Bann nouveau membre dan College central
MERCREDI 24 août 2005, gramatin, famille Béthel dan États-Unis ek Canada, ki ti pé suive program texte du jour en direct par video, ti tann enn bon nouvel. A partir le 1er septembre 2005, ti pou ena deux nouveau membre dan College central: Geoffrey W. Jackson ek Anthony Morris.
Frere Jackson ti commence service pionnier en février 1971 en Tasmanie, enn l’île ki faire partie l’Australie. En juin 1974, li ti marié avek Jeanette (Jenny). Enn tipé apré zot mariage, zot ti nommé pionnier special. Entre 1979 ek 2003, zot ti servi couma missionnaire dan Tuvalu, Samoa, ek Fidji, bann l’île ki trouve dan sud l’ocean Pacifique. La-bas, frere ek soeur Jackson inn aussi faire beaucoup dan traduction bann publication la Bible. Au commencement 1992, frere Jackson ti vinn membre Comité filiale Samoa, ek en 1996 li ti nommé dan Comité filiale Fidji. En avril 2003, li ek so madame ti vinn membre famille Béthel États-Unis kot zot ti travail dan Service traduction. Inpé apré sa, frere Jackson inn nommé assistant dan Comité pou l’enseignement, enn parmi bann comité ki ena dan College central.
Frere Morris ti commence service pionnier en 1971 dan États-Unis. En décembre sa l’année-la, li ti marié avek Susan, ek zot ti contigne faire pionnier pendant preské quatre an, ziska naissance zot premier garson, Jesse. Apré, zot inn gagne enn lot garson, Paul. Frere Morris inn recommence so service en 1979 en tant ki pionnier permanent. So madame aussi inn reprend service pionnier kan zot bann zenfant inn rente lekol. La famille ti servi kot ti ena enn grand besoin proclamateur dan Rhode Island ek Caroline du Nord, dan États-Unis. Frere Morris ti servi couma remplacant surveillant circonscription en Caroline du Nord ek so bann garson ti commence service pionnier permanent. Kan Jesse ek Paul ti gagne 19 an, zot ti invité pou al servi dan Béthel États-Unis. Entre temps, frere Morris ti vinn surveillant circonscription. Apré, en 2002, li ek Susan ti invité pou vinn Béthel ek zot inn commence zot service dan Béthel le 1er août. Frere Morris ti travail dan Bureau service, Patterson, ek apré li’nn nommé couma assistant dan Comité pou service, enn lot comité ki ena dan College central.
En plus sa deux nouveau membre-la, dan College central ena frere Carey Barber, John Barr, Theodore Jaracz, Samuel Herd, Stephen Lett, Gerrit Lösch, Guy Pierce, Albert Schroeder, David Splane ek Daniel Sydlik. Tou bann membre College central, zot bann chrétien oint.