Eski l’argent li la source vrai bonheur?

SONIA ti né en Espagne. Letan li ti zenfant, li ti assisté bann reunion bann Témoins de Jéhovah avek so mama. Mais kan li’nn grandi, li ti al reste Londres, en Angleterre, ek la li ti commence travail couma enn courtier dan domaine finance.

Sonia ti content so travail. Li ti pé gagne beaucoup kass ek li ti pé travail avek bann gros-gros somme l’argent pou so bann client. Li ti prend plaisir pou faire so travail ek li ti gagne beaucoup succès. Sonia souvent ti pé travail 18 heure temps par jour, ek certain soir li ti dormi zis deux a trois heure temps. So la vie ti concentré zis lor so travail. Mais, enn sel coup so la vie inn changé net. Sonia ti faire enn attak cerebral—kitfois a cause so fason vive ki ti bien stressant. Li ti ena selman 30 an.

Sonia so enn coté lekor ti paralysé, ek bann docteur pa ti sur si enn jour li ti pou recommence kozé. Desuite so mama ti al l’Angleterre pou occupe li. Letan Sonia ti recommence marché, so mama ti dire li: “Mo pé al reunion, ek to pou bizin vinn avek moi parski mo pa kapav laisse toi tousel.” Sonia ti accepté pou al ensam avek li. Ki finn arrivé?

Sonia rappel: “Tou seki mo ti tendé ti parette vrai. Sa ti extraordinaire! Avek beaucoup la joie mo ti accepté enn l’etude la Bible avek enn parmi bann dimoune ki ti vinn accueillir moi premier fois mo ti al la Salle du Royaume. Bann camarade ki mo ti ena avant ti’nn arrete vinn visite moi, mais mo bann nouveau camarade ti content moi ek zot ti prend moi bien soin.”

Tigit-tigit, Sonia ti recommence kozé ek li ti aussi faire bann progré bien rapide lor plan spirituel. Dan moins ki enn l’année, li ti prend bapteme. Beaucoup parmi so bann nouveau camarade ti dan service a plein temps, alors, li ti kapav trouvé couma zot ti heureux. Sonia ti pensé: ‘Moi aussi mo envie vinn coumsa. Mo envie donne Jéhovah tou seki mo kapav!’ Azordi Sonia preche la bonne nouvelle a plein temps.

Ki Sonia finn aprann avek seki finn arrive li? “Mem si mo ti pé gagne beaucoup kass, mais stress ek l’insecurité ki ti ena dan sa travail-la ti faire moi tracassé ek malheureux. Mo’nn arrivé comprend ki seki pli important dan la vie c’est ena enn bon relation avek nou Papa ki dan le ciel, Jéhovah. Asterla mo vrai-mem heureux.”

Paul ti ecrire: “L’amour pou l’argent li enn racine tou sorte qualité mauvais kitsoz, ek parski zot finn galope derriere sa l’amour-la, certain finn perdi la foi ek zot finn pique zot-mem partout ar beaucoup douleur.” (1 Timothée 6:10) Grace a so prop l’experience, Sonia kapav confirmé ki sa bann parole-la zot bien vrai.