Nou delivrance grace a Royaume Bondié bien pré!
“Ki to royaume vini. Ki to volonté faire lor la terre pareil couma dan le ciel.”—MAT. 6:10.
1. Lor ki kitsoz surtout l’enseignement Jésus ti basé?
KAN Jésus Christ ti faire so Sermon lor montagne, li ti donne enn modele la priere ek ladan li ti faire enn resumé lor bann pensée principal ki li ti enseigné. Li ti montré so bann disciple pou demann dan zot la-priere: “Ki to royaume vini. Ki to volonté faire lor la terre pareil couma dan le ciel.” (Mat. 6:9-13) Jésus “ti al dan enn la-ville apré lot ek dan enn village apré lot pou preche ek annonce la bonne nouvelle lor royaume Bondié.” (Luc 8:1) Li ti donne sa conseil-la so bann disciple: ‘Avant tou kitsoz, contigne rod le royaume ek la justice Bondié.’ (Mat. 6:33) A mesure ki ou etudié sa lartik-la, reflechi couma ou kapav servi bann pensée ki ena ladan dan ou ministere. Par exemple, guetté couma ou kapav reponn sa bann question-la: Ki quantité message lor Royaume Bondié li important? Ar ki kitsoz l’humanité bizin delivré? Ek couma Royaume Bondié pou faire sa delivrance-la?
2. Ki l’importance message lor Royaume Bondié ena?
2 Jésus ti annoncé: “Sa bon nouvelle lor royaume-la pou preché partout kot dimoune resté lor la terre couma enn temoignage pou tou bann nation; ek lerla la fin pou vini.” (Mat. 24:14) La bonne nouvelle lor Royaume Bondié ena enn grand l’importance. En realité, c’est message pli important ki ena dan le monde! A travers le monde, ena environ sept million Témoins de Jéhovah dan plus ki 100,000 congregation ki pé participe dan enn travail predication ki jamais pa finn ena avant. Zot pé annonce zot prochain ki Royaume Bondié inn fini etabli. C’est enn bonne nouvelle parski sa vedir ki Bondié inn etabli enn gouvernement dan le ciel pou prend control tou seki pé passé lor la terre. Enba direction Royaume Bondié, volonté Jéhovah pou faire lor la terre pareil couma dan le ciel.
3, 4. Ki pou arrivé kan volonté Bondié pou faire lor la terre?
3 Ki pou arrive bann dimoune kan volonté Bondié pou faire lor la terre? Jéhovah pou “souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur.” (Rév. 21:4) Personne pa pou malade ou-soit mort a cause peché ek l’imperfection ki nou’nn herité. Bann dimoune ki’nn mort ek ki dan memoire Bondié pou gagne possibilité pou vive pou touletan, parski la Bible faire sa promesse-la: “Pou ena enn resurrection bann dimoune ki juste ek bann dimoune ki pa juste, toulé-deux.” (Actes 24:15) Pa pou ena la guerre, maladie, tou dimoune pou ena mangé, ek la terre pou transformé, pou vinn enn paradi. Mem bann zanimo ki dangereux asterla pou vive en paix avek bann dimoune ek entre zot-mem.—Ps. 46:9; 72:16; Is. 11:6-9; 33:24; Luc 23:43.
4 Kan nou pense sa bann benediction extraordinaire ki Royaume Bondié pou amené-la, nou pa etonné ki enn prophetie biblik koz lor la vie ki pou ena dan Paradi, dan enn fason bien encourageant: “Bann ki ena l’humilité pou herite la terre, ek vrai-mem zot pou trouve enn grand la-joie dan l’abondance la paix.” Mais ki pou arrive bann dimoune ki responsable bann probleme lor la terre? La Bible annoncé: “Enn tigit lé-temps encore, ek mauvais dimoune nepli pou existé.” Selman, “bann ki mette zot l’espoir en Jéhovah pou herite la terre.”—Ps. 37:9-11.
5. Ki pou arrive sa lé-monde zordi-la?
5 Pou ki tousala realisé, sa lé-monde zordi-la avek so bann gouvernement, so bann religion ek so bann systeme commercial ki crée division pou bizin disparette. Ek c’est sa-mem ki gouvernement Bondié pou faire. Prophete Daniel ki ti inspiré par Bondié, ti annoncé: “Dan lepok sa bann lé-roi-la (ki existé zordi), Bondié ki dan le ciel pou etabli enn royaume (dan le ciel) ki jamais pa pou detruire. Ek sa royaume-la pa pou vinn pou enn lot peuple. Li pou crase tou bann lezot royaume (ki ena zordi) ek li pou fini zot, ek li pou regné pou touletan.” (Dan. 2:44) Lerla, Royaume Bondié—enn nouveau gouvernement dan le ciel—pou dirige enn nouveau societé lor la terre. Pou ena “enn nouveau lé-ciel ek enn nouveau la-terre, kot pou ena la justice.”—2 Pierre 3:13.
Zordi plus ki avant nou bizin enn delivrance
6. Couma la Bible decrire le mal ki ena dan sa mauvais lé-monde-la?
6 Kan Satan, Adam ek Ève ti rebelle kont Bondié parski zot ti envie decidé par zot-mem seki bon ek seki mauvais, sa ti commencement bann malheur pou l’humanité. Plus ki 1,600 an plitar, avant deluge, “bann dimoune ti’nn vinn bien mauvais lor la terre ek tou tendance ki ti ena dan zot leker ti touletan mauvais.” (Gen. 6:5) Apepré 1,300 an apré sa, Salomon ti trouve bann condition lor la terre tellement mauvais ki li ti ecrire: “Mo’nn felicite bann dimoune mort ki’nn deja mort plutot ki bann vivant ki ti encore pé vive. Mais pli dan bien ki toulé-deux c’est sa kikenn ki pankor né-la, ki pa’nn trouve bann mauvais action ki pé faire lor sa la terre-la.” (Eccl. 4:2, 3) Depuis sa, 3,000 an inn passé, ek zordi le mal pé contigne augmenté.
7. Kifer zordi plus ki avant nou bizin delivrance ki Bondié pou amené?
7 Li vrai ki le mal existé depuis bien longtemps, mais zordi plus ki avant nou bizin delivrance ki Royaume Bondié pou amené. Pendant sa 100 dernier l’année ki finn passé-la, finn ena bann condition pli pire lor la terre couma jamais pa finn ena avant, ek zot pé contigne deterioré. Par exemple, guette sa rapport ki Worldwatch Institute inn faire-la: “Bann la-guerre ki finn ena dan [20e siecle] inn faire trois fois plus victime ki bann la-guerre ki finn ena depuis premier siecle nou lepok ziska 1899.” Depuis 1914, plus ki 100 million dimoune inn perdi la vie dan bann la-guerre! Dapré enn encyclopedie, ena ziska 60 million dimoune ki’nn mort dan Deuxieme Guerre mondial. Zordi, certain nation ena mem bann zarme nucleaire, sa vedir ki bann dimoune ena capacité pou detruire enn grand partie population ki ena lor la terre. Ek malgré bann grand progré ki la science ek la medecine pé faire, chaque l’année apepré cinq million zenfant mort a cause pena assez mangé ek a cause maladie.—Guette chapitre 9 dan livre Ki la Bible enseigné vrai-mem?
8. Ki domination bann dimoune pendant plusieurs millier l’année inn vrai-mem prouvé?
8 Bann dimoune pa finn kapav arrete le mal. Bann l’organisation politik, commercial ek religieux jamais pa finn kapav donne bann dimoune bann kitsoz de base ki zot bizin, setadir la paix, prosperité ek la santé. Au lieu ki zot reglé bann grand probleme ki ena dan le monde, sa bann l’organisation-la finn faire sa bann probleme-la vinn pli pire encore. Domination bann dimoune pendant plusieurs millier l’année inn prouvé ki sa bann parole-la zot vrai: “Enn dimoune pa finn crée pou decidé ki chemin li pou prend. Enn dimoune ki pé marché pa finn crée pou dirige so pas.” (Jér. 10:23) Oui, “dimoune finn domine dimoune pou zot prop malheur.” (Eccl. 8:9) En plus, “creation entier pé contigne plaigné ensam ek souffert ensam.”—Rom. 8:22.
9. Ki bann condition bann vrai chretien attann pou trouvé dan “dernier jour”?
9 La Bible ti annoncé concernant nou lepok: “Dan dernier jour pou ena bann lepok critik ki difficile pou supporté.” Apré ki la Bible ti decrire bann condition ki pou existé enba domination bann dimoune, sa prophetie-la dire: “Bann dimoune mauvais ek bann faussaire pou vinn pli pire.” (Lire 2 Timothée 3:1-5, 13.) C’est seki bann chretien attann pou trouvé, parski “le monde entier li dan pouvoir sa kikenn ki mauvais-la,” setadir Satan. (1 Jean 5:19) Mais ena enn bon nouvelle: bientot Bondié pou delivré bann dimoune ki content Li. Li pou delivré zot ar sa lé-monde ki pé degrade bien-bien vite-la.
Li tousel pou kapav delivré nou
10. Kifer zis Jéhovah tousel ki pou kapav delivré nou?
10 Kan ou preche la bonne nouvelle, explik bann dimoune ki zis Jéhovah tousel ki pou kapav amenn enn delivrance. Li tousel ki ena pouvoir ek volonté pou delivré so bann serviteur dan n’importe ki mauvais situation. (Actes 4:24, 31; Rév. 4:11) Nou kapav sur ki Jéhovah pou toujours delivré so bann serviteur ek realise so bann promesse parski Li finn faire sa serment-la: “Vrai-mem, pareil couma mo finn maziné, sa-mem ki pou arrivé.” So parole “pa pou retourne vers [Li] sans resultat.”—Lire Isaïe 14:24, 25; 55:10, 11.
11, 12. Ki garantie Jéhovah donne so bann serviteur?
11 Jéhovah inn donne so bann serviteur garantie ki Li pou delivré zot kan Li pou amenn so jugement lor bann mauvais dimoune. Kan Li ti envoye prophete Jérémie pou koz avek courage ar bann dimoune ki ti faire bann grand peché, Li ti dire li: “Pa peur . . . Mo avek toi pou delivré toi.” (Jér. 1:8) Pareil aussi kan Jéhovah ti pré pou detruire Sodome ek Gomorrhe, Li ti envoye deux ange pou escorte Lot ek so famille ek faire zot sorti dan sa l’endroit dangereux-la ek mette zot en securité. “Lerla Jéhovah ti faire enn la-pluie soufre ek difé . . . tombe lor Sodome ek Gomorrhe.”—Gen. 19:15, 24, 25.
12 Mem kan sa concerne la terre entier, Jéhovah kapav delivré bann ki faire so volonté. Kan Li ti detruire enn mauvais le monde par enn deluge, Li ti “sauve Noé ki ti enn predicateur la justice, ensam avek sept lezot.” (2 Pierre 2:5) Encore enn fois, Jéhovah pou delivré bann dimoune droite kan Li pou detruire sa mauvais lé-monde-la. Alors, so Parole dire: “Rod Jéhovah, zot tou bann humble lor la terre . . . Rod la justice, rod l’humilité. Kitfois lerla, zot pou sapé kan jour colere Jéhovah vini.” (Tseph. 2:3) Apré sa destruction ki pou ena lor la terre entier-la, ‘bann dimoune droite pou reste lor la terre, mais bann mauvais pou disparette lor la.’—Prov. 2:21, 22.
13. Couma Jéhovah pou delivré so bann serviteur ki’nn mort?
13 Selman, ena beaucoup serviteur Bondié ki’nn mort a cause maladie, persecution ek pou bann lezot raison. (Mat. 24:9) Couma tou sa bann dimoune-la pou delivré? Couma nou finn trouvé au commencement, “pou ena enn resurrection bann dimoune ki juste.” (Actes 24:15) Li vrai-mem enn grand reconfort pou koné ki nanyin pa kapav empeche Jéhovah pou delivré so bann serviteur!
Enn gouvernement juste
14. Kifer nou sur ki Royaume Bondié li enn gouvernement juste?
14 Dan ou ministere, ou kapav expliké ki Royaume Jéhovah ki dan le ciel, c’est enn gouvernement juste. Li vrai-mem juste parski li reflete bann qualité extraordinaire ki Bondié ena, couma par exemple, la justice ek l’amour. (Deut. 32:4; 1 Jean 4:8) Bondié inn mette sa Royaume-la dan la main Jésus Christ, ki pli qualifié ki n’importe kisannla pou dirige la terre. Jéhovah finn aussi decidé ki pou ena 144,000 chretien oint ki sorti lor la terre. Zot pou ressuscité pou al vive dan le ciel couma bann coheritier Jésus Christ ek zot pou regne ensam avek li lor la terre.—Rév. 14:1-5.
15. Ki difference ena entre domination Royaume Bondié ek domination bann dimoune?
15 Ena vrai-mem enn grand difference entre domination Jésus ek bann 144,000, ek domination bann dimoune, pa vrai? Souvent bann dirigeant sa lé-monde-la finn montré-zot cruel ek zot finn amenn bann dimoune ki zot dirigé dan bann la-guerre ek sa finn faire plusieurs million dimoune perdi zot la-vie. Nou pa etonné ki la Bible conseil nou pou pa mette nou confiance dan bann zom “ki pa kapav delivré personne”! (Ps. 146:3) Mais Jésus Christ pou manifesté bann bon qualité kan li pou regné. Li ti dire: “Vinn vers moi, zot tou ki pé rinté ek ki ena fardeau lor zot, ek moi mo pou reconforte zot. Prend mo joug lor zot ek aprann ar moi, parski mo ena enn caractere doux ek enn leker humble, ek zot pou gagne reconfort pou zot nâme. Parski mo joug, li doux ek mo charge, li leger.”—Mat. 11:28-30.
Bientot la fin bann dernier jour!
16. Couma sa bann dernier jour ki nou pé vive-la pou fini?
16 Sa lé-monde-la inn arrive dan so bann dernier jour ou-soit “conclusion sa systeme-la” depuis 1914. (Mat. 24:3) Bientot, seki Jésus ti appel “enn grand tribulation” pou arrivé. (Lire Matthieu 24:21.) C’est enn tribulation ki jamais pa finn ena avant, ek sa pou detruire le monde Satan net. Mais couma la grande tribulation pou commencé? Ek couma li pou fini?
17. Dapré la Bible, ki pou arrivé kan la grande tribulation pou commencé?
17 Sa grand tribulation-la pou commencé enn sel coup. Oui, “jour Jéhovah” pou vini kan personne pa attann, “kan zot pou dire: ‘La paix ek securité!’ ” (Lire 1 Thessaloniciens 5:2, 3.) Sa tribulation-la pou commencé kan bann nation pou pensé ki zot inn pré pou reglé certain parmi zot bann grand probleme. Destruction “Babylone la Grande,” l’empire mondial tou bann fausse religion, pou arrive enn sel coup ek bann dimoune dan le monde pou etonné. Bann lé-roi ek bann dimoune ki ena l’autorité pou gagne enn sok kan Bondié pou amenn so jugement lor Babylone la Grande.—Rév. 17:1-6, 18; 18:9, 10, 15, 16, 19.
18. Couma Jéhovah pou reagir kan Satan pou attak So peuple?
18 Pou arrive enn moment critik kot pou ena “bann signe dan soleil, la lune ek bann zetoile,” ek “signe Fils de l’homme pou apparette dan le ciel.” Lerla, nou pou kapav ‘redresse-nou ek leve nou la-tête, parski nou delivrance pou’nn kosté.’ (Luc 21:25-28; Mat. 24:29, 30) Satan, ou-soit Gog, pou dirige so bann l’armée kont peuple Bondié. Mais concernant bann ki pou attak so bann fidele serviteur, Jéhovah dire: “Seki pé touche zot, pé touche mo la-grain lizié.” (Zek. 2:8) Sa vedir ki Satan pa pou reussi detruire peuple Bondié. Kifer? Parski Souverain Seigneur Jéhovah pou reagir desuite pou delivré so bann serviteur.—Ézék. 38:9, 18.
19. Kifer nou kapav sur ki bann l’armée Bondié pou detruire systeme Satan?
19 Kan Bondié pou faire kitsoz kont bann nation, ‘zot pou bizin koné ki Li-mem Jéhovah.’ (Ézék. 36:23) Li pou envoye so bann l’armée bien puissant, setadir plusieurs millier ange ki dirigé par Christ Jésus, pou detruire le monde Satan ki resté lor la terre. (Rév. 19:11-19) Nou rappel ki enn fois, enn sel ange ti prend zis enn la-nuit pou “touye cent-quatre-vingt-cinq mille” l’ennemi Bondié. Alors, sa faire nou ena confiance ki li pou facile pou l’armée Bondié detruire tou trace le monde Satan ki pou resté lor la terre kan la grande tribulation pou terminé avek Har-Maguédôn. (2 Rois 19:35; Rév. 16:14, 16) Satan ek so bann demon pou emprisonné dan enn grand l’abime pendant mille an. Finalement Bondié pou detruire zot.—Rév. 20:1-3.
20. Ki Jéhovah pou faire grace a so Royaume?
20 Lerla, Bondié pou nettoye la terre ek pou tire le mal ki ena lor la, ek bann dimoune droite pou vive pou touletan lor sa la-terre-la. Jéhovah pou montré ki Li enn grand Liberateur. (Ps. 145:20) Grace a so Royaume, Li pou justifié so souveraineté, sanctifié so nom ki saint ek realise so grand projet pou la terre. Nou souhaité ki ou pou gagne beaucoup la-joie dan ou ministere a mesure ki ou annonce sa bon nouvelle-la ek aide bann ki “ena l’attitude ki bizin pou gagne la vie eternel” pou comprend ki nou delivrance grace a Royaume Bondié bien pré!—Actes 13:48.
Eski ou rappel?
• Couma Jésus ti montré l’importance Royaume Bondié?
• Kifer nou bien bizin delivrance zordi plus ki avant?
• Ki bann l’evenement nou kapav attann pou trouvé pendant la grande tribulation?
• Couma Jéhovah pou montré ki Li enn grand Liberateur?
[Zimage lor page 16]
Parole Bondié ti annoncé ki dan nou lepok pou ena enn travail predication couma jamais pa finn ena avant
[Zimage lor page 18]
Pareil couma Jéhovah ti delivré Noé ek so famille, Li kapav delivré nou
[Zimage lor page 20]
Jéhovah “pou souye tou larme . . . , ek la mort nepli pou existé.”—Rév. 21:4