Kifer Bondié ti donne Noé so faveur—Kifer sa bizin interesse nou

MAJORITÉ parmi nou rappel bann l’occasion kot nou ti gagne bann nouvelle important. Nou rappel bann detail—pa zis kot nou ti été ek ki nou ti pé faire, mais aussi couma nou ti reagir. Surement Noé jamais pa ti blié sa jour kot Jéhovah, Souverain l’univers, ti annonce li enn nouvelle. Ek ki lot nouvelle ti kapav pli important ki sa? Jéhovah ti dire ki Li ti’nn decidé pou detruire “tou dimoune.” Li ti demann Noé pou construire enn grand l’arche pou ki li, so famille, ek bann zanimo tou l’espece kapav gagne la vie sauve.—Genèse 6:9-21.

Couma Noé ti reagir? Eski li ti content pou tann sa nouvelle-la, ou-soit eski li ti protesté? Couma eski li ti annonce so madame ek so famille sa nouvelle-la? La Bible pa dire. Seki li dire nou, c’est ki: “Noé ti faire dapré tou seki Bondié ti’nn donne li l’ordre pou faire. Li ti faire exactement seki ti’nn dire li faire.”—Genèse 6:22.

Sa-mem point important-la, parski seki la Bible dire expliké en partie kifer Noé ti trouve faveur devant lizié Bondié; Noé ti disposé pou faire seki Bondié ti demann li. (Genèse 6:8) Ki lot kitsoz ti faire Noé gagne faveur Bondié? Sa reponse-la important parski nou bizin pareil couma Noé pou ki nou kapav gagne la vie sauve kan Bondié pou tire tou seki mauvais lor la terre encore enn fois. Mais premierement, anou guetté couma la vie Noé ti été dan lepok avant deluge.

Bann demon vinn lor la terre

Noé ti vive dan commencement l’histoire humain. Li ti né apepré mille an apré creation premier zom. Sa lepok-la bann dimoune pa ti, couma certain pensé, bann zom ki ti reste dan bann caverne—bann creature bien bete ki ti couvert partout ar poil, ek ki ti marche ledo courbé avek enn l’espece matrak dan zot la main. Sa lepok-la ti ena bann zouti en ferraille ek en cuivre, ek kitfois Noé ti servi sa bann zouti-la pou construire l’arche. Ti aussi ena bann l’instrument la musik. Bann dimoune ti marié, zot ti ena bann zenfant, zot ti ena bann plantation, ek zot ti nourri zanimo. Zot ti acheté ek zot ti vendé. Dan sa bann domaine-la, la vie sa lepok-la ti pareil couma la vie zordi.—Genèse 4:20-22; Luc 17:26-28.

Dan lezot domaine, la vie ti bien different. Enn difference, c’est ki bann dimoune ti vive beaucoup pli longtemps. Li ti normal ki enn dimoune vive plus ki 800 an. Noé ti vive 950 an; Adam, 930 an; ek Methoushélah, grand-pere Noé ti vive 969 an.a—Genèse 5:5, 27; 9:29.

Genèse 6:1, 2 decrire enn lot difference. Li dire: “Kan bann dimoune ti commence augmenté lor la terre, ek ki zot ti gagne bann tifi, lerla bann garson vrai Bondié ti remark sa bann tifi-la ek ti trouvé ki zot bien joli; ek zot ti commence prend bann femme pou zot, setadir tou seki zot ti choisiré.” Sa ‘bann garson vrai Bondié-la’ ti bann ange ki ti sorti dan le ciel ek ki ti prend bann lekor humain ek ti circulé partout lor la terre couma bann zom. Pa Bondié ki ti envoye zot, ek zot pa ti ni vini dan l’avantage bann dimoune. Zot ti plutot “quitte sa place kot zot ti’nn crée pou resté-la” dan le ciel, pou gagne relation sexuel avek bann joli tifi lor la terre. Zot ti vinn bann demon.—Jude 6.

Sa bann mauvais ange-la ti rebelle, immoral, ek beaucoup pli fort ek beaucoup pli intelligent ki bann humain. Zot ti ena enn bien mauvais l’influence lor bann dimoune. Surement zot ti control ek domine bann dimoune. Zot pa ti agir en secret, couma enn chef bandit ki bien organise seki li pou faire, ek ki cachiette so l’identité ek faire tou so mauvais travail en secret. Au contraire, devant lizié tou dimoune sans okenn la honte, zot ti rebelle kont disposition ki Bondié ti’nn prend.

Sa bann garson Bondié ki ti bann ange-la ti gagne relation avek bann madame, ek bann madame-la ti gagne bann zenfant ki ti grandi pou vinn bann zom ki ti ena enn la force extraordinaire. Ti fini par appel zot par nom hébreu, “Nephilim.” La Bible dire: “Sa lepok-la, bann Nephilim ti lor la terre, ek aussi apré sa, kan bann garson vrai Bondié ti contigne gagne relation avek bann tifi lor la terre ek bannla ti donne naissance bann garson, zot ti bann zom fort dan lepok longtemps, bann zom ki tou dimoune ti koné.” (Genèse 6:4) Bann dimoune ti ena raison pou bien peur bann Nephilim. Mot “Nephilim” vedir “bann ki faire lezot tombé.” Zot ti touye dimoune ek bann action violent ki zot ti faire, c’est kitfois sa-mem ki raconté dan bann legende.

Bann dimoune juste bouleversé

La Bible decrire sa lepok-la couma enn lepok kot ti ena enn grand corruption ki ti’nn bien prend racine. Li dire: “Bann dimoune ti’nn vinn bien mauvais lor la terre ek tou tendance ki ti ena dan zot leker ti touletan mauvais. . . . La terre . . . ti rempli ar violence. . . . Tou dimoune ti’nn gate zot maniere vive lor la terre.”—Genèse 6:5, 11, 12.

C’est dan sa qualité le monde-la ki Noé ti vive. Noé pa ti couma bann dimoune ki ti ena autour li. “Noé ti enn dimoune droite” ki “ti marche avek vrai Bondié.” (Genèse 6:9) Li pa facile pou enn dimoune droite vive dan enn le monde kot bann dimoune pa droite. Surement Noé ti bien bouleversé par seki bann dimoune ti dire ek ti faire! Surement li ti ena mem sentiment ki Lot, enn lot zom droite ki ti vive apré deluge. Lot, ki ti reste parmi bann habitant la ville Sodome ki ti immoral, “ti bien bouleversé par conduite devergondé bann dimoune ki ti desobeir la loi,” ek “seki li ti trouvé ek tendé alors ki li ti reste parmi zot, ti tourmente so nâme ki ti juste, jour apré jour a cause zot bann action ki ti kont la loi.” (2 Pierre 2:7, 8) Surement ki sa ti pareil pou Noé.

Eski ou bouleversé par bann nouvelle sok ki ou tendé dan l’information ou-soit par conduite bann dimoune autour ou ki pa vive dapré seki Bondié demandé? Si oui, ou kapav comprend sentiment Noé. Maziné couma sa ti difficile pou li pendant 600 an pou supporte sa le monde kot ti ena l’injustice-la, parski c’est l’age ki li ti ena kan deluge ti vini. Surement li ti pé attann avek impatience kan la mechanceté ti pou fini!—Genèse 7:6.

Noé pa ti peur pou montré ki li different

Noé “ti montré ki li sans defaut parmi bann dimoune ki ti pé vive dan so lepok.” (Genèse 6:9) Remarké ki la Bible dire ki li ti sans defaut parmi bann dimoune ki ti vive dan so lepok, pa ki bann dimoune ti considere li couma enn kikenn sans defaut. Sa vedir ki li ti sans defaut devant lizié Bondié, mais pou bann dimoune ki ti vive avant deluge, Noé ti enn dimoune bizarre. Nou kapav sur ki Noé pa ti d’accord avek seki bann dimoune ti pensé en general, ni li ti participe avek zot dan bann divertissement ek bann activité social toulé-jour ki ti kont la loi Bondié. Maziné couma bann dimoune ti considere li kan li ti commence construire l’arche! Surement ki zot ti bouffonne li. Zot pa ti croire ki seki li ti pé dire ti pou arrivé vrai-mem.

En plus, Noé ti ena bann croyance religieux bien profond dan li, ek li pa ti garde sa pou li. La Bible dire ki li ti “enn predicateur la justice.” (2 Pierre 2:5) Surement ki Noé ti attann ki li ti pou gagne l’opposition. Hénok, so arriere-grand-pere, ti enn zom droite ki ti annoncé ki Bondié ti pou amenn so jugement lor bann mauvais dimoune. Pa bizin dire ki sa ti faire Hénok gagne bann persecution, mem si Bondié pa ti permette ki so bann opposant touye li. (Genèse 5:18, 21-24; Hébreux 11:5; 12:1; Jude 14, 15) Avek Satan, bann demon, bann Nephilim, ek la majorité dimoune ki ti soit indifferent ou-soit opposé ar li, Noé ti bizin courage ek aussi la foi dan capacité Jéhovah pou protege li.

Bann ki pa servi Bondié inn touletan opposé ar bann ki servi Li. Bann dimoune ti ena la haine mem pou Jésus Christ, ek c’est seki ti arrivé aussi ar bann ki ti suive li. (Matthieu 10:22; Jean 15:18) Noé pa ti peur pou servi Bondié, mem si bann dimoune en general pa ti faire sa. Li ti comprend ki li beaucoup pli important pou gagne faveur Bondié ki pou gagne faveur bann ki opposé ar Bondié. Ek Noé ti gagne faveur Bondié.

Noé ti prend compte

Couma nou’nn trouvé, avek courage Noé ti preche ar lezot. Couma zot ti reagir ar so message? La Bible dire ki avant deluge, bann dimoune ti pé “mangé ek boire, bann zom ti pé marié ek ti pé donne bann femme en mariage, ziska jour ki Noé ti rente dan l’arche; ek zot pa ti prend compte, ziska ki deluge ti vini ek ti balié zot tou.” Zot pa ti prend compte l’avertissement.—Matthieu 24:38, 39.

Jésus ti dire ki mem zaffaire pou arrivé dan nou lepok. Pendant plus ki cent an, bann Témoins de Jéhovah inn averti bann dimoune ki Jéhovah pou faire bann kitsoz ki pou amenn bann grand-grand changement, pou realise promesse pou etabli enn nouveau le monde kot pou ena la justice. Mem si bann million dimoune inn reagir dan enn fason positif, ena bann milliard dimoune ki pa prend compte sa l’avertissement-la. “Pareil couma zot envie,” zot refuse accepté ki vrai-mem deluge ti arrivé ek zot pa prend compte so signification.—2 Pierre 3:5, 13.

Mais Noé li, li ti prend compte. Li ti croire seki Jéhovah ti dire li. Sa l’obeissance-la ti sap so la vie. L’apotre Paul ti ecrire: “Par la foi, Noé, apré ki Bondié ti’nn averti li lor bann kitsoz ki dimoune pa ti encore trouvé, ti montré ki li ti ena la crainte pou Bondié, ek li ti ranz enn l’arche pou sauve so famille.”—Hébreux 11:7.

Enn l’exemple pou nou imité

L’arche ki Noé ti construire ti extra-grand—li ti pli longue ki enn la plaine football ek preské mem hauteur ki enn batiment trois l’etage. Li ti 30 metre pli longue ki bateau Wyoming, pli grand bateau en di-bois ki finn deja construire dapré bann rapport. Bien sur, l’arche pa ti enn bateau; li ti zis bizin flotté. Mais ti bizin bann technik bien avancé pou construire sa. Ek ti bizin recouvert li endan ek dehors avek koltar. Kitfois ti prend 50 an pou construire l’arche.—Genèse 6:14-16.

Ti ena plus ki sa pou faire. Noé ti bizin ramasse mangé pou enn periode enn an, pou so famille ek pou bann zanimo. Avant deluge vini, li ti bizin rassemblé bann zanimo ek faire zot rente dan l’arche. “Noé ti faire dapré tou seki Bondié ti’nn donne li l’ordre pou faire.” Surement li ti senti-li bien soulagé kan tou kitsoz ti fini paré ek ki Jéhovah ti ferme la porte l’arche!—Genèse 6:19-21; 7:5, 16.

Lerla deluge ti vini. La pluie ti tombé pendant 40 jour ek 40 nuit. Zot tou ti bizin reste dan l’arche pendant enn l’année entier ziska ki de l’eau baissé. (Genèse 7:11, 12; 8:13-16) Tou bann mauvais dimoune ti perdi la vie. Zis Noé ek so famille ti sapé pou vive lor enn la terre ki Bondié ti’nn nettoyé.

La Bible dire ki deluge ki ti arrivé dan lepok Noé partout lor la terre, li “enn l’exemple lor bann kitsoz ki pou arrivé.” Dan ki sens? Nou lire: “Bondié finn reserve le ciel ek la terre ki existé zordi, pou brulé par difé, ek pou jour jugement ek destruction bann dimoune ki pena okenn respé pou Bondié.” Mais pareil couma dan lepok Noé, pou ena bann dimoune ki pou sapé. Ou kapav sur ki “Jéhovah koné couma pou delivré bann dimoune ki attaché ar Li, kan zot dan l’epreuve.”—2 Pierre 2:5, 6, 9; 3:7.

Noé ti enn dimoune ki ti attaché ar Bondié, enn zom droite parmi enn mauvais generation. Li ti obeir Jéhovah dan tou kitsoz. Li ti ena courage pou faire seki droite mem si li ti koné ki sa ti pou faire bann dimoune ki pa ti envie servi Bondié, meprise li ek ena la haine pou li. Kan nou imite Noé dan sa bann domaine-la, nou aussi nou pou gagne faveur Bondié ek nou pou ena l’espoir pou sapé ek rente dan le monde nouveau ki pou vini bientot.—Psaume 37:9, 10.

[Note]

[L’encadré lor page 5]

Bann action violent ki bann Nephilim ti faire, c’est kitfois sa-mem ki raconté dan bann zistoire ki ti inventé longtemps

[Zimage lor page 7]

Kan nou imite la foi Noé, nou kapav gagne faveur Bondié

[Remerciement photo lor page 5]

Alinari/Art Resource, NY