Couma nou kapav resisté kont bann demon?
“Bann ange ki pa ti reste dan position ki zot ti ena au commencement, mais ki ti quitte sa place kot zot ti’nn crée pou resté-la, [Bondié] finn garde zot prisonnier pou touletan dan enn grand noirté, pou jugement so grand jour.”—Jude 6.
1, 2. Ki bann question nou kapav demann-nou concernant Satan le Diable ek bann demon?
“GARDE zot bon sens, reste lor zot garde.” C’est l’avertissement ki l’apotre Pierre ti donne bann chrétien. Li ti ajouté: “Zot adversaire, le Diable, pé circulé couma enn lion ki pé criyé ek ki pé rod kikenn pou devoré.” (1 Pierre 5:8) Concernant bann demon, l’apotre Paul dire: “Mo pa’lé ki zot vinn associé bann demon. Zot pa kapav boire coupe Jéhovah ek coupe bann demon; zot pa kapav participe lor ‘la table Jéhovah’ ek lor la table bann demon.”—1 Corinthiens 10:20, 21.
2 Mais Satan le Diable ek bann demon, ki zot été? Couma ek kan zot finn existé? Eski c’est Bondié ki finn crée zot? Ki quantité zot kapav influence bann dimoune? Si ena enn moyen pou protege-nou kont zot, ki sa moyen-la sa?
Couma Satan ek bann demon finn existé?
3. Couma enn ange Bondié ti vinn Satan le Diable?
3 Dan commencement l’histoire l’humanité, kan Bondié ti fek crée bann dimoune dan jardin Éden, enn ange Bondié ti vinn rebelle. Kifer? Parski li pa ti satisfait ar role ki li ti ena dan l’organisation Jéhovah dan le ciel. Kan Bondié ti crée Adam ek Ève, sa ange-la ti trouve sa couma enn l’occasion pou ki li, li gagne l’obeissance ek l’adoration ki Bondié ti bizin gagné. Kan li ti rebelle kont Bondié ek li ti pousse premier couple pou faire peché, sa ange-la ti faire li-mem vinn Satan le Diable. Avek le temps, lezot ange ti rebellé pareil couma li. Couma sa ti arrivé?—Genèse 3:1-6; Romains 5:12; Révélation 12:9.
4. Ki bann ange rebelle ti faire avant deluge?
4 La Bible raconté ki inpé lé-temps avant deluge, certain ange ti commence interessé ar bann femme lor la terre, dan enn fason ki pa normal. Zot ti ena bann mauvais desir ek, dapré la Bible, “bann garson vrai Bondié ti remark sa bann tifi-la ek ti trouvé ki zot bien joli; ek zot ti commence prend bann femme pou zot, setadir tou seki zot ti choisiré.” Sa relation kont nature-la ti produire enn race zom hybride ki ti appel Nephilim. (Genèse 6:2-4) Sa bann creature spirituel ki ti desobeir Bondié-la, ti al dan coté Satan ek zot ti rebelle kont Jéhovah.
5. Ki ti arrive bann rebelle kan Jéhovah ti envoye enn deluge pou faire enn destruction?
5 Kan Jéhovah ti amenn deluge lor la terre, bann Nephilim ek zot mama, ti detruire. Bann ange ki ti rebellé ti obligé quitte zot lekor ek retourne dan le ciel. Mais seulement, zot pa’nn kapav reprend “position ki zot ti ena au commencement,” kot Bondié. Au contraire, Bondié ti garde zot prisonnier “dan enn grand noirté [spirituel],” ki la Bible appel Tartare.—Jude 6; 2 Pierre 2:4.
6. Couma bann demon trompe bann dimoune?
6 Depuis ki bann mauvais ange finn perdi “position ki zot ti ena au commencement,” zot inn vinn bann demon, bann compagnon Satan, ek zot soutenir li pou faire bann mauvais kitsoz. Jamais zot inn regagne pouvoir pou prend lekor couma bann dimoune. Mais zot kapav tente bann zom ek bann femme pou faire tou sorte qualité kitsoz sexuel degoutant. Bann demon faire tou pou trompe aussi bann dimoune par spiritisme, couma par exemple, magik, vaudou ek sorcellerie. (Deutéronome 18:10-13; 2 Chroniques 33:6) Bann mauvais ange ek Satan pou konn mem sort—destruction eternel. (Matthieu 25:41; Révélation 20:10) Mais entre-temps, nou bizin tini ferme ek resisté kont zot. Alors, nou bien bizin koné ki quantité pouvoir Satan ena ek couma nou kapav reussi combatte li ek so bann demon.
Ki quantité pouvoir Satan ena?
7. Ki pouvoir Satan ena lor le monde?
7 Satan inn dire bann fausseté lor Jéhovah pendant toute longue l’histoire l’humanité, pou gate So reputation. (Proverbes 27:11) Li’nn influence beaucoup dimoune lor la terre. La Bible dire dan 1 Jean 5:19: “Le monde entier li dan pouvoir sa kikenn ki mauvais-la.” C’est a cause sa ki Satan ti kapav tente Jésus kan li ti offert li pouvoir ek la gloire “tou bann royaume ki lor la terre.” (Luc 4:5-7) Guette ki l’apotre Paul dire concernant Satan: “Alors, si vrai-mem ena enn voile lor la bonne nouvelle ki nou preché, ena sa voile-la pou bann dimoune ki pé mort, ek parmi zot, bondié sa system-la finn aveuglé l’esprit bann ki pa’lé croire, pou ki la lumiere la bonne nouvelle ki rempli ar la gloire concernant Christ, ki ressemblé Bondié, pa eclaire zot.” (2 Corinthiens 4:3, 4) Satan li “enn menteur ek li-mem ki ti commence koz menti en premier,” mais li faire li passe pou “enn ange la lumiere.” (Jean 8:44; 2 Corinthiens 11:14) Li ena pouvoir ek bann method ki bizin pou aveuglé l’esprit bann dirigeant sa lé-monde-la ek zot peuple. Li finn trompe bann dimoune avek bann propagande ek bann fausse croyance religieux.
8. Ki la Bible dire lor l’influence Satan?
8 Dan cinquieme siecle avant nou lepok, dan lepok prophete Daniel, nou trouve dan enn fason bien clair ki pouvoir ek l’influence Satan ena. Kan Jéhovah ti envoye enn ange pou donne Daniel enn message pou encourage-li, sa ange-la ti gagne l’opposition ar “prince royaume Perse,” [setadir enn l’esprit]. Sa ange fidel-la ti reste bloqué pendant 21 jour ziska ki “Mikaël, enn parmi bann pli grand prince” ti vinn aide li. Sa mem recit-la mentionne aussi enn lot demon, “prince la Grèce.” (Daniel 10:12, 13, 20) Ek Révélation 13:1, 2 decrire Satan couma enn “dragon” ki donne la bête sauvage setadir system politik, “so puissance ek so trone ek enn grand pouvoir.”
9. Kont kisannla bann chrétien pé lutté?
9 Li pa etonnant ki l’apotre Paul ti ecrire: “Nou bizin lutté, pa kont di-sang ek la chair, mais kont bann gouvernement, kont bann l’autorité, kont bann dirigeant le monde ki dan sa noirté-la, kont bann mauvais l’esprit ki trouve dan le ciel.” (Éphésiens 6:12) Zordi aussi, Satan le Diable pé dirige bann demon pou influence bann dirigeant ek bann dimoune en general, dan enn fason invisible. Zot pousse bannla pou faire bann kitsoz terrible, couma touye bann group dimoune, bann action terrorist, ek bann crime. Asterla, anou guetté couma nou kapav reussi resisté kont sa bann la-force spirituel bien puissant-la.
Ki moyen nou ena pou protege-nou?
10, 11. Couma nou kapav resisté kont Satan ek so bann mauvais ange?
10 Nou pa kapav lutte kont Satan ek so bann mauvais ange par nou prop la-force, ki li physik ou-soit moral. Paul donne nou sa conseil-la: “Contigne rod la puissance ar nou Seigneur ek ar puissance so la-force.” Nou bizin demann Bondié so protection. Paul ajouté: “Mette lor zot l’equipement complet ki Bondié donné, pou ki zot kapav tini ferme kont bann manigance Satan le Diable . . . Prend l’equipement complet ki Bondié donné, pou ki zot kapav resisté dan mauvais jour, ek apré ki zot inn faire tou kitsoz couma bizin, tini ferme.”—Éphésiens 6:10, 11, 13.
11 Deux fois, Paul encourage bann chrétien pou mette lor zot “l’equipement complet ki Bondié donné.” Mot “complet” montré ki, pou nou kapav resisté kont l’attak bann demon, fodé pa ki nou negligent dan certain domaine. Alors, ki été bann partie bien important dan l’equipement spirituel ki bann chrétien bizin, pou zot kapav resisté kont bann demon?
“Tini ferme”—Couma?
12. Couma bann chrétien kapav serre zot lé-rein avek la verité?
12 Paul donne sa l’explication-la: “Alors, tini ferme, avek la verité ki serre zot lé-rein, ek avek cuirasse la justice lor zot.” (Éphésiens 6:14) Deux piece dan sa l’equipement-la c’est enn ceinture ek enn cuirasse. Enn soldat ti bizin garde so ceinture bien serré pou ki sa protege so lé-rein (so la-hanche ek so bas-ventre) ek pou tini poids so l’epée. Li pareil aussi pou nou, nou bizin coumadir attache la verité ki ena dan la Bible bien serré autour nou, pou nou kapav vive en accord avek seki la Bible dire. Eski nou ena enn program pou lire la Bible toulé-jour? Eski tou bann membre nou famille participe ladan? Eski nou ena l’habitude faire texte du jour en famille? En plus, eski nou reste a-jour avek bann explication ki ena dan bann publication ki “l’esclave fidel et avisé” donne nou? (Matthieu 24:45) Si oui, sa vedir ki nou pé faire zeffort pou applik conseil Paul. Nou ena aussi bann cassette video ek bann DVD ki donne nou enn direction spirituel. Si nou reste bien attaché ar la verité, li pou pli facile pou prend bann bon decision ek sa pou empeche nou pou prend enn mauvais chemin.
13. Couma nou kapav protege nou leker symbolik?
13 Enn cuirasse ti protege poitrine, leker ek bann lezot l’organe bien important enn soldat. Enn chrétien kapav protege so leker symbolik, setadir seki li été endan, kan li developpe l’amour pou la justice Bondié ek kan li vive dapré So bann principe ki juste. Enn cuirasse symbolik protege nou kont tendance pou diminué valeur ki Parole Bondié ena. A mesure ki nou ena “la haine pou seki mauvais, ek content seki bon,” nou empeche nou lipié al lor enn “mauvais chemin.”—Amos 5:15; Psaume 119:101.
14. Ki sa vedir ena “l’equipement la bonne nouvelle lor la paix dan nou lipié”?
14 En general, bann soldat romain ti ena bann bon soulier dan zot lipié. Sa ti necessaire parski zot ti bizin marche beaucoup lor bann chemin ki bann romain ti faire ek ki ti traverse zot l’empire lor plusieurs centaine kilometre. Pou bann chrétien, ki vedir ena “l’equipement la bonne nouvelle lor la paix dan zot lipié”? (Éphésiens 6:15) Sa vedir ki nou pré pou faire kitsoz. Nou pré pou annonce la bonne nouvelle lor Royaume Bondié a chaque fois ki l’occasion presenté. (Romains 10:13-15) Kan nou actif dan nou ministere, sa protege-nou kont bann “manigance” Satan.—Éphésiens 6:11.
15. (a) Couma nou koné ki li bien important pou ena enn grand bouclier la foi? (b) Ki été sa bann “fleche enflammé” ki kapav ena enn mauvais l’effet lor nou la-foi-la?
15 Paul ti contigne dire: “Surtout, prend grand bouclier la foi, avek sa zot pou kapav teigne tou bann fleche enflammé ki sa kikenn ki mauvais-la envoyé.” (Éphésiens 6:16) Kan Paul ti conseil bann chrétien pou prend grand bouclier la foi, li ti commence so phrase par “surtout,” pou montré ki sa partie dan sa l’equipement-la li bien important. Fodé pa ki ena okenn point faible dan nou la-foi. Pareil couma enn grand bouclier ti protege enn soldat, nou la-foi protege-nou kont bann “fleche enflammé” ki Satan envoye lor nou. Ki sa bann fleche-la kapav representé zordi? Sa kapav bann insulte, bann demi-verité ou-soit bann fausseté ki faire beaucoup di-tort, ki nou bann l’ennemi ou-soit bann apostat dire lor nou pou essaye affaibli nou la-foi. Sa kapav aussi bann tentation pou vinn materialiste ek faire ki nou priorité c’est zis pou acheté encore pli beaucoup kitsoz. Lerla, sa kapav mem faire-nou rente en competition avek bann ki finn tombe dan tentation pou amenn enn la-vie luxe. Kitfois, zot finn acheté enn pli grand lakaz ek enn pli joli l’auto, ou-soit zot faire l’etalage ar zot bann bijou ki coute bien cher ek ar bann linge dernier la-mode. Mais, n’importe ki lezot faire, nou, nou bizin ena enn la-foi assez solid pou detourne sa bann ‘fleche enflammé-la.’ Couma eski nou kapav developpe ek garde enn la-foi solid?—1 Pierre 3:3-5; 1 Jean 2:15-17.
16. Ki kapav aide nou pou developpe enn la-foi solid?
16 Nou kapav vinn proche ar Bondié grace a l’etude personnel ki nou faire regulierement lor la Bible ek par bann la-priere sincere. Anou suppliye Jéhovah pou fortifié nou la-foi ek apré sa, anou agir en accord avek nou la-priere. Par exemple, eski nou prepare bien nou l’etude La Tour de Garde chaque semaine avek l’objectif pou participé? Nou la-foi pou solid si nou etudié la Bible ek bann publication ki basé lor la Bible.—Hébreux 10:38, 39; 11:6.
17. Couma nou kapav ‘accepté casque delivrance’?
17 Paul ti termine so description lor l’equipement spirituel par sa conseil-la: “Accepté aussi casque delivrance, ek l’epée l’esprit, setadir, parole Bondié.” (Éphésiens 6:17) Casque enn soldat ti protege so la-tête ek so cerveau, bann kitsoz ki permette li pou prend bann decision. Li pareil aussi ar nou l’esperance, sa protege nou capacité mental. (1 Thessaloniciens 5:8) Au lieu ki nou rempli nou l’esprit ar bann l’objectif ki le monde encouragé ek ar bann rêve materialiste, anou imite Jésus ek fixé nou pensé lor l’esperance ki Bondié inn donne nou.—Hébreux 12:2.
18. Kifer fodé pa ki nou neglige nou program pou lire la Bible regulierement?
18 Dernier protection ki nou ena kont l’influence Satan ek so bann demon c’est parole Bondié, setadir message ki ena dan la Bible. C’est enn lot raison kifer fodé pa nou neglige nou program pou lire la Bible regulierement. Enn bon connaissance lor Parole Bondié protege nou kont bann mensonge ki Satan fané, kont propagande bann demon ek aussi kont bann discours ek bann publication bann apostat ki rod faire nou di-tort.
“Contigne prié dan tou l’occasion”
19, 20. (a) Ki pé attann Satan ek so bann demon? (b) Couma nou kapav fortifié-nou lor plan spirituel?
19 Pa reste beaucoup lé-temps avant ki Bondié tire Satan, so bann demon ek sa mauvais lé-monde-la. Satan koné ki li ena “enn tigit lé-temps-mem.” Li bien en colere ek li faire la guerre ar bann “ki pé suive commandement Bondié ek ki ena sa travail-la: rann temoignage lor Jésus.” (Révélation 12:12, 17) Li bien important ki nou resisté kont Satan ek so bann demon.
20 Nou kapav reconnaissant pou conseil ki nou’nn gagné pou mette l’equipement complet ki Bondié donné, lor nou! Paul ti termine so discours lor l’equipement spirituel par sa conseil-la: “Avek tou sorte qualité la-priere ek supplication, . . . contigne prié dan tou l’occasion, guidé par l’esprit. Ek pou sa, contigne reste lor zot garde avek perseverance ek avek bann supplication pou tou bann saint.” (Éphésiens 6:18) La priere kapav fortifié nou lor plan spirituel ek aide nou pou reste lor nou garde. Anou prend serieux seki Paul ti dire, ek anou contigne prié, parski sa pou aide nou pou resisté kont Satan ek so bann demon.
Ki ou finn aprann?
• Couma Satan ek so bann demon finn existé?
• Ki quantité pouvoir Satan ena?
• Couma nou kapav protege-nou kont Satan ek so bann demon?
• Couma nou kapav mette lor nou l’equipement spirituel complet ki Bondié donné?
[Zimage, page 17]
‘Bann garson vrai Bondié ti remark bann tifi lor la terre’
[Zimage, page 19]
Eski ou kapav cite toulé-six partie ki ena dan nou l’equipement spirituel?
[Zimage, page 21]
Couma, kan nou participe dan sa bann activité-la, sa protege-nou kont Satan ek so bann demon?