Eski sa vaut la peine reste fidel?

KARL, representant enn compagnie l’assurance ti dire: “Ou pé paye trop beaucoup pou ou l’assurance maladie. Si ou vinn avek mo compagnie, ou pou faire enn l’economie plus ki 500 roupie par mois, seki vaut la peine.”a

Jens ti reponn: “Sa kapav vrai, mais sa faire plusieurs l’année depuis ki mo avek mem compagnie. Dan le passé, zot finn aide moi beaucoup ek mo envie reste fidel ar zot.”

Karl ti reponn: “La fidelité, li enn qualité ki mo apprecié, mais a cause ou fidelité, ou pé perdi l’argent!”

Karl ti ena raison. Souvent, la fidelité kapav coute nou l’argent. Li aussi demann le temps, l’energie, ek nou bann sentiment aussi engagé. Eski sa vaut la peine reste fidel?

Bann dimoune apprecié la fidelité, mais pena beaucoup ki pratik li

Dan enn sondage ki Allensbach Opinion Research Institute ti faire en Allemagne, 96 dimoune lor 100 inn dire ki zot apprecié la fidelité. Enn deuxieme sondage ki ti faire par mem l’institut parmi bann ki ena entre 18 ek 24 an, ti montré ki 2 dimoune lor 3 ti en faveur la fidelité.

Mem si beaucoup dimoune apprecié la fidelité, dan la pratik li different. Par exemple, dan plusieurs pays en Europe, bann couple ou-soit bann membre la famille souvent pa montré-zot fidel enn envers lot. Souvent bann camarade pa reste fidel. La fidelité ki ti ena longtemps entre patron ek employé, ek entre enn business ek so bann client, finn preské disparette. Kifer?

Tou kitsoz al tellement vite ki parfois nou pa reste beaucoup lé-temps ni la force moral pou bann l’engagement kot bizin montré la fidelité. Bann dimoune ki finn gagne bann deception dan zot relation avek lezot, kitfois hesité pou reste fidel envers n’importe kisannla. Lezot prefere bann relation kot zot pa bizin attache-zot ek kot zot pa pou bizin montré zot fidelité..

Mem si pou different raison la fidelité pé disparette, la plupart dimoune apprecié la fidelité, mais zot pa pratik li. Alors, anou considere sa bann question-la: Eski sa vaut la peine reste fidel? Si oui, envers ki nou bizin fidel, ek dan ki fason? Ki l’avantage nou ena kan nou fidel?

[Note]

[L’encadré page 3]

Bann dimoune apprecié la fidelité, mais pena beaucoup ki pratik li