Seki nou aprann ar Jésus

Kifer nou bizin bon?

Eski ou bon envers lezot mem kan zot mal agir envers ou? Si nou envie imite Jésus, nou bizin bon mem envers bann ki ena la haine pou nou. Jésus ti dire: “Si zot content bann ki content zot, ki merite zot ena? Parski mem bann ki faire peché content bann ki content zot. . . . Au contraire, contigne content zot bann l’ennemi . . . , ek zot pou vinn bann garson sa Kikenn ki Pli Grand-la, parski Li bon envers bann ki pena reconnaissance ek ki mauvais.”—Luc 6:32-36; 10:25-37.

Kifer nou bizin disposé pou pardonné?

Kan nou faire peché, nou envie ki Bondié pardonne nou. Jésus ti enseigné ki li bon ki nou prié pou nou gagne pardon Bondié. (Matthieu 6:12) Mais, Jésus ti dire aussi ki Bondié pou pardonne nou selman si nou-mem nou disposé pou pardonne lezot. Li ti dire: “Si zot pardonne bann dimoune zot peché, zot Papa ki dan le ciel aussi pou pardonne zot; mais si zot pa pardonne bann dimoune zot peché, zot Papa aussi pa pou pardonne zot.”—Matthieu 6:14, 15.

Couma bann famille kapav heureux?

Mem si Jésus jamais pa’nn marié, nou kapav aprann beaucoup ar li lor fason ki nou kapav rann nou famille heureux. Par so parole ek so action, li finn donne nou enn modele pou nou imité. Anou guette sa trois point-la:

1. Enn mari bizin content so femme couma so prop lekor. Jésus inn donne l’exemple bann mari. Li ti dire so bann disciple: “Mo pé donne zot enn nouveau commandement: zot bizin content zot camarade.” Ziska ki point? Li ti dire: “Pareil couma mo finn content zot.” (Jean 13:34) La Bible applik sa principe-la ar bann mari kan li dire: “Mari, contigne content zot femme, pareil couma Jésus Christ aussi finn content la congregation ek finn donne so la vie pou sauve li, . . . Coumsa-mem ki bann mari bizin content zot femme pareil couma zot prop lekor. Enn kikenn ki content so femme content li-mem, parski jamais personne pa finn ena la haine pou so prop la chair; au contraire li nourri li ek li prend li bien soin, pareil couma Christ aussi faire pou la congregation.”—Éphésiens 5:25, 28, 29.

2. Bann conjoint bizin reste fidele ar zot camarade. Kan enn dimoune gagne bann relation sexuel en dehors mariage, sa li enn peché kont Bondié ek li detruire bann famille. Jésus ti dire: “Eski zot pa finn lire . . . ‘A cause sa-mem enn missié pou quitte so papa ek so mama ek li pou attache-li avek so madame, ek toulé-deux pou vinn enn sel la chair’? Oui, zot nepli deux, mais enn sel la chair. Alors, seki Bondié finn mette enba enn sel joug, fodé ki personne pa separe sa. . . . Mo dire zot ki n’importe kisannla ki divorce avek so femme, excepté a cause fornication, ek marié avek enn lot, commette l’adultere.”—Matthieu 19:4-9.

3. Bann zenfant bizin soumette ar zot parent. Jésus ti parfait alors ki so bann parent ti imparfait. Pourtant kan li ti zenfant, li ti obeir zot. La Bible dire concernant Jésus kan li ti ena 12 an: “Li ti desann avek [so bann parent] ek li ti vinn Nazareth, ek li ti contigne soumette ar zot.”—Luc 2:51; Éphésiens 6:1-3.

Kifer nou bizin mette sa bann principe-la en pratik?

Concernant bann leson ki li ti enseigne so bann disciple, Jésus ti dire: “Si zot konn sa bann kitsoz-la, zot pou heureux si zot faire li.” (Jean 13:17) Si nou envie vinn bann vrai chretien, nou bizin mette en pratik bann conseil ki Jésus donne nou lor fason ki nou bizin traite lezot. Li ti dire: “Par sa tou dimoune pou koné ki zot mo bann disciple, si zot ena l’amour entre zot.”—Jean 13:35.

Pou plus renseignement, guette chapitre 14 dan livre Ki la Bible enseigné vrai-mem?a

[Zimage page 18]

Parabole Jésus lor fils prodigue enseigne nou ki li important pou ena la bonté ek pou pardonné.—Luc 15:11-32

[Zimge page 19]

Bann conjoint bizin reste fidele ar zot camarade

[Note]