Bann dimoune rod bann reponse pratik

Couma eski mo kapav garde enn bon la-santé?

Ki mo kapav faire pou ki mo famille vive pli heureux?

Couma mo kapav augmente mo bann chance pou garde enn travail?

ESKI ou’nn deja pose-ou enn parmi sa bann question-la? Eski ou finn trouve bann reponse pratik ki’nn vrai-mem donne bann bon resultat? Chaque l’année, ena apepré 2,000 different livre ki publié ek ki donne conseil lor sa bann sujet-la ek lezot sujet important encore. Zis en Grande-Bretagne, chaque l’année bann dimoune depense ziska cinq milliard roupie pou acheté bann livre ki expliké couma pou faire face ar bann problem ki nou gagné dan la vie. Dan l’États-Unis, dan enn l’année, bann dimoune depense apepré 20 milliard roupie pou acheté bann guide pratik lor tou qualité sujet. Ou kapav sur ki pa zis ou tousel ki pé rod bon conseil pou kapav faire face ar la vie toulé-jour.

Concernant bann conseil ki gagné dan tou sa quantité livre-la, enn ecrivain dire: “Beaucoup nouveau livre zis repete seki finn deja ecrire.” Avredir, beaucoup parmi sa bann conseil ki gagné dan sa bann livre-la, zot zis reflete la sagesse ki ena dan enn parmi bann pli vié livre dan le monde. Sa-mem livre ki pli distribué ki n’importe ki lot livre dan le monde entier. Sa livre-la inn traduire en entier ou en partie dan apepré 2,400 langue. Dan le monde entier finn imprime en tou plus ki 4.6 milliard copie. Sa livre-la, c’est la Bible li-mem.

La Bible dire bien clair: “Tou l’Ecriture finn inspiré par Bondié, ek li utile pou enseigné, pou corrigé, pou mette bann kitsoz en ordre, pou discipliné dan la justice.” (2 Timothée 3:16) Li vrai ki pa’nn ecrire la Bible pou li zis enn guide pratik. So premier but c’est pou faire konn volonté Bondié pou tou bann dimoune. Mais mem-sa, li explik bien couma nou kapav faire face ar bann problem ki nou tou gagné zordi. La Bible promette ki bann ki suive so conseil pou aprann pou zot prop profit. (Isaïe 48:17, 18) N’importe ki nou race, nou culture ou-soit nou niveau l’education, kan nou applik bann conseil pratik ki ena dan la Bible, sa touletan marché.