Nou l’obeissance ena valeur pou Jéhovah
“Montré ki to sage mo garson, ek faire mo leker content.”—PROVERBES 27:11.
1. Ki qualité l’esprit nou trouvé partout dan la societé zordi?
ZORDI partout dan le monde ena enn l’esprit independance ek desobeissance. L’apotre Paul ti expliké kifer, kan li ti ecrire bann chrétien Éphèse: “Enn lepok, zot ti pé marche dapré sa lé-monde-la, dapré sa kikenn ki chef lor pouvoir ki l’air ena, sa l’esprit ki pé agir asterla dan bann garson desobeissance.” (Éphésiens 2:1, 2) Oui, nou kapav dire ki Satan le Diable, “sa kikenn ki chef lor pouvoir ki l’air ena,” finn contamine le monde entier avek enn l’esprit desobeissance. C’est seki li ti pé faire dan premier siecle, ek li pé contigne faire sa encore plus depuis ki finn tire li dan le ciel, dan lepok Premier Guerre mondial.—Révélation 12:9.
2, 3. Cite bann raison ki nou ena pou obeir Jéhovah.
2 Mais en tant ki chrétien, nou koné ki Jéhovah merité ki nou obeir Li avek tou nou leker. Kifer? Parski Li nou Createur, Li-mem ki donne nou seki nou bizin pou nou contigne vive, Li enn Grand lé-Roi ki content nou ek Li nou Sauveur. (Psaume 148:5, 6; Actes 4:24; Colossiens 1:13; Révélation 4:11) Bann Israélite dan lepok Moïse ti koné ki Jéhovah ti donne zot la vie ek ti delivré zot. A cause sa Moïse ti dire zot: “Zot bizin faire attention ki zot faire exactement couma Jéhovah zot Bondié inn donne zot l’ordre pou faire.” (Deutéronome 5:32) Oui, Jéhovah ti merite zot l’obeissance. Pourtant, bien vite zot ti desobeir zot Bondié.
3 Ki quantité nou l’obeissance li important pou Createur l’univers? Enn fois, Bondié ti demann prophete Samuel pou dire le roi Saül: “Obeir ena plus valeur ki enn sacrifice.” (1 Samuel 15:22, 23) Kifer?
Couma l’obeissance “ena plus valeur ki enn sacrifice”
4. Dan ki sens eski nou kapav donne Jéhovah kitsoz?
4 Parski Jéhovah Li-mem Createur, tou seki nou ena lor plan materiel, pou Li. Alors, eski ena kitsoz ki nou kapav donne Li? Oui, nou kapav donne Li enn kitsoz ki ena beaucoup valeur. Ki kitsoz? Nou gagne reponse dan sa conseil-la: “Montré ki to sage mo garson, ek faire mo leker content, pou ki mo kapav reponn celui ki pé provok moi.” (Proverbes 27:11) Nou kapav donne Bondié nou l’obeissance. Nou tou, nou situation ek l’environnement kot nou’nn grandi, pa pareil. Mais kan nou obeir, sakenn parmi nou kapav reponn sa vilain l’accusation ki Satan le Diable ti faire-la: ki bann dimoune pa pou reste fidel envers Bondié kan zot pou gagne bann l’epreuve. Alors, nou ena vrai-mem enn grand privilege, pa vrai?
5. Couma nou Createur affecté kan bann dimoune desobeir Li? Donne enn l’exemple.
5 Bondié interessé ar bann decision ki nou prend. Si nou desobeir, sa affecté Li. Couma? Li chagrin pou trouve n’importe kisannla prend enn mauvais decision coumsa. (Psaume 78:40, 41) Supposé ki enn dimoune ki ena diabete pa suive bien enn bon regime ki so docteur ti’nn conseil li, ek li contigne mange seki pa bon pou li. Ki so docteur, ki prend li compte, pou ressenti? Nou kapav sur ki Jéhovah chagrin kan bann dimoune desobeir Li, parski Li koné ki consequence zot pou gagné kan zot pa prend compte bann principe ki Li’nn donné pou guide zot dan zot la-vie.
6. Ki pou aide nou pou obeir Bondié?
6 Ki pou aide sakenn parmi nou pou obeir? Li bon ki personnellement, nou demann Bondié “enn leker obeissant,” pareil couma le roi Salomon ti demandé. Li ti demann enn leker obeissant pou ki li kapav “discerne entre seki bon ek seki mauvais” pou li juge bann lezot Israélite. (1 Rois 3:9) Nou bizin ena “enn leker obeissant” pou nou kapav discerné entre seki bon ek seki mauvais dan enn lé-monde ki rempli ar enn l’esprit desobeissance. Bondié inn donne nou so Parole, la Bible, bann publication ki basé lor la Bible, bann reunion, ek bann ancien ki prend nou compte, pou ki nou kapav developpe “enn leker obeissant.” Eski nou pé bien profite sa bann bon disposition-la?
7. Kifer pou Jéhovah l’obeissance ena plus valeur ki bann sacrifice?
7 En rapport avek sa, rappel ki dan le passé, Jéhovah ti faire so peuple koné ki l’obeissance ti beaucoup pli important ki bann sacrifice zanimo. (Proverbes 21:3, 27; Hoshéa 6:6; Matthieu 12:7) Kifer, eski c’est pa Li-mem ki ti donne l’ordre so peuple pou faire sa bann sacrifice-la? En realité, ki ti pousse enn dimoune pou faire enn sacrifice? Eski li ti faire sa pou faire Bondié plaisir? Ou-soit eski li ti pé faire sa zis pou suive certain tradition? Si enn adorateur Jéhovah vrai-mem envie faire Li plaisir, li pou faire bien attention pou obeir tou bann commandement Bondié. Bondié pa bizin bann sacrifice zanimo, mais parkont, nou l’obeissance, c’est enn kitsoz ki ena valeur ek ki nou kapav donne Li.
Enn l’exemple ki averti nou
8. Kifer Bondié ti rejette Saül couma le roi?
8 Seki la Bible dire lor le roi Saül, montré ki quantité l’obeissance li important. Kan Saül ti commence regné, li ti ena l’humilité ek li ti konn so limite. Li ti considere li couma enn kikenn ki “pena l’importance.” Mais avek le temps, li ti laisse l’orgueil ek bann fausse raisonnement commence guide so bann decision. (1 Samuel 10:21, 22; 15:17) Enn fois, Saül ti bizin al laguerre kont bann Philistin. Samuel ti dire li attann li vini pou offert bann sacrifice pou Jéhovah ek pou donne li plus l’instruction. Selman, Samuel pa ti vinn a temps couma li ti dire, ek le peuple ti pé commence allé. Kan Saül ti trouve sa, li ‘ti offert sacrifice-la’ li-mem. Sa pa ti faire Jéhovah plaisir. Kan finalement Samuel ti vini, le roi ti tire pretexte pou so desobeissance. Li ti dire ki parski Samuel ti en retard, li ‘ti force li-mem’ pou offert sa sacrifice-la pou gagne faveur Jéhovah. Pou le roi Saül, offert sa sacrifice-la ti pli important ki obeir l’ordre ki li ti gagné pou attann Samuel vinn offert sa sacrifice-la. Samuel ti dire li: “To finn agir dan enn fason bien bet. To pa finn garde commandement Jéhovah to Bondié, commandement ki Li ti donne toi.” Parski Saül ti desobeir Jéhovah, li ti perdi so place le roi. —1 Samuel 10:8; 13:5-13.
9. Couma Saül ti montré ki li ena l’habitude desobeir Bondié?
9 Eski le roi Saül ti tire enn leson ar sa l’evenement-la? Non! Plitar, Jéhovah ti donne li l’ordre pou detruire net bann Amaléqite, parski dan le passé zot ti attak bann Israélite sans okenn raison. Saül pa ti mem bizin laisse zot bann zanimo vive. Li ti obeir l’ordre ki Jéhovah ti donne li kan li ti “touye bann Amaléqite depuis Havila ziska Shour.” Mais li ti pa ti obeir Jéhovah net. Kan Samuel ti vinn joinde li, le roi ti extra content ki li’nn gagne la victoire ek li ti dire: “Ki Jéhovah beni toi. Mo’nn faire seki Jéhovah inn dire.” Pourtant, malgré bann instruction bien clair ki zot ti gagné, Saül ek le peuple pa ti touye Agag, ek aussi “bann pli bon zanimo dan troupeau ti zanimo, gros zanimo ek bann zanimo bien gras, ek . . . bann mouton male ek . . . tou seki ti bon.” Le roi Saül ti trouve bann pretexte pou so desobeissance, li ti dire: “Le peuple finn ena pitié pou pli bon zanimo dan troupeau ti zanimo ek gros zanimo, pou zot kapav faire bann sacrifice pou Jéhovah to Bondié.”—1 Samuel 15:1-15.
10. Ki leson Saül pa ti reussi aprann?
10 Lerla, Samuel ti dire Saül: “Eski Jéhovah content bann offrande kot brule zanimo net ek bann sacrifice autant ki Li content kan nou obeir seki Li dire? Ecoute sa! Obeir ena plus valeur ki enn sacrifice, ecouté ena plus valeur ki la graisse bann mouton.” (1 Samuel 15:22) Jéhovah ti fini decidé ki ti bizin touye sa bann zanimo-la, alors Li pa ti kapav accepté zot couma bann sacrifice.
Obeir dan tou kitsoz
11, 12. (a) Couma Jéhovah considere bann zeffort ki nou faire pou adore Li dan enn fason ki faire Li plaisir? (b) Couma enn dimoune kapav trompe li-mem si li pensé ki li pé faire volonté Bondié alors ki en realité, li pé desobeir Li?
11 Jéhovah surement vrai-mem content kan Li trouve so bann serviteur fidel reste ferme malgré persecution. Zot contigne preche so Royaume malgré ki bann dimoune indifferent, ek zot assisté reunion mem si zot bizin faire face ar bann pression ki ena dan le monde pou zot gagne zot la-vie. Kan nou obeir dan bann domaine important coumsa pou adore Jéhovah, sa faire so leker content! Bann zeffort ki nou faire pou servi Jéhovah ena valeur pou Li, surtout kan nou faire sa avek amour. Kitfois bann dimoune pa trouve bann zeffort ki nou faire pou servi Jéhovah, mais Li, Li remark seki nou pé donne Li avek tou nou leker, ek Li rappel sa.—Matthieu 6:4.
12 Mais, pou nou faire Bondié plaisir dan enn fason complet, nou bizin obeir Li dan tou domaine nou la-vie. Fodé jamais nou embete nou-mem kan nou pensé ki nou kapav faire seki nou envie ar bann principe Bondié parski nou pé servi Li dan bann lezot domaine dan nou la-vie. Si nou faire sa, nou pé trompe nou-mem. Par exemple, li pou enn grand erreur si enn dimoune pensé ki tant ki li pé faire certain activité spirituel regulierement, li kapav commette l’immoralité ou-soit faire lezot peché grave.—Galates 6:7, 8.
13. Couma nou l’obeissance pou Jéhovah kapav testé kan nou kot nou?
13 Alors, nou kapav demann nou-mem: ‘Eski mo obeir Jéhovah dan seki mo faire toulé-jour, mem dan bann domaine ki nou pensé personnel?’ Jésus ti dire: “Enn dimoune ki fidel dan enn ti kitsoz, li fidel aussi dan enn grand kitsoz, ek enn dimoune ki pa droite dan enn ti kitsoz, li pa droite aussi dan enn grand kitsoz.” (Luc 16:10) Eski nou pé ‘marche avek enn leker rempli ar fidelité’ mem kan nou ‘dan nou lakaz,’ kot lezot pa trouve nou? (Psaume 101:2) Oui, nou fidelité kapav testé mem kan nou dan nou lakaz. Dan beaucoup pays kot li normal pou ena enn computer dan enn lakaz, enn dimoune ena zis pou click dé-trois coute lor so ‘mouse’ pou li guette bann zimage immoral. Ena dé-trois l’année, enn dimoune pa ti pou kapav guette sa bann zimage-la sans ki li ti al dan bann place kot ena bann divertissement immoral. Eski nou pou vrai-mem prend compte seki Jésus ti dire: “Enn dimoune ki contigne guette enn femme ziska ki sa faire li gagne enn desir pou li, finn fini commette l’adultere avek li dan so leker”? Oui, eski nou pou refuse pou guette bann zimage immoral? (Matthieu 5:28; Job 31:1, 9, 10; Psaume 119:37; Proverbes 6:24, 25; Éphésiens 5:3-5) Ki nou kapav dire lor bann program television ki violent? Eski nou aussi, pareil couma nou Bondié, nou “ena vrai-mem la haine pou enn kikenn ki content la violence”? (Psaume 11:5) Concernant la boisson fort, eski nou boire ziska nou sou kan nou kot nou? La Bible condamne enn dimoune ki boire ziska sou, mais li averti aussi bann chrétien pou pa prend l’habitude boire “beaucoup di-vin.”—Tite 2:3; Luc 21:34, 35; 1 Timothée 3:3, note.
14. Cite certain fason couma nou kapav montré nou l’obeissance envers Bondié kan sa concerne l’argent?
14 Ena enn lot domaine kot nou bizin faire attention, c’est concernant l’argent. Par exemple, eski nou pou implik-nou dan bann projet ki pou faire nou vinn riche vite mais ki pou faire nou preské fraudé? Eski nou tenté pou faire bann kitsoz illegal pou nou pa paye taxe? Ou-soit, au contraire eski nou obeir bien l’ordre pou “donne tou dimoune seki bizin donne zot, seki demann taxe, [nou] donne li taxe”?—Romains 13:7.
Nou obeir parski nou ena l’amour
15. Kifer ou obeir bann commandement Jéhovah?
15 Kan nou obeir bann principe Bondié, nou gagne bann benediction. Par exemple, kan nou pa fumé, kan nou ena enn bon la-vie lor plan moral, kan nou respecté caractere sacré di-sang, nou kapav evité gagne certain maladie. En plus, kan nou vive en accord avek bann principe biblik dan lezot domaine dan nou la-vie, nou pou kapav gagne bann bienfait lor plan economik, nou pou kapav ena bann pli bon relation avek nou prochain ek avek bann membre nou famille. (Isaïe 48:17) Nou kapav considere tou bann bienfait coumsa couma bann benediction ki prouvé ki li vaut la peine pou applik bann la-loi Bondié. Mais selman, raison principal kifer nou obeir Jéhovah c’est parski nou content Li. Nou pa servi Bondié pou bann raison egoïste. (Job 1:9-11; 2:4, 5) Bondié inn donne nou liberté pou choisir n’importe kisannla nou envie obeir. Nou choisir pou obeir Jéhovah parski nou envie faire Li plaisir ek parski nou envie faire seki droite. —Romains 6:16, 17; 1 Jean 5:3.
16, 17. (a) Couma Jésus ti montré ki li ti obeir Bondié parski li ena enn grand l’amour pou Li? (b) Couma nou kapav imite Jésus?
16 Jésus inn donne nou enn l’exemple parfait kan li’nn obeir Jéhovah parski li ena enn grand l’amour pou Li. (Jean 8:28, 29) Kan li ti lor la terre, Jésus ti “aprann l’obeissance par bann kitsoz ki li ti enduré.” (Hébreux 5:8, 9) Couma? Jésus “ti abaisse li-mem, ek li ti obeir ziska la mort, oui, la mort lor enn poteau souffrance.” (Philippiens 2:7, 8) Mem si Jésus ti deja montré so l’obeissance dan le ciel, so l’obeissance ti testé encore enn fois lor la terre. Nou kapav sur ki Jésus li bien qualifié dan tou domaine pou servi couma Grand Pretre pou so bann frere spirituel ek aussi pou lezot dimoune ki ena la foi en li.—Hébreux 4:15; 1 Jean 2:1, 2.
17 Ki nou kapav dire lor nou? Nou kapav imite Jésus kan nou faire l’obeissance pou Bondié vinn enn priorité dan nou la-vie. (1 Pierre 2:21) Personnellement, nou kapav gagne enn grand satisfaction kan nou l’amour pou Bondié pousse nou pou faire seki Jéhovah demandé, mem si parfois ena bann pression ek bann tentation ki pousse nou pou agir dan enn lot fason. (Romains 7:18-20) Par exemple, nou bizin disposé pou obeir bann dimoune ki prend la tête dan service Jéhovah, mem si zot imparfait. (Hébreux 13:17) Kan nou obeir bann commandement Jéhovah dan nou la-vie privé, sa ena valeur pou Jéhovah.
18, 19. Ki resultat nou gagné kan nou obeir Bondié avek tou nou leker?
18 Zordi, obeir Jéhovah kitfois vedir ki nou bizin endure bann persecution pou nou kapav garde nou fidelité. (Actes 5:29) Pou nou obeir l’ordre ki Jéhovah inn donné pou preché ek pou enseigné, nou bizin aussi enduré ziska la fin sa system-la. (Matthieu 24:13, 14; 28:19, 20) Nou bizin enduré pou nou kapav contigne rassemblé avek nou bann frere, mem si le monde pé mette bann pression lor nou. Dan sa bann domaine-la, nou Bondié bien conscient bann zeffort ki nou faire pou obeir Li. Mais pou nou obeir Li dan enn fason complet, nou bizin lutte kont nou l’imperfection ek detourne-nou ar seki mauvais, ek en mem temps developpe l’amour pou seki bon.—Romains 12:9.
19 Kan nou servi Jéhovah parski nou content Li ek parski nou ena enn leker reconnaissant, “Li vinn [pou nou] celui ki recompense bann ki rod Li vrai-mem.” (Hébreux 11:6) Li vrai ki bann sacrifice zot necessaire ek zot faire Jéhovah plaisir, mais seki faire Jéhovah plus plaisir c’est kan nou obeir Li dan tou kitsoz parski nou content Li.—Proverbes 3:1, 2.
Couma ou pou reponn?
• Kifer nou kapav dire ki nou ena kitsoz pou donne Jéhovah?
• Ki bann erreur Saül ti faire?
• Couma ou kapav montré ki ou croire ki l’obeissance ena plus valeur ki bann sacrifice?
• Ki pousse ou pou obeir Jéhovah?
[Zimage, page 24]
Eski ou pé obeir bann commandement Bondié kan ou kot ou?