Question bann lecteur

Eski ena l’espoir resurrection pou enn tibaba ki’nn mort dan ventre so mama?

Pou bann dimoune ki jamais pa’nn konn la perte enn tibaba, li kapav difficile pou comprend sentiment bann parent ki dan sa situation-la. Certain parent bien souffert. Enn mama ti perdi cinq zenfant ki ti mort avant zot naissance. Avek le temps, li finn ena la joie pou grandi deux garson en bonne santé. Mais malgré sa, li ti rappel chaque zenfant ki li ti perdi. Ziska la fin so la vie, li ti koné ki l’age sa bann zenfant ki ti né mort ou-soit ki li ti faire fausse couche-la ti pou ena si zot ti encore vivant. Eski sa bann chretien-la kapav attann ki zot pou regagne seki zot finn perdi grace a resurrection?

Reponse sa question-la bien simple: nou pa koné. La Bible jamais pa koz directement lor resurrection bann tibaba ki’nn mort avant ki zot né. Mais, dan Parole Bondié ena bann principe ki ena enn rapport avek sa question-la ek ki kapav reconforte nou.

Anou examine deux question ki ena enn rapport avek sa sujet-la. Premierement, pou Jéhovah, kan eski la vie enn dimoune commencé—kan li pé formé dan ventre so mama ou-soit kan li né? Deuxiemement, couma Jéhovah considere enn tibaba ki pankor né—couma enn dimoune en entier ou-soit zis couma enn groupe cellule ek la chair dan ventre enn madame? Bann principe ki ena dan la Bible donne nou bann reponse clair lor sa deux question-la.

La Loi mosaïk ti montré dan enn fason clair ki la vie pa commencé kan enn tibaba né, mais bien plus avant. Couma li montré nou sa? Dan la Loi, kan enn dimoune ti touye enn tibaba ki ti pé developpé dan ventre so mama, ti kapav condamne li a mort. Guetté ki sa la Loi-la ti dire: “To bizin donne nâme pou nâme.”a (Ex. 21:22, 23) Alors, sa tibaba ki dan ventre so mama-la li vivant, li enn nâme vivant. Bann million chretien inn comprend sa verité ki pa’nn changé-la, ek sa finn aide zot pou rejette l’avortement, parski zot reconette ki c’est enn peché bien grave devant Bondié.

Couma nou finn fek trouvé sa tibaba ki pankor né-la li vivant. Alors, devant Jéhovah, ki valeur so la vie ena? Dapré la loi ki finn cité plus la haut, ti bizin mette a mort enn dimoune ki ti provok la mort enn tibaba ki encore dan ventre so mama. Alors, li clair ki la vie enn tibaba ki pankor né ena enn grand valeur devant lizié Bondié. En plus, plusieurs verset la Bible montré nou ki Jéhovah considere enn tibaba ki pankor né couma enn dimoune. Par exemple, le roi David ti inspiré pou ecrire sa bann parole-la lor Jéhovah: “To finn protege moi dan ventre mo mama. . . . To lizié ti trouve moi kan mo ti fek formé, ek tou mo bann partie ti ecrire dan to livre kan zot ti formé.”—Ps. 139:13-16; Job 31:14, 15.

Jéhovah trouve aussi ki sa bann tibaba ki pankor né-la zot ena bann qualité particulier ek ki zot pou kapav faire bann grand kitsoz dan l’avenir. Kan Rébecca, Isaac so madame, ti enceinte bann jumeau, Jéhovah ti dire enn prophetie concernant sa deux garson ki ti pé laguerre dan so ventre-la. Sa faire nou comprend ki Li ti fini trouve certain zot bann tendance ki ti pou ena enn l’effet lor beaucoup dimoune dan l’avenir.—Gen. 25:22, 23; Rom. 9:10-13.

L’exemple Jean Baptiste aussi interessant. L’Evangile dire: “Kan Élisabeth ti tann salutation Marie, sa zenfant ki ti dan so ventre-la ti sauté; ek Élisabeth ti rempli avek l’esprit saint.” (Luc 1:41) Kan Luc ki ti enn docteur ti raconte sa l’evenement-la, li ti servi enn mot grec ki ti kapav servi pou decrire soit enn tibaba ki pa ti encore né ou-soit enn tibaba ki ti fini né. Li ti servi mem mot pou decrire Jésus kan li ti enn tibaba ki ti pé dormi dan enn mangeoire.—Luc 2:12, 16; 18:15.

Kan nou examine sa bann detail-la ek sa bann verset-la, eski la Bible permette nou faire enn difference entre enn tibaba ki dan ventre so mama ek enn tibaba ki’nn prend so premier respiration? Apparemment non. Ek sa li en accord avek bann decouverte ki la science inn faire dan nou lepok. Par exemple, bann ki faire bann recherche finn aprann ki enn tibaba ki dan ventre so mama kapav ressenti seki pé passé en dehors ek li reagir. Alors, sa expliké kifer enn mama ki enceinte developpe enn grand l’attachement avek sa zenfant ki pé grandi dan so ventre-la.

Comié le temps enn tibaba pou passé dan ventre so mama avant ki li né sa aussi kapav parette couma enn kitsoz ki nou pa kapav controlé. Anou guette enn l’exemple: Enn mama donne naissance enn tibaba avant so ler, mais deux-trois jour apré zenfant-la mort. Enn lot madame li, li’nn termine so neuf mois grossesse mais zis avant so naissance, zenfant-la mort. Eski sa premier mama-la, zis parski par hasard zenfant-la finn né avant ler ki li ena l’espoir pou trouve so zenfant ressuscité, alors ki lot mama-la li, li pena sa l’esperance-la?

Alors, pou resumé, la Bible enseigné dan enn fason clair ki la vie li commencé kan enn zenfant inn formé dan ventre so mama ek ki Jéhovah considere sa zenfant ki pankor né-la couma enn dimoune ek ki ena valeur. A cause sa bann verité ki ena dan la Bible-la, certain kapav trouve sa couma enn kitsoz ki pa logik pou dire ki pena l’espoir resurrection pou enn zenfant ki’nn mort avant ki li né. Zot kapav pensé ki sa bann raisonnement-la souleve bann doute lor nou position kont l’avortement, nou position ki basé lor la Bible ek ki surtout fondé lor sa bann mem verité-la.

Dan le passé, sa mem periodik-la ti souleve certain objection, ki ti mette en doute possibilité ki bann tibaba ki’nn mort avant naissance, kapav ressuscité. Par exemple, eski dan Paradis, Bondié ti pou remette dan ventre enn madame la vie enn tibaba ki pankor developpé net? Mais, apré ki zot finn etudié sa question-la plus en profondeur, ki zot finn prié ek medité, College central inn tire conclusion ki bann question coumsa pa affecté ditou l’esperance resurrection. Kifer? Parski Jésus ti dire: “Tou kitsoz possible pou Bondié.” (Marc 10:27) Seki’nn arrive Jésus li-mem montré nou comié sa bann parole-la zot vrai; Bondié ti transfere so la vie depuis le ciel dan ventre enn jeune vierge—enn kitsoz impossible pou bann dimoune.

Mais eski sa vedir ki la Bible enseigné ki bann tibaba ki’nn mort avant zot naissance pou ressuscité? Li important pou noté ki la Bible pa reponn sa question-la directement, alors bann dimoune pena okenn raison pou insisté ki sa bann tibaba-la pou ressuscité. Sa sujet-la kapav souleve beaucoup question ki jamais pa pou fini. Alors, li pou pli bon ki nou evite faire bann supposition. Seki nou sur, c’est ki sa question-la li pou reglé par Jéhovah, enn Bondié ki ena l’amour fidele ek misericorde. (Ps. 86:15) Nou pena doute ki c’est so pli grand desir pou gagne victoire lor la mort grace a la resurrection. (Job 14:14, 15) Nou kapav sur ki touletan Li faire seki juste. Li pou gueri tou bann blessure ki la vie dan sa mauvais systeme-la inn faire nou gagné ek pou Li faire sa, avek amour Li pou donne l’ordre so garson pou “detruire seki Satan finn faire.”—1 Jean 3:8.

[Note]

[Zimage lor page 23]

Jéhovah pou gueri tou bann blessure ki bann l’evenement bien difficile finn faire nou gagné