L’amour enn mama faire nou trouve l’amour Bondié

“Eski enn femme kapav blié so tibaba ki encore pé boire avek li, ek pena pitié pou garson ki sorti dan so ventre? Sa bann femme-la kapav blié, mais moi mo pa pou blié toi.”—ISAÏE 49:15.

ENN tibaba ki fek né dan le bras so mama ki pé donne li boire. Sa c’est enn scene kot ena tendresse ek l’amour. Enn mama ki appel Pam dire: “Kan mo ti prend mo tibaba pou premier fois dan mo le bras, mo ti ressenti l’amour ek enn sens responsabilité pou sa tibaba ki fek né-la.”

Mem si sa enn kitsoz ki nou tou koné, bann recherche inn confirmé ki l’amour enn mama ena enn grand l’influence lor developpement so tibaba. Dan so programme pou la santé mental, l’Organisation mondial pou la santé inn publié enn rapport ki dire: “Bann l’etude inn montré ki bann tibaba ki abandonné ek separé ar zot mama vinn malheureux ek gagne depression, parfois zot gagne bann crise panik.” Sa mem document-la cite enn l’etude ki montré ki bann zenfant ki gagne l’amour ek l’affection depuis ki zot bien tipti, ena plus chance pou vinn bann zenfant pli intelligent ki bann zenfant ki pa finn gagne l’amour ek l’affection.

Concernant l’importance ki l’amour enn mama ena, Alan Schore, enn professeur psychiatrie dan lekol medecine l’université Los Angeles, en Amérique, dire: “Bann premier relation ki enn zenfant ena, [setadir] relation ki li ena avek so mama, servi li couma enn modele; sa forme so bann capacité pou n’importe ki relation affectif ki li pou ena plitar dan tou so la vie.”

Malheureusement, depression, maladie ou-soit lezot pression ki ena dan la vie, kapav amenn enn mama pou neglige so zenfant ou-soit mem “blié so tibaba ki encore pé boire avek li.” (Isaïe 49:15) Mais sa arrivé dan bann cas exceptionnel. En realité, c’est coumadir bann mama inn programmé pou content zot zenfant. Bann ki faire recherche inn decouvert ki pendant ki bann mama pé accouché, zot lekor produire enn hormone ki appel ocytocine en pli grand quantité. Sa hormone-la faire zot l’uterus contracté ek plitar li aide zot pou produire di-lait pou zot tibaba. Lekor bann missié ek bann madame toulé-deux produire sa hormone-la, ek bann scientifik pensé ki sa joué enn role dan desir pou agir avek l’amour ek pou pense bien-etre zot zenfant avant tou.

Kot-sa l’amour sorti?

Bann ki envie faire bann dimoune croire dan l’evolution enseigné ki l’amour ki pa egoïste, couma sa l’amour ki ena entre enn mama ek so zenfant-la, inn arrivé par hasard ek ki a mesure ki bann dimoune inn evolué, zot inn garde sa l’amour-la parski sa dan zot l’avantage. Par exemple, Mothering Magazine, enn journal lor Internet dire: “Premier partie nou cerveau ki’nn evolué a partir seki nou finn herité ar bann reptile, c’est so systeme limbique, systeme ki produire bann l’emotion. C’est sa partie cerveau-la ki permette enn mama ek so tibaba pou developpe sa relation bien proche-la.”

Li vrai ki bann recherche inn montré ki systeme limbique joué enn role dan nou bann l’emotion. Mais eski li raisonnable pou pensé ki enn mama kapav content so zenfant, zis parski cerveau ki bann humain finn herité ar bann reptile inn developpé par accident?

Anou guette enn lot possibilité. La Bible dire ki Bondié inn crée bann dimoune dan so ressemblance, setadir avek capacité pou reflete so bann qualité. (Genèse 1:27) Qualité principal ki Bondié ena, c’est l’amour. L’apotre Jean ti ecrire: “Kikenn ki pena l’amour pa finn arrivé konn Bondié.” Kifer? “Parski Bondié Li l’amour.” (1 Jean 4:8) Remarké ki sa verset la Bible-la pa dire ki Bondié ena l’amour mais ki Bondié Li l’amour. Li la Source l’amour.

Pou decrire l’amour, la Bible dire: “L’amour ena patience ek li bon. L’amour li pa jaloux, li pa faire vantard, li pa gonflé ar l’orgueil, li pena enn conduite indecent, li pa rod zis so prop l’interet, li pa offense vite. Li pa garde enn compte pou tou di-tort ki’nn faire li. Li pa trouve la joie dan l’injustice, mais li trouve la joie avek la verité. Li supporte tou, croire tou, espere tou, endure tou. L’amour pa pou disparette jamais.” (1 Corinthiens 13:4-8) Eski li raisonnable pou croire ki l’amour, sa qualité ki ena pli grand valeur-la inn zis arrivé par hasard?

Ki l’effet sa ena lor ou?

Kan ou ti pé lire sa description l’amour ki ena dan paragraphe avant-la, eski dan ou leker ou pa ti senti enn grand desir pou ki enn dimoune montré sa qualité l’amour-la envers ou? C’est enn desir ki naturel. Kifer? Parski “nou bann zenfant Bondié.” (Actes 17:29) Bondié inn faire nou pou nou recevoir ek pou nou exprime sa qualité l’amour-la. Ek nou kapav sur ki Bondié ena enn l’amour profond pou nou. (Jean 3:16; 1 Pierre 5:6, 7) Verset ki cité dan commencement sa lartik-la dire ki l’amour ki Bondié ena pou nou, li mem pli fort ek li dure pli longtemps ki l’amour ki enn mama ena pou so zenfant!

Mais ou kapav demann-ou: ‘Si Bondié ena sagesse, puissance ek l’amour, kifer Li pa tire la souffrance? Kifer Li laisse bann zenfant mort, Li laisse bann dimoune contigne faire dominere, ek Li laisse zot—a cause zot mauvais fason dirigé ek zot desir pou gagne plus—endommage la terre?’ Sa c’est bann bon question ki merite bann reponse raisonnable.

Malgré seki bann agnostique kapav dire, li possible pou gagne bann reponse pou sa bann question-la. Bann million dimoune dan bann centaine pays inn trouve sa bann reponse-la kan zot inn etudié la Bible avek bann Témoins de Jéhovah. Bann editeur sa periodik-la invite ou pou faire pareil. A mesure ki ou connaissance lor Bondié augmenté a travers enn l’etude so parole ek so creation toulé-deux, ou pou comprend ki Bondié pa loin ar nou ek ki li pa impossible pou konn Li. Au contraire, ou pou gagne conviction ki Bondié “pa loin ar sakenn parmi nou.”—Actes 17:27.

[L’encadré lor page 8]

L’amour ki Bondié ena pou nou, li dure pli longtemps ki l’amour ki enn mama ena pou so zenfant