’attitude le-monde.

15:37-41. Sa frange spécial ki ti dans bord robes bann Israélites, ti rappelle zot ki zot ti enn peuple ki ti’nn mette à part pou l’adoration Bondié ek pou obéir so commandements. Eski nous aussi nous pa bizin vive d’après bann principes Bondié ek montré nous différent avec sa le-monde-la?

DANS PLAINES MOAB

(Nombres 22:1–36:13)

Pendant ki bann Israélites campé dans plaines Moab, bann Moabites éprouve enn grand la-peur à cause zot. Alors, le Roi Balak, engage Balaam pou maudi bann Israélites. Mais Jéhovah force Balaam pou béni zot. Lerla bann-la servi bann femmes Moabite ek Madianite pou attire bann zom Israélites pou commette l’immoralité ek l’idôlatrie. À cause sa, Jéhovah détruire 24,000 Israélites ki’nn commette le mal. Plaie-la finalement arrêté kan Phinéas montré ki li pa tolère okenn rivalité kont Jéhovah.

Deuxième recensement montré ki, c’est zis Josué ek Caleb, ki encore vivant parmi tou bann zom ki ti compté dans premier recensement. Jéhovah choisir Josué pou remplace Moïse. Bann Israélites recevoir bann instructions lor façon pou offer différent offrandes ek aussi lor bann promesses. Bann Israélites aussi tire zot vengeance lor bann Madianites. Ruben, Gad, ek la moitié tribu Manassé établi zot dans l’est la-Rivière Jourdain. Israël gagne bann instructions lor façon pou traverse la Rivière Jourdain ek pou prend possession pays-la. Frontières chaque partie pays-la bien défini. Zot tire au sort pou partage l’héritage. Bann Lévites recevoir 48 la-villes, et 6 la-dan pou servi couma bann la-villes de refuge.

Réponses pou Bann Questions Biblique:

22:20-22—Kifer Jéhovah inn en colère ar Balaam sa quantité-la? Jéhovah ti’nn dire prophète Balaam ki li bizin pa maudi bann Israélites. (Nombres 22:12) Mais seulement, Balaam ti accompagne bann zom Balak avec l’intention pou maudi Israël. Balaam ti envie faire plaisir le roi Moabite ek recevoir enn récompense ar li. (2 Pierre 2:15, 16; Jude 11) Mem kan Balaam ti obligé béni au lieu maudi Israël, li ti rode faveur le-roi kan li ti donn l’idée pou servi bann femmes ki adore Baal pou attire bann zom Israélites. (Nombres 31:15, 16) Donc raison pou kifer Jéhovah ti en colère ar Balaam sa quantité-la, c’est parski li ti tellement gourmand ki li ti paré pou faire n’importe quoi.

30:6-8—Eski enn mari Chrétien kapav cancel bann promesses ki so madame inn fer? En séki concerne bann promesses, asterla Jéhovah considère so bann adorateurs lor plan individuel. Par exemple, kan nous voué nous pou servi Jéhovah, sa li enn promesse personnel. (Galates 6:5) Enn mari péna l’autorité pou cancel sa qualité promesse-la. Mais, enn femme bizin évite faire enn promesse ki al kont Parole Bondié ou-soit kont so bann responsabilités envers so mari.

Leçons pou Nous:

25:11. Phinéas inn vrémem laisse nous enn l’exemple zèle pou l’adoration Jéhovah! Nous désir pou garde la congrégation pur, bizin pousse nous pou informe bann anciens lor n’importe ki cas l’immoralité ki nou’nn arrivé koné.

35:9-29. Le fait ki enn meurtrier involontaire ti bizin quitte so lakaz ek sauvé, al dans enn la-ville refuge pou enn certain le-temps montre nous ki la vie, li sacré ek ki nous bizin éna respect pou li.

35:33. La terre inn pollué avec du sang bann innocents. Pou kapav couver sa du sang-la, bizin verse du sang bann ki responsable. Li donc approprié ki Jéhovah détruire bann mauvais avant ki la terre vinn enn paradis!—Proverbes 2:21, 22; Daniel 2:44.

Parole Bondié, Li Puissant

Nous bizin montré respect pou Jéhovah ek pou bann ki Li’nn établi dans bann positions responsabilité parmi so peuple. C’est enn vérité ki livre Nombres faire ressorti dans enn façon encore plus clair. Nous vrémem aprann enn leçon important ki montre nous ki nous bizin garde la paix ek l’unité dans la congrégation zordi.

Sa bann kitsoz ki’nn arrivé ek ki raconté dans livre Nombres montré nous couma bann ki néglige zot spiritualité kapav facilement tombe dans mauvais conduite, couma bann murmures, l’immoralité, ek l’idolâtrie. Kapav servi certains l’exemples ek leçons ki éna dans sa livre-la couma enn base, kan discute bann besoins congrégation dans Réunions de Service. Oui, “parole Bondié, li vivant ek li puissant” dans nou la-vie.—Hébreux 4:12.

[Zimage, page 31]

Par moyen enn nuage ki Jéhovah ti faire apparaite par miracle lor tabernacle, Li ti dirige bann Israélites kan zot ti arrive dans enn camp ek kan zot ti quitte camp-la

[Zimage, page 32]

Jéhovah mérité ki nous obéir Li ek Li atann ki nou respecté so bann représentants