Couma nou kapav approche ar Bondié ki “ecoute la priere”
“Toi ki ecoute la priere, oui tou dimoune pou vinn vers toi.”—PSAUME 65:2.
1. Ki difference ena entre bann dimoune ek bann lezot creature ki vive lor la terre, ek ki privilege sa donne nou?
Parmi tou bann millier creature ki vive lor la terre, zis bann dimoune ki ena capacité pou adore nou Createur. C’est zis bann dimoune ki conscient ki zot ena enn besoin spirituel ek ki ena desir pou satisfaire sa besoin-la. Sa donne nou enn grand privilege pou ena enn relation personnel avek nou Papa ki dan le ciel.
2. Ki mauvais l’effet peché finn ena lor relation ki bann dimoune ti ena avek zot Createur?
2 Bondié inn crée bann dimoune avek capacité pou approche ar Li. Adam ek Ève pa ti ena okenn peché kan Bondié ti crée zot. Sa vedir ki zot ti libre pou approche ar Bondié pareil couma enn zenfant approche ar so papa. Mais, kan zot inn faire peché, zot inn perdi sa privilege-la. Adam ek Ève ti desobeir Bondié ek zot ti perdi sa relation proche ki zot ti ena avek Li-la. (Genèse 3:8-13, 17-24) Eski sa vedir ki zot bann descendant ki imparfait nepli kapav approche ar Bondié? Non, Jéhovah encore toujours permette zot pou approche ar Li, mais zot bizin rempli certain condition. Ki sa bann condition-la?
Bann condition pou approche ar Bondié
3. Couma bann dimoune imparfait kapav approche ar Bondié, ek ki l’exemple montré sa?
3 Pou nou koné ki Bondié demann enn dimoune imparfait ki envie approche ar Li, anou guette enn l’evenement ki’nn passé dan la vie deux garson Adam ek Ève. Caïn ek Abel toulé-deux ti faire zeffort pou approche ar Bondié kan zot ti donne Li bann sacrifice. Bondié ti accepté sacrifice Abel mais pa sacrifice Caïn. (Genèse 4:3-5) Kifer? Hébreux 11:4 dire: “Par la foi, Abel ti offert Bondié enn sacrifice ki ti ena enn pli grand valeur ki sacrifice Caïn. Grace a so la-foi, li ti gagne temoignage ki li ti droite.” Li clair ki la foi, li enn condition ki nou bizin rempli pou approche ar Bondié. Nou trouve enn lot condition dan seki Jéhovah ti dire Caïn: “Si to commence faire seki bon, eski mo pa pou eleve toi?” Oui, Bondié ti pou accepté sacrifice Caïn si li ti commence faire seki bon. Mais Caïn ti rejette conseil Bondié, li ti touye Abel ek li ti vinn couma enn kikenn ki ti rejeté par la societé. (Genèse 4:7-12) Nou trouvé ki depuis commencement-mem, li ti bien important ki bann dimoune ti ena la foi ek faire seki bon pou zot kapav approche ar Bondié.
4. Ki nou bizin reconette si nou envie approche ar Bondié?
4 Si nou envie approche ar Bondié, li bien important ki nou reconette ki nou bann pecheur. Tou dimoune faire peché, ek peché li enn l’obstacle ki empeche nou approche ar Bondié. Concernant nation Israël, prophete Jérémie ti ecrire: “Nou, nou finn faire peché . . . Avek enn gros nuage, to finn barre chemin pou ki nou pa kapav approche ar toi, pou ki la priere pa passé.” (Lamentations 3:42, 44) Mais malgré ki bann dimoune zot imparfait, Bondié finn toujours montré ki Li disposé pou ecoute la priere bann dimoune ki approche ar Li avek la foi, ki ena enn bon l’attitude, ek ki obeir so bann commandement. (Psaume 119:145) Ki sa bann dimoune-la sa, ek ki nou kapav aprann ar zot la-priere?
5, 6. Ki nou kapav aprann ar fason ki Abraham ti approche ar Bondié?
5 Parmi sa bann dimoune-la, ti ena Abraham, enn patriarche setadir chef enn grand famille. Bondié ti accepté ki Abraham approche ar Li parski li ti appel Abraham “mo camarade.” (Isaïe 41:8) Ki nou kapav aprann ar fason ki Abraham ti approche ar Bondié? Li ti prié Jéhovah concernant enn heritier. Li ti dire: “Ki to pou donne moi parski mo pé al mort sans zenfant?” (Genèse 15:2, 3; 17:18) Enn lot fois, li ti montré ki li ti tracassé ek li ti demandé kisannla pou sauvé kan Bondié pou amenn so jugement lor bann mauvais dimoune dan la ville Sodome ek Gomorrhe. (Genèse 18:23-33) Abraham ti aussi supplie Jéhovah pou lezot. (Genèse 20:7, 17) Ek pareil couma Abel, parfois kan Abraham ti approche ar Bondié, Li ti offert enn sacrifice.—Genèse 22:9-14.
6 Dan tou sa bann l’occasion-la, Abraham ti senti-li libre pou koz ar Jéhovah. Mais mem si li ti franc, li ti ena enn l’attitude humble concernant so position devant so Createur. Remarké couma li ti ena respé kan li ti dire Jéhovah, dan Genèse 18:27: “S’il te plait, mo’nn decidé par mo-mem pou koz ar Jéhovah alors ki mo’nn faire ar la poussiere ek ar la cendre.” C’est enn bon l’attitude ki nou kapav imité, pa vrai?
7. Dan le passé, ki kitsoz bann patriarche ti demann Jéhovah dan zot la-priere?
7 Dan le passé bann patriarche ti prié pou different kitsoz, ek Jéhovah ti ecoute zot la-priere. Jacob ti faire enn promesse dan so la-priere. Apré ki li ti demann Bondié so soutien, li ti faire sa promesse-la: “Tou seki to pou donne moi, mo pou donne toi enn dixieme ladan, sans faute.” (Genèse 28:20-22) Plitar, kan li ti pré pou joinde so frere, Jacob ti supplie Jéhovah pou protege li. Li ti dire: “Mo prié pou ki to sap moi dan la main mo frere, dan la main Ésaü, parski mo peur li.” (Genèse 32:9-12) Job, enn lot patriarche, ti prié Jéhovah pou so famille ek li ti faire bann sacrifice pou zot. Kan so trois camarade ti faire peché par zot parole, Job ti prié pou zot, ek “Jéhovah ti accepté figure Job.” (Job 1:5; 42:7-9) Sa bann recit-la faire nou koné ki kitsoz nou kapav demann Jéhovah dan nou la-priere. Nou trouvé aussi ki Jéhovah disposé pou accepté la priere bann dimoune ki approche ar Li dan enn bon fason.
Dapré l’alliance la Loi
8. Dapré la Loi, ki disposition ti ena pou prié pou le peuple?
8 Apré ki Jéhovah ti delivré nation Israël dan l’Égypte, Li ti faire enn l’alliance avek zot ek Li ti donne zot la Loi. Dan la Loi, Jéhovah ti etabli bann pretre pou permette le peuple approche ar Li. Ti choisir certain Lévite pou servi couma bann pretre pou le peuple. Kan ti bizin traite bann zaffaire ki ti touche le peuple en entier, enn representant—parfois enn lé-roi, ou-soit enn prophete—ti presente sa devant Jéhovah dan la priere. (1 Samuel 8:21, 22; 14:36-41; Jérémie 42:1-3) Par exemple, kan ti ena l’inauguration temple, le roi Salomon ti faire enn la-priere sincere ar Jéhovah. En retour, Jéhovah ti montré ki Li ti accepté la priere Salomon kan Li ti rempli temple avek So la-gloire ek Li ti dire: “Mo zoreille pou ecoute la priere ki faire dan sa place-la.”—2 Chroniques 6:12–7:3, 15.
9. Ki bann pretre ti bizin faire pou zot kapav approche ar Jéhovah dan enn bon fason dan temple?
9 Dan la Loi ki Jéhovah ti donne nation Israël, ti ena enn kitsoz ki bann Israélite ti bizin faire pou ki Li accepté zot la-priere dan temple. Ki kitsoz? Toulé-gramatin ek toulé-tantot, apart bann sacrifice zanimo, grand pretre ti bizin brule l’encens parfumé devant Jéhovah. Plitar, bann sous-pretre aussi ti faire sa, excepté jour Propitiation. Si bann pretre pa ti faire sa, Jéhovah pa ti pou accepté zot service.—Exode 30:7, 8; 2 Chroniques 13:11.
10, 11. Couma nou koné ki Jéhovah ti accepté la priere ki chaque dimoune ti faire personnellement?
10 Eski dan nation Israël, bann Israélite ti kapav approche ar Bondié zis par bann representant ki Li ti etabli? Non. La Bible montré ki Jéhovah ti accepté aussi la priere ki chaque dimoune ti faire personnellement. Dan la priere ki Salomon ti faire pendant l’inauguration temple, li ti supplie Jéhovah: “N’importe ki la-priere, n’importe ki faveur ki enn dimoune ou-soit ki tou lé-peuple Israël demandé, . . . kan vrai-mem li leve so la-main vers sa lakaz-la, alors s’il te plait, toi ki dan le ciel, ecoute so la-priere.” (2 Chroniques 6:29, 30) L’Evangile Luc raconté ki, kan Zekaria, papa Jean le Baptiste ti pé offert l’encens dan temple, enn la-foule adorateur Jéhovah ki pa ti pretre, ti pé “prié dehors.” Li parette ki le peuple ti habitué rassemblé en dehors temple pou prié Jéhovah pendant ki bann pretre ti brule l’encens devant Jéhovah lor l’autel en or.—Luc 1:8-10.
11 Sa vedir ki Jéhovah ti disposé pou ecoute la priere ki ti faire par bann ki ti represente le peuple en entier ek aussi la priere chaque dimoune ki ti approche ar Li personnellement, a condition ki zot ti approche ar Li dan enn bon fason. Zordi, nou nepli obligé suive la Loi mosaïk. Mais, nou kapav tire bann leson important lor la priere kan nou examine fason ki bann Israélite ti approche ar Bondié dan le passé.
Dan lepok bann chrétien
12. Ki disposition Jéhovah inn prend pou bann chrétien approche ar Li?
12 Zordi, nou pé vive dapré disposition ki’nn etabli par Jésus Christ. Nepli ena enn temple lor la terre kot bann pretre represente tou bann serviteur Bondié, ou-soit kot nou kapav tourné pou prié Bondié. Mais, Jéhovah inn prend enn disposition pou nou prié Li. Ki sa disposition-la? En l’an 29 nou lepok, kan Jésus Christ ti gagne l’esprit saint ek li ti vinn Grand Pretre, enn temple spirituel ti commence fonctionné.a Sa temple spirituel-la ti enn nouveau disposition ki Jéhovah ti prend pou ki nou adore Li lor base sacrifice Jésus Christ.—Hébreux 9:11, 12.
13. En rapport avek la priere, cite enn comparaison entre temple Jérusalem ek temple spirituel.
13 Beaucoup kitsoz ki ti en rapport avek temple Jérusalem, represente bann different disposition dan temple spirituel, sa concerne aussi bann kitsoz en rapport avek la priere. (Hébreux 9:1-10) Par exemple, l’encens ki ti offert lor l’autel toulé-gramatin ek toulé-tantot dan le Saint ki ti trouve dan temple Jérusalem, ki sa representé? Dapré livre Révélation, “l’encens represente la priere bann saint.” (Révélation 5:8; 8:3, 4) David ti inspiré pou ecrire: “Faire ki mo la-priere li preparé pareil couma l’encens devant toi.” (Psaume 141:2) Alors, dan lepok bann chrétien, sa parfum l’encens-la represente bann la-priere ek bann louange ki Jéhovah accepté.—1 Thessaloniciens 3:10.
14, 15. Ki nou kapav dire lor fason ki (a) bann chrétien oint approche ar Jéhovah, ek (b) bann membre “lezot brebis” approche ar Li?
14 Kisannla ki kapav prié Bondié dan sa temple spirituel-la? Dan temple ki ti ena Jérusalem, bann pretre ek bann Lévite ti ena privilege pou servi dan enn la-cour ki ti trouve endan, mais zis bann pretre ki ti kapav rente dan le Saint. Bann chrétien oint ki ena l’espoir pou al dan le ciel, zot dan enn condition spirituel special ki ti representé par la cour ki ti trouve endan ek par le Saint. Sa condition-la permette zot pou prié Bondié ek pou loué Li.
15 Ki nou kapav dire lor bann dimoune ki ena l’espoir pou vive lor la terre, bann membre “lezot brebis”? (Jean 10:16) Prophete Isaïe ti annoncé ki bann dimoune ki sorti dan beaucoup nation pou vinn adore Jéhovah “dan period final.” (Isaïe 2:2, 3) Li ti aussi ecrire ki bann “etranger” pou vinn servi Jéhovah. Pou montré ki Li disposé pou accepté zot la-priere, Bondié ti dire: “Mo pou . . . faire zot content dan mo lakaz kot faire la priere.” (Isaïe 56:6, 7) Révélation 7:9-15 donne nou plus detail ek li dire ki “la grande foule” ki sorti “dan tou nation” pou vinn ensam pou adore Bondié ek pou prié Li “la-nuit li-jour” dan la cour ki trouve en dehors So temple spirituel. Eski sa pa encourage nou pou koné ki tou bann serviteur Bondié zordi, zot libre pou approche ar Li ek zot kapav sur ki Li tann zot la-priere!
Ki la priere Bondié accepté?
16. Ki nou kapav aprann ar la priere ki bann premier chrétien ti faire?
16 Bann premier chrétien ti habitué faire la priere. Pou ki kitsoz eski zot ti prié? Bann ancien ti demann direction Jéhovah pou ki zot kapav choisir bann zom pou rempli bann responsabilité dan domaine l’organisation. (Actes 1:24, 25; 6:5, 6) Épaphras ti prié pou bann lezot serviteur Bondié. (Colossiens 4:12) Bann membre dan congregation Jérusalem ti prié pou l’apotre Pierre kan li ti dan prison. (Actes 12:5) Bann premier chrétien ti demann Bondié pou donne zot courage kan zot ti gagne l’opposition, zot ti prié: “Jéhovah, prend compte zot menace, ek permette ki to bann esclave contigne annonce to parole avek courage.” (Actes 4:23-30) Disciple Jacques ti encourage bann chrétien pou prié Bondié pou donne zot sagesse kan zot dan l’epreuve. (Jacques 1:5) Eski ou aussi ou demann sa bann kitsoz-la kan ou prié Jéhovah?
17. La priere ki qualité dimoune eski Jéhovah ecouté?
17 Bondié pa ecoute tou la-priere. Alors, couma eski nou kapav prié ek sur ki Li pou ecoute nou la-priere? Dan le passé, Bondié ti ecoute la priere bann dimoune fidel ki ti approche ar Li avek sincerité ek avek enn bon l’attitude. Zot ti montré ki zot ena la foi ek zot ti faire bann bon action. Nou kapav sur ki Jéhovah pou ecoute bann dimoune ki rempli mem condition kan zot prié Li.
18. Ki condition bann chrétien bizin rempli pou ki Bondié ecoute zot la-priere?
18 Ena enn lot condition ki nou bizin rempli pou ki Jéhovah ecoute nou la-priere. L’apotre Paul ti explik sa kan li ti dire: “Grace a li . . . nou kapav approche nou Papa par enn sel l’esprit.” Kisannla Paul ti pé kozé kan li ti dire “grace a li”? Li ti pé koz lor Jésus Christ. (Éphésiens 2:13, 18) Oui, c’est zis par Jésus ki nou kapav approche ar nou Papa.—Jean 14:6; 15:16; 16:23, 24.
19. (a) Kan eski Jéhovah ti detesté l’encens ki bann Israélite ti offert Li? (b) Ki nou bizin faire pou ki nou la-priere li pareil couma l’encens ki ena enn bon l’odeur devant Jéhovah?
19 Couma nou ti dire avant, l’encens ki bann Israélite ti offert, represente la priere bann serviteur fidel ki Bondié accepté. Mais parfois, Jéhovah ti detesté l’encens ki bann Israélite ti offert Li. C’est seki ti arrivé kan bann Israélite ti offert Li l’encens ek en mem temps zot ti prosterne devant bann zidole. (Ézékiel 8:10, 11) Li pareil zordi aussi. Jéhovah detesté la priere bann dimoune ki dire zot servi Jéhovah mais ki en mem temps ena enn conduite ki pa en accord avek so bann la-loi. (Proverbes 15:8) Alors, anou toujours reste pur dan tou bann domaine dan nou la-vie pou ki nou la-priere li pareil couma l’encens ki ena enn bon l’odeur devant Jéhovah. Jéhovah prend plaisir ar la priere bann ki suive so bann principe ki droite. (Jean 9:31) Pourtant, ena encore certain question ki nou bizin examiné. Couma nou bizin prié? Pou ki kitsoz eski nou kapav prié? Ek couma Bondié reponn nou la-priere? Nou pou examine sa bann question-la dan nou prochain lartik.
[Note]
a Guette La Tour de Garde, 15 mai 2001, en français, page 27.
Eski ou kapav expliké?
• Couma bann dimoune imparfait kapav approche ar Bondié dan enn fason ki Li accepté?
• Dan nou la-priere, couma eski nou kapav imite l’exemple bann patriarche?
• Ki nou aprann ar la priere ki bann premier chrétien ti faire?
• Kan eski nou la-priere couma l’encens ki ena enn bon l’odeur devant Bondié?
[Zimage, page 23]
Kifer Bondié ti accepté sacrifice Abel ek pa sacrifice Caïn?
[Zimage, page 24]
“Mo’nn faire ar la poussiere ek ar la cendre”
[Zimage, page 25]
“Mo pou donne toi enn dixieme ladan, sans faute”
[Zimage, page 26]
Eski ou la-priere pareil couma l’encens ki ena enn bon l’odeur devant Jéhovah?